Malangaʻi ʻa e Founga ʻa e ʻOtuá ki he Melinó mo e Maluʻangá
1 Kuo fai ʻe he tangatá ha ngaahi fokotuʻu lahi ki he melinó mo e maluʻangá, ka ʻoku ʻikai ke ʻi ai ha taha ʻo e ngaahi meʻá ni te ne fakahoko mai ʻa e ngaahi fiemaʻu moʻoni ʻa e kakaí ʻi he māmani lahí. Neongo ʻoku hā mai ko e ngaahi taʻofiʻanga tefito ʻo ha māmani malu mo melinó ko e fetāufehiʻaʻaki fakalotu, fakamatakali, mo fakaepuleʻanga fakataha mo e loto-feinga fakaepolitikalé mo e mānumanú, ʻoku ʻilo ʻe he kau Kalisitiane moʻoní ia ko e fakafaingataʻaʻiaʻanga moʻoní ko Sētane ko e Tēvoló pea mo e fakafisi ʻa e tangatá ke fakamoʻulaloa kia Sihova ko e ʻOtuá.—Sāme 127:1; Selemaia 8:9; 1 Sione 5:19.
2 ʻI he lolotonga ʻo Sānualí, te tau feinga ke tokoni ki hotau ngaahi kaungāʻapí ke nau sio ko e founga ʻa e ʻOtuá ki he melinó mo e maluʻangá ko e foungá pē ia ʻe taha, pea ʻoku maʻu ʻe Sihova ʻa e fakaleleiʻanga lelei taha ki he ngaahi palopalema kotoa ʻo e faʻahinga ʻo e tangatá.
3 Ngāueʻaki ʻa e Ngaahi Tuleki Foʻoú: ʻE lava ke tau vahevahe atu ʻa e pōpoaki fakatupu langa hake ko ʻení ʻaki hano ngāueʻaki ʻa e ngaahi tuleki naʻe tuku ange mai ʻi heʻetau Fakataha Fakavahe ko e “Kau Tapua Atu ʻo e Maama.” Naʻe fakahā ai ʻe ha fakahāhā fuonounou ʻa e founga ke ngāueʻaki ʻa e Tuleki Fika 19, ʻE Kei Tuʻu ʻa e Māmani ko Ení?, ke kamataʻaki ha fetalanoaʻaki pea iku atu ki ha ako Tohitapu. Ko e fakahoko fakaofo ʻo e kikite ʻa Sīsū ʻo kau ki he ngataʻanga ʻo e māmani ko ení ʻoku totonu ke ne maʻu ʻa e tokanga ʻa e tokolahi.
4 ʻOku laui miliona ʻa e kakai ʻi he ʻahó ni ʻoku nau loto-mafasia, pea ʻoku nau ʻunaloto ki ha taimi ʻo ha fakamoʻui mo ha melino, maluʻanga mo ha nonga moʻoni. Ko e tuleki Fakafiemālie ki he Kau Loto-Mafasiá (Tuleki Fika 20) ʻe hoko nai ko ha maʻuʻanga fakalototoʻa ki ha tokolahi.
5 Ko e Tuleki Fika 21, Fiefia ʻi he Moʻui Fakafāmili, ʻokú ne tokonaki mai ha akonaki ʻaonga ʻo kau ki he meʻa ʻe malava ke fai ke fakaleleiʻi ʻa e moʻui fakafāmilí naʻa mo e taimí ni lolotonga ʻa e talitali ki he kahaʻu fakaofo ʻi he māmani foʻou ʻa e ʻOtuá.
6 Ko e Tuleki Fika 22 ʻokú ne ʻomai ha tali hangatonu ki he fehuʻi Ko Hai ʻOkú Ne Puleʻi Moʻoni ʻa e Māmaní? ʻOkú ne fakamatalaʻi ʻa e ʻuhinga kuo ngāueʻaki ai ʻe he faʻahinga ʻo e tangatá ʻa e ngaahi founga mātuʻaki kovi ʻaupito ki hono fakamamahiʻi mo fetāmateʻaki tavale ʻiate kinautolu pē neongo ʻa e holi ʻa e tokolahi taha ʻo e kakaí ki he moʻui melino mo maluʻanga. ʻOku ʻi ai ʻa e kau laumālie fulikivanu ʻi langi, pea ko e feinga kākā mo olopoto taha ʻa Sētané ke ʻai ke tui ʻa e tokolahi ʻoku ʻikai ke ʻi ai moʻoni ia mo ʻene kau tēmenioó.
7 Kamata ha Ngaahi Ako Tohitapu: ʻE lava ke kamata ha ako Tohitapu ʻaki ha tuleki, ha polosiua, ha makasini, pe ha tohi. Kapau te ke ʻiloʻi kuo ʻosi maʻu ʻe he tokotaha-ʻapí ia ha taha ʻo ʻetau ngaahi tohí, fokotuʻutuʻu fakapotopoto ke ke fakahāhā ʻa e founga ke ngāueʻaki ia ki ha ako Tohitapu. Ko e ngaahi tuleki foʻou mo e kiʻi tohi ʻOtua ʻOku Tokanga Mai? ko e ngaahi meʻangāue lelei ʻaupito ia ke ngāueʻaki ke fakapapauʻi ʻa e lahi ʻo e mahuʻingaʻia ʻa e tokotaha-ʻapí pea mo kamataʻaki ha ngaahi ako Tohitapu. ʻIkai ke ngata ai, ʻe lava ke tuʻuaki ha taha pē ʻo e ngaahi tohi ʻi he lea faka-Pilitānia naʻe pulusi ʻe he Sōsaietí ʻi he 1983 pe ki muʻa ai ʻi he fakahā ʻe he kakai ʻoku lea faka-Pilitāniá ʻa e mahuʻingaʻia moʻoni ki he moʻoní. Kapau ʻoku maʻu ʻi hoʻo fakatahaʻangá ʻa e Family Life, “Kingdom Come,” Moʻoni, pe Youth ʻi he tukuʻanga tohí, ʻai ke ke ngāueleleiʻaki kinautolu ʻi he ngāue fakamalangá.
8 ʻE hoko mai pē ʻa e maluʻanga moʻoní mei he Tokotaha-Fakatupú, ko Sihova ko e ʻOtuá. ʻOku tau loto ke tokoni ki he tokolahi taha ʻe malavá ke nau fakaʻatā honau lotó mo e ʻatamaí ki he moʻoni ʻo e Folofola ʻa e ʻOtuá pea ke maʻu ʻa e ʻamanaki ʻokú ne ʻomai kiate kitautolú. ʻOfa ke tau ngāueleleiʻaki ʻa e ngaahi tokoni fakaefaiako ʻoku tau maʻú ke malangaʻi ʻa e founga ʻa e ʻOtuá ki he melinó mo e maluʻangá.—ʻAisea 2:3, 4.