Tokoniʻi ʻa e Kau Ako Tohi Tapú ke Teuteu ki Heʻenau Akó
1 Ko e kau ako Tohi Tapu ʻoku nau teuteu ki heʻenau ako he uike taki taha ʻoku nau fakahāhā ʻa e mahuʻinga moʻoni ʻi he akó pea ʻoku faʻa hoko ʻo vave ange ʻenau fakalakalaka fakalaumālié ʻiate kinautolu ʻoku ʻikai ke teuteú. ʻI he taimi ʻe niʻihi ʻoku ʻikai ke teuteu ʻa e toko taha akó koeʻuhi ʻoku ʻikai te ne ʻilo ʻa e founga ke teuteu aí. Ko ia ʻe malava nai ke akoʻi ia ki he founga ʻo e teuteú. ʻE fēfē hono fai ʻa e meʻá ni?
2 Mei he fuofua kamata pē ʻo e akó, vaheʻi ha taimi nounou ke fakapapauʻi ai ʻoku mahino ai ki he toko taha akó ʻoku kau ki he teuteú ʻa e ako fakafoʻituitui. ʻOku toko lahi ʻa e kakai, neongo ʻoku nau malava ʻo lau tohi, ʻoku teʻeki ai ke akoʻi ki ai ʻa e founga ke ako ai. Ko e peesi 33-43 ʻi he Theocratic Ministry School Guidebook ʻokú ne fakahā ʻa e ngaahi fokotuʻu ʻaonga te ke malava ke fakahā ia ki he toko taha akó ʻi he taimi ʻoku fie maʻu aí.
3 Fakahā ki he Toko Taha Akó ʻa e Mahuʻinga ke Akó: Te ke malava ʻo fakahā ki he toko taha akó ʻa hoʻo tohi akó ʻa ia kuo ʻosi fakaʻilongaʻi mo laine ai ʻa e ngaahi lea mo e ngaahi pupunga lea tefito. ʻAi ke ne ʻilo ki he anga ʻo e sio nounou ki he ngaahi konga kuo fakaʻilongaʻí ke fakamanatuʻi kiate ia ʻa e ngaahi fakakaukau ʻa ia te ne malava ke fakahā ia ʻi heʻene lea tonu pē ʻaʻana. Ko ia he ʻikai ai ke ne lau kotoa ʻa e konga ʻi he tohí ko e tali ki he ngaahi fehuʻí. Ko e akoʻi totonu ʻi he tuʻunga ko ʻení ʻe tokoni ia kiate ia ke ne fai ʻa e ngaahi poupou totonu ʻamui ʻi heʻene ʻalu ki he ngaahi fakataha ʻa e fakatahaʻangá. ʻE tapua mai mei heʻene ngaahi poupoú ʻa ʻene houngaʻia ki he konga ko ia ʻoku fai ai ʻa e akó pea fakahā ai ʻa e loloto ʻo e meʻa ʻoku mahino kiate iá.
4 Akoʻi Ia ke Ngāueʻaki ʻa e Tohi Tapú: ʻOku fie maʻu ki he toko taha akó ke ne ako ke ne ʻilo ko e fē ʻa e ngaahi konga Tohi Tapú ʻoku lave ki ai ʻa e kupu ʻoku fai ai ʻa e akó. Pea ʻi heʻene malava ke fai lelei iá, te ne houngaʻia lahi ange ʻi heʻene hoko moʻoni ko e toko taha ako ʻo e Tohi Tapú. Neongo ʻoku ʻuluaki fie maʻu nai kiate ia ke ne ngāueʻaki ʻa e fakahokohoko ʻo e ngaahi tohi ʻo e Tohi Tapú ʻa ia ʻoku hā ʻi he tafaʻaki ki muʻa ʻo e Tohi Tapú, ʻoku totonu ke fakalototoʻaʻi ʻa e toko taha akó ke hoko ʻo maheni mo e fakahokohoko ʻo e ngaahi tohi ʻe 66 ʻo e Tohi Tapú. ʻI heʻene huke ki ha konga tohi peá ne laú, tokoniʻi ia ke ne ʻilo ʻa e konga ʻokú ne poupouʻi ʻa e poini ko ia ʻi he palakalafi ʻa ia ʻoku fai ki ai ʻa e akó kae ʻoua ʻe hehema ki ha konga ʻoku lau ki ha meʻa kehe kae ʻikai ko e meʻa ko ia ʻoku fai ki ai ʻa e akó.
5 ʻI he fakalakalaka ʻa e toko taha akó, fakalotolahiʻi ia ke lau ʻa e Tohi Tapú mei he kamataʻangá ki heʻene ʻosi. Fakamamafaʻi ko e Tohi Tapú kātoa ko e Folofola fakamānavaʻi ʻa e ʻOtuá pea ko e kau Kalisitiane moʻoní kuo pau ke nau hoko ʻo fafangaʻi fakalaumālie ia mei he Tohi Tapú.—Mt. 4:4; 2 Tīm. 3:16, 17.
6 Fakahā ʻa e Ngaahi Maʻuʻanga Fakamatala Kehe Fakateokalati: ʻI he fakalaka ki muʻa feʻunga ʻa e toko taha akó, ʻe lava leva ke ne kamata ke ngāueʻaki ʻa e ngaahi maʻuʻanga fakamatala kehe fakateokalati. Fai ʻi he tokanga moʻoni ʻa hono fakalotolahiʻi ia ke sio ki ha ngaahi fakamatala lahi ange ʻi he ngaahi tohi ʻa e Sosaieté ʻa ia kuó ne hoko ʻo maheni mo ia ʻi heʻene maʻu ʻa e ngaahi fakataha ʻa e fakatahaʻangá. Akoʻi ia ki he anga hono ngāueʻaki ʻo e ngaahi tuʻunga makehe ʻo e New World Translation, hangē ko e “Bible Words Indexed.” Pea ʻi he kamata ke ʻi ai haʻane tukuʻanga tohi fakateokalati ʻaʻana, fakahā kiate ia ʻa e anga hono ngāueʻaki ʻa e Comprehensive Concordance, Reasoning From the Scriptures, ko e Index, mo e ongo voliume ʻo e Insight.
7 Kapau te tau akoʻi ʻa e kau ako Tohi Tapú ki he anga ʻo e teuteu ki he ako Tohi Tapú, ʻoku tau teuteuʻi ai kinautolu ke nau hokohoko atu ʻenau fakalakalaka ʻi he moʻoní ke hoko ko e kau ako Tohi Tapu alafua neongo ʻe aʻu ʻo ngata ʻa e ako ʻoku fai mo iá.