Tokoniʻi ʻa e Niʻihi Kehé ke Nau Houngaʻia ʻi he Lahi ʻo e Mahuʻinga ʻo ʻEtau Ngaahi Tohí
1 “He ko e folofola ʻa e ʻOtua, ko e koto moʻui mo e koto malohi.” (Hep. 4:12) Koeʻuhi ʻoku tokoni ʻetau ngaahi tohi ʻoku fakatuʻunga mei he Tohi Tapú ki he kakaí ke nau maʻu ʻa e ʻaonga mei he mālohi ʻo e Folofola ʻa e ʻOtuá, ʻoku tau ngāueʻaki ia ke langaʻi hake ʻa e fie ʻilo ki he Tohi Tapú ʻi heʻetau fai fakamoʻoni ʻikai ʻi he founga mahení pe ʻi he ʻaʻahi mei he fale ki he falé.
2 Ko e tohi ke tuʻuaki ʻi Sānualí ko e kiʻi tohi ko e ʻOku ʻI Ai Ha ʻOtua ʻOku Tokanga Mai? Teuteu hoʻo fakamatala ʻo kau ki he pōpoaki fekauʻaki mo e Puleʻangá ke taki atu ki ha meʻa mahuʻinga ʻi he kiʻi tohi ʻokú ke ngāueʻakí. ʻE lava fēfē ke fai ʻa e meʻá ni?
3 Ko e Founga ke Teuteu Aí: ʻI he kamatá, filifili ha fakamatala mei he kiʻi tohí te ke ngāueʻakí ʻa ia ʻe fakamānako nai ki he kakai loto-totonu ʻi ho kauhalá. Ko e meʻa hono hokó, fakakaukau ki ha meʻa ʻoku lolotonga hoko pe ko ha meʻa ʻoku mahuʻingaʻia ki ai ʻa e tokolahi ʻa ia te ke malava nai ke talanoa nounou ki ai mo e toko taha ʻapí ki muʻa pea te ke fakahanga ʻene tokangá ki he fakamatala kuo pulusi kuó ke ʻosi filí. Mahalo pē ʻoku ʻi ai ha konga Tohi Tapu ʻoku hā ai ka ʻikai ke hiki fakaʻāuliliki pe ha konga Tohi Tapu ʻoku hā ai kuo hiki fakaʻāuliliki mai pea te ke malava ʻo lau, mei he Tohi Tapú pe lau hangatonu mei he kiʻi tohí ke poupouʻi hoʻo fakamatalá. Kapau ʻoku fie fanongo moʻoni ʻa e toko taha ʻapí, te ke loto nai ke tuʻuaki ʻa e kiʻi tohí. ʻI he taimi ko iá pe ʻamui ange kapau ʻoku feʻunga ange, fakamatalaʻi nounou ʻa e founga hono tokoniʻi fakapaʻanga ʻa e ngāue fakamalangá ʻi māmani lahí, pea tuku ha faingamālie ki he toko taha ʻapí ke ne fai ha tokoni ʻo ka ne loto ki ai. ʻI ha taha pē ʻo e ongo tuʻungá, feinga ke langaʻi ha fehuʻi pe ko ha fakakaukau te ke lava ke ngāueʻaki ke fakatuʻunga ai ha toe ʻaʻahi.
4 Fēfē ke ke teuteu ki ha ngaahi fetalanoaʻaki mo e kau talavou ʻokú ke fetaulaki mo ia ʻi he ngaahi kauhalá? Ko e tokolahi ʻo kinautolu ʻoku nau kamata ke ʻeke ha ngaahi fehuʻi hangē ko ia ʻoku ʻasi ʻi he takafi ʻo e kiʻi tohi ko ia ko e ʻOtua ʻOku Tokanga Mai. Fakalototoʻaʻi kinautolu ke nau lau ʻa e kiʻi tohí. Te ke lava ʻo ngāueʻaki ʻa e founga ko ʻena ʻoku fakahā ʻi ʻolungá pea mo teuteu ke fai ha fetalanoaʻaki ʻi ha ngaahi tokāteline tefito fakatuʻunga ʻi he Tohi Tapú ʻa ia ʻoku lave ki ai ʻi he kiʻi tohi mātuʻaki lelei ko eni ʻi he tokoni ki hono ako ʻo e Tohi Tapú.
5 Tuʻuaki ʻa e kiʻi tohi ko e ʻOtua ʻOku Tokanga Mai: Te ke malava nai ke kamata ha fetalanoaʻaki ʻi hono fakahanga ʻa e tokangá ki ha ongoongo ʻa ia ʻokú ne fakaeʻa ʻa e niʻihi ʻo e ngaahi meʻa taʻe faitotonu ʻi māmaní pe ko ha niʻihi ʻo e ngaahi palōpalema ʻoku lolotonga hoko ki he kakaí.
Pea ʻekeʻi ha fehuʻi, hangē ko ʻení:
◼ “Ko e hā hoʻo fakakaukau ki he ʻuhinga ʻoku hoko ai ʻa e faʻahinga meʻa ko ʻení ki he kakaí naʻa mo kinautolu kakai lotú? [Tuku ke ne tali.] Te ke ʻohovale ʻi haʻo ʻilo ko e ngaahi akonaki tefito ʻo e ngaahi lotu lahi ʻoku nau meimei tatau pē pea ʻoku nau mātuʻaki kehe mei he ngaahi akonaki ʻa e Tohi Tapú?” Kapau ʻe fie fanongo ʻa e toko taha ʻapí, fakahā ki ai ʻa e ngaahi fakatātā ʻi he peesi 6 mo e 7 ʻo e kiʻi tohí, pea fakamatalaʻi nounou kiate ia ʻoku ʻikai ko e ʻOtuá ke tukuakiʻi ki he ngaahi tuʻunga ko iá. Fakahā ki ai te ne malava ke maʻu ha ʻaonga ʻi heʻene ako ke ʻilo pe ko e hā ʻoku fakangofua ai ʻe he ʻOtuá ʻa e mamahi lahi pehē fau ʻi he ngaahi laui taʻu.
6 ʻI ha taimi ʻe niʻihi ʻe lelei ange nai ke tuʻuaki ha ngaahi makasini pe ko ha tuleki. ʻOku ʻi ai ʻa e ʻuhinga lahi ke tau loto-māfana mo faivelenga ʻi hono fakalototoʻaʻi ʻa e niʻihi kehé ke nau lau ʻa e kiʻi tohí ni ke nau malava ke hokosia kiate kinautolu ʻa e mālohi ʻo e Folofola ʻa e ʻOtuá ʻi heʻenau moʻuí ʻaki haʻanau tali lelei ʻa ʻene tatakí.