Ko Hono Fakahā ʻa e Houngaʻia ʻi he Huhuʻí

¹ ʻI he sivilaise kotoa pē ʻoku anga-maheniʻaki ʻa e holi ke fakahā ʻa e houngaʻia ki ha kaungāmeʻa pe ko ha kāinga kuo mate. ʻOku mālohi ʻa e holi ko ʻení tautefito ʻo kapau ko e tokotaha ʻofeiná kuo mate koeʻuhi ko haʻane fakahaofi ʻa e ngaahi moʻui ʻa ha niʻihi kehe. Ko kinautolu kotoa pē ʻoku nau maʻu ʻa e ʻamanaki ʻo e moʻui taʻengatá ʻoku ʻi ai ʻa e ngaahi ʻuhinga mahuʻinga taha ke fakahā ʻa e houngaʻia ʻi he huhuʻí ʻaki ʻa e kau ki he Fakamanatu ʻo e pekia ʻa Kalaisí ʻi ʻEpeleli 6.​—2 Kolinitō 5:14; 1 Sione 2:2.

² Houngaʻia ʻi he ʻofa ʻa Sihová: Ko ha toki meʻa feʻungamālie ē ke tau fakahā ʻa ʻetau houngaʻia loloto tahá ki hotau Tokotaha-Tokoni lahi taha, ko Sihova ko e ʻOtuá, ʻa ia naʻá ne tokonaki mai ʻa e huhuʻí! (1 Sione 4:​9, 10) ʻOku fakahā ʻa e loloto ʻo e ʻofa ʻa Sihová ʻi he meʻaʻofa mahuʻinga taʻefakatataua kuó ne tokonaki mai ko hotau huhuʻí, ʻo ʻikai ko ha tokotaha pē ʻo e kau ʻāngelo māʻoniʻoni ʻe laui milioná, ka ko hono ʻAlo tofu-pe-taha-ne-fakatupú, ʻa hono ʻAlo ʻofeina lahi tahá. (Palōvepi 8:​22, 30) ʻOku fakamanatu mai kiate kitautolu ʻe he ʻAlo ko ʻení, ko Sīsū Kalaisi, ʻa ia ʻokú ne ʻiloʻi lelei taha ʻa Sihová: “He naʻe ʻofa pehe ʻa e ʻOtua ki māmāni, ko ia naʻa ne foaki hono ʻAlo tofu-pe-taha-ne-fakatupu, koeʻuhi ko ia kotoa pe ʻoku tui pikitai kiate ia ke ʻoua naʻa ʻauha, kae maʻu ʻa e moʻui taʻengata.”​—Sione 3:16.

³ Houngaʻia ʻi he ʻOfa ʻa Sīsū Kalaisí: ʻOku pehē pē, ʻoku taau ke tau fakahā ʻa e houngaʻia loloto kia Sīsū Kalaisi, ʻa ia naʻá ne foaki ʻa ʻene moʻuí ko ha huhuʻi maʻá e tokolahi. (Mātiu 20:28) ʻOku hā ʻa ʻene ʻofá ʻi heʻene loto-lelei ke anganofo ki he finangalo ʻo Sihova kiate ia ʻo fekauʻaki mo e huhuʻí. Fakakaukau ange ki heʻene tuku ange ʻa hono ngaahi tuʻunga lelei ʻi he feohi mo ʻene Tamaí mo e laui mano ʻo e kau ʻāngelo māʻoniʻoní koeʻuhi ke ne hoko ko hotau huhuʻi. Naʻe ʻikai ke taʻofi ia ʻe he pole ko e nofo ʻi he lotolotonga pea mo moʻulaloa ki he faʻahinga ʻo e tangata angahalaʻiá pe ko ʻene ʻilo ʻe pau ke ne mate kae tokonaki ʻo e huhuʻí. Ka, naʻá “ne too kiate ia ae tatau moe tamaioeiki, bea fanauʻi ia i he tatau oe tagata: . . . naa ne fakamoulaloaʻi ia, bea talagofua ki he mate, io, ae mate i he akau.”​—Filipai 2:​5-8, PM.

⁴ Ko e hā ʻa e Founga Ke Tau Fakahā ai ʻa e Houngaʻia ki he Huhuʻí?: Ko ʻetau houngaʻia ki he huhuʻí kuo pau ke laka atu ia ʻi he fakamālō pē. ʻOku fiemaʻu ke tau ako ʻo fekauʻaki mo e tokonaki ʻa e ʻOtuá ki he fakamoʻui ʻo fakafou mai ʻia Sīsū Kalaisí. (Sione 17:3) Pea kuo pau ke tau tui ki he huhuʻí. (Ngāue 3:19) ʻI he hili iá, kuo pau ke ueʻi kitautolu ke tau foaki atu kitautolu kia Sihova ko e ʻOtuá ʻaki ʻa e fakatapui mo e papitaiso. (Mātiu 16:24) ʻI heʻetau fakahoko ʻetau fakatapuí, ʻoku totonu ke tau ngāueʻaki lelei ʻa e ngaahi faingamālie kotoa pē ke tala ki he niʻihi kehé ʻo kau ki he tokonaki fakaofo ki he fakamoʻuí ko e huhuʻí.​—Loma 10:10.

⁵ ʻOku ʻikai ke mamaʻo atu ia ʻi he malava ʻa ha tokotaha ʻiate kitautolu ke aʻusia ʻa e ngaahi fiemaʻu ko ʻení. ʻOku fakapapauʻi mai kiate kitautolu ʻe Maika 6:8: “ʻIo, ko e ha ʻa e meʻa ʻoku ʻeke ʻe Sihova kiate koe? Ka ko e fai fakalao, mo e manako ki he mēsi, pea ke taka angavaivai ʻi hoʻo feangai mo ho ʻOtua.” ʻOku meimei tatau pē mo e pehē ʻe Tēvita kia Sihova: “ʻA, ʻoku mei he ʻAfiona ʻa e meʻa kotoa, pea ko hoʻo meʻa pe kuo mau ʻatu.”​—1 Kalonikali 29:14.

⁶ Ki muʻa ʻi he ʻaho Fakamanatú, fēfē ke lau mo fetalanoaʻaki faka-fāmili ʻi he vahe 112 ki he 126 ʻo e tohi ko e Greatest Man ke ʻai ke loloto ange ʻa ʻetau houngaʻia ki he tokonaki fakaofo ʻa Sihová? ʻI he founga ko ʻení, ʻe lava ke tau teuteu fakaefakakaukau hono kotoa ai ke fakahā ʻa e houngaʻia ki he huhuʻí ʻi he Fakamanatu ʻe fai ʻi ʻEpeleli 6, 1993.