Ngaahi Fakamatala Faingofua mo Ola Lelei
1 Naʻe fanongonongo ʻe Sīsū ʻa e Puleʻanga ʻo e ʻOtuá ʻi he founga faingofua mo hangatonu. Naʻá ne ʻiloʻi ko kinautolu ʻoku hangē ha sipí te nau tali lelei ʻi heʻenau fanongo ki he moʻoní. Naʻá ne toe ʻilo ʻoku kehekehe ʻa e anga ʻo e fakakaukau ʻa e kakaí, ko e meʻa ʻoku nau mahuʻingaʻia ki aí, mo e malava ke fakakaukau ʻo maʻu ʻa e mahinó. Ko ia ai, naʻá ne ngāueʻaki ʻa e ngaahi faʻahinga lea kamata faingofua, ngaahi fehuʻi, mo e ngaahi fakatātā kehekehe koeʻuhi ke ne maʻu ʻa e tokanga ʻo ʻene kau fanongó pea mo aʻusia honau lotó. Te tau lava ke faʻifaʻitaki ki heʻene faʻifaʻitakiʻangá mo ngāueleleiʻaki ʻa e ngaahi fakamatala faingofua mo ola lelei.
2 Ngāueʻaki ʻa e Tohi Reasoning Ke Ola Lelei: Ko e ʻuluaki lea kamata ʻi he ʻuluʻi kaveinga ko e “Employment/Housing” (“Ngāue/Nofoʻanga”) ʻi he peesi 11 ʻo e tohi Reasoning ʻoku feʻungamālie mo faingofua ke fai ha fakamatala nounou ki ai.
Te ke lea pehē ni nai:
◼ “Kuo mau talanoa mo homou ngaahi kaungāʻapí ʻo kau ki he meʻa ʻe lava ke fai ke fakapapauʻi ʻe ʻi ai ha ngāueʻanga mo ha fale nofoʻanga ki he tokotaha kotoa pē. ʻOkú ke tui ʻoku fakakaukau lelei ke tau ʻamanekina ʻe fakahoko ʻe he ngaahi puleʻanga fakaetangatá ʻa e meʻa ko ení? . . . Ka ʻoku ʻi ai ʻa e tokotaha ia ʻokú ne ʻilo ʻa e founga ʻoku lava ke fakaleleiʻi ai ʻa e ngaahi palopalema ko ʻení; ko e Tokotaha ia naʻá ne fakatupu ʻa e faʻahinga ʻo e tangatá.” Lau ʻa e tohi ʻAisea 65:21-23. Pea ke toki ʻeke ange ki he tokotaha-ʻapí pe ko e hā haʻane lau ki he meʻa ko iá.
3 ʻE fakamānako ʻa e lea kamata ʻi he ʻuluʻi kaveinga ko e “Injustice/Suffering” (“Fakamaau Taʻetotonu/Mamahi”) ʻi he peesi 12 ki he tokolahi ʻi he ʻahó ni.
Te ke ʻeke ange nai:
◼ “Kuó ke fifili nai: ʻOku tokanga moʻoni mai ʻa e ʻOtuá ʻo kau ki he fakamaau taʻetotonu mo e mamahi kuo hoko ki he faʻahinga ʻo e tangatá?” Tuku ki he tokotaha-ʻapí ke ne tali pea toki lau ʻa e Koheleti 4:1 mo e Sāme 72:12-14. Kapau ʻoku feʻungamālie ke tuʻuaki ʻa e tohi ko e Moʻui Taʻengatá, hukeʻi ki he ngaahi tā fakatātā ʻi he peesi 150-153 pea fakahā taimi nounou ʻoku fakahoko ʻa e kikite ʻa e Tohitapú ʻi he ngaahi tuʻunga ko ia ʻoku ʻi ai ʻa e māmaní he ʻaho ní. Pea toki hukeʻi ki he peesi 161-162 ke fakahā ʻa e meʻa kuo toe kikiteʻi ʻe he ʻOtuá ʻe hoko ko e tāpuaki maʻá e tangatá. ʻEke ange ki he tokotaha-ʻapí pe ko e fē ʻa e tafaʻaki ʻoku hā ngali lelei taha kiate iá.
4 ʻI ha ʻosi ha fetalanoaʻaki taimi nounou mo e tokotaha-ʻapí, te ke fakakaukau nai ʻe feʻungamālie ange ke fakahanga ʻene tokangá ki ha kupu ʻi ha taha ʻo e ngaahi makasiní, ki ha polosiua, pe ko ha tuleki kae ʻikai ki he tohi ko e Moʻui Taʻengatá.
Ko e fakatātā, ʻi he ʻosi hano ngāueʻaki ʻa e lea kamata ʻi he palakalafi 2 ʻo e kupu ko ʻení, te ke lea pehē ni nai:
◼ “ʻOku fakamatala mahino ʻa e kiʻi tohi ko ʻení, ʻOku ʻI Ai Ha ʻOtua ʻOku Tokanga Mai? ki he meʻa kuo talaʻofa ʻe he ʻOtuá ke ne fai ke ne tokangaʻi ʻa ʻetau ngaahi fiemaʻu fakaʻahó pea ʻokú ne fakahā ʻa e founga ʻe lava ke tau maʻu ai ʻa e ʻaonga.” Hukeʻi ki he peesi 28 mo e 29 ʻo e kiʻi tohi, pea fakahanga ʻa e tokangá ki he palakalafi 37.
5 Pe ʻi he ʻosi hono ngāueʻaki ʻa e lea kamata ʻi he palakalafi 3, ʻe lava ke tuʻuaki ʻa e tuleki ʻE Kei Tuʻu ʻa e Māmani ko Ení?
Te ke lea pehē ni nai:
◼ “ʻOku lahi ʻa e loto-mamahi mo e faingataʻaʻia ʻi he māmaní he ʻahó ni. Ko e tuleki ko ʻení ʻokú ne fakahā naʻe kikiteʻi kotoa ʻi he Tohitapú ʻa e ngaahi tau, ʻa e honge, mo e ngaahi palopalema ki he moʻui fakasinó. Ka ʻoku toe talaʻofa ʻe he ʻOtuá te ne hanga ʻo fakahoko mai ha liliu fakaofo ki he faʻahinga ʻo e tangatá.” Lau ʻa e palakalafi fakaʻosi ʻi he peesi 5 ʻo e tulekí.
6 Ko ʻetau mahuʻingaʻia moʻoni ʻi he kakaí, fakataha mo ʻetau ngaahi fakamatala faingofua mo ola lelei ʻa ia ʻoku aʻu ai ki honau lotó, ʻe pau ke fakamānako ia kiate kinautolu ʻoku hangē ha sipí.—Sione 10:16.