Faifakamoʻoni ki he “Kakai Kotoa Pe”
1 ʻI he taimi ʻoku tau feʻiloaki ai mo e kakai ʻo e ngaahi ʻātakai fakafonua mo lotu kehekehé, ʻoku tau manatuʻi ko e finangalo ia ʻo Sihová “ke maʻu moʻui ʻe he kakai kotoa pe, pea ke nau aʻusia ʻa e ʻilo kanokano ki he moʻoni.” (1 Tim. 2:4) Tānaki atu ki ha ngaahi tuleki mo e ngaahi polosiua lahi kuo teuteuʻi makehe, ʻoku tau maʻu ha ongo tohi lelei ʻe ua ʻoku lava ke ngāueʻaki ʻi ha taimi ke tokoniʻi ʻa e faʻahinga tāutaha ʻa ia ko ʻenau lotú kuo ʻikai akoʻi ai kiate kinautolu ʻa e moʻoni fekauʻaki mo e ʻOtuá.
2 ʻOku mahuʻingaʻia tatau pē ʻa e kau Kalisitiané mo e ʻikai Kalisitiané ʻi hono maʻu ha moʻui fakafāmili fiefia. ʻI hono fakaeʻa ʻa e founga ke maʻu ai ʻení, ʻoku lava ke tokoniʻi ha taha ʻe he tohi Ko Hono ʻAi Hoʻo Moʻui Fakafāmilí ke Fiefia ke ne sio ki he ʻaonga ʻo e Folofola ʻa e ʻOtuá pea ueʻi ai ke ne vakaiʻi lahi ange ia. ʻI he tafaʻaki ʻe tahá, ko e tohi Mankind’s Search for God ʻokú ne ʻomai ʻa e fakamaama ki he tupuʻanga ʻo e ngaahi lotu lahi ʻo e māmaní pea ʻoku lava foki ke tokoni ki he kakai ʻi he feituʻu kotoa pē ʻi hono fakafehoanaki ʻa ʻenau ngaahi tuí pea mo e meʻa ʻoku akoʻi ʻe he Tohitapú fekauʻaki mo e ʻOtua moʻoni pē tahá. ʻI he māhiná ni te tau fakaeʻa ai ʻa e tohi Moʻui Fakafāmilí, ka ʻo kapau ʻoku tau feʻiloaki mo ha kakai ʻoku nau lava ʻo lautohi faka-Pilitānia pea ʻoku nau kau ki ha ngaahi lotu ʻikai Kalisitiane, ʻoku tau saiʻia nai ke fakahā ange kiate kinautolu ʻa e tohi Search. Ko e ngaahi meʻa ʻoku hoko haké ko e fokotuʻu ia ʻe niʻihi ki hono fakaʻaliʻali ʻa e ongo tohi ko ʻení.
3 ʻI hono tuʻuaki ʻa e tohi “Moʻui Fakafāmilí,” te ke ʻeke nai:
◼ “Ko e hā ʻokú ke ongoʻi ʻe lava ke tokoni ki he kakaí ke nau maʻu ha fiefia lahi ange ʻi heʻenau moʻui fakafāmilí? [Tuku ke nau tali.] ʻIkai ʻokú ke loto-tatau ʻe ʻaonga ke tau fanongo ki he meʻa ʻoku leaʻaki ʻe he Tokotaha-Fakatupu ʻo e fāmilí? ʻOkú ne fokotuʻu ʻa e ngaahi tataki ʻoku fiemaʻú ʻi he Tohitapú. Ko e ngaahi tefitoʻi moʻoni ko ʻení ʻoku fakamatalaʻi ia ʻi he tohi ko ʻení ko e Ko Hono ʻAi Hoʻo Moʻui Fakafāmilí ke Fiefia. Fakatokangaʻi ʻa e ngaahi tafaʻaki ʻo e tuʻunga-leá ʻoku fakamatalaʻí. [Fakahā ange ʻa e fakahokohoko ʻo e ngaahi meʻa ʻi lotó.] ʻOku toe ʻomai ʻe he tohí ʻa e fakaleleiʻanga tuʻuloa ki he ngaahi palopalema ʻo e faʻahinga ʻo e tangatá. ʻOku ʻikai ha veiveiua ʻokú ke lotu fekauʻaki mo ia. ʻOkú ke maheni mo e Lotu ʻa e ʻEikí, ʻikai ko ia? [Lave ki he Mātiu 6:9, 10.] Ko e finangalo ia ʻo e ʻOtuá ke toʻo atu ʻe hono Puleʻangá ʻa e kotoa ʻo e anga-fulikivanú mei he foʻi māmani ko ʻení. Ko e vahe fakaʻosi ʻo e tohi ko ʻení ʻokú ne fakahaaʻi ai ʻa e founga ʻe maʻu ai ʻa e ʻaongá ʻe he moʻui fakafāmili ʻa e tokotaha kotoa pē ʻoku fakafalala ʻenau tuí ʻi he Puleʻanga ʻo e ʻOtuá.” Tuʻuaki ʻa e tohí, pea fakamatalaʻi ange te ke saiʻia ke toe foki atu pea fakamatalaʻi fakataha mo e fāmilí fakalūkufua ha ngaahi poini pau ʻe niʻihi ʻe tokoni kiate kinautolu ke maʻu ai ʻa e fiefia lahi angé.
4 ʻI he toe ʻaʻahí te ke pehē:
◼ “Naʻá ku palōmesi atu te u toe foki mai ke fakamatalaʻi fakataha mo koe pea mo e fāmilí ha fakamatala ʻe niʻihi ʻe tokoni ki he fāmilí ke maʻu ai ha fiefia ʻoku lahi angé.” Fakahā ange ʻa e polosiua Fiemaʻu pea ngāueʻaki ʻa e Lēsoni 8, “Moʻui Fakafāmili ʻOku Fakahōifua ki he ʻOtuá,” fakahāhaaʻi ha ako. Kapau ʻoku saiʻia ai, te ke ngāueʻaki nai ʻa e tohi ʻIlo, fakaeʻa ʻa e Vahe 15, “Ko Hono Faʻu ha Fāmili ʻOku Fakalāngilangiʻi Ai ʻa e ʻOtuá.”
5 Ka ʻoku feʻungamālie ke tuʻuaki ʻa e tohi “Mankind’s Search for God,” te ke lava ʻo ʻeke:
◼ “Koeʻuhi ko e fuʻu lahi ʻa e ngaahi lotu kehekehe ʻi he ʻaho ní, kuó ke fifili ki ha founga te tau lava ai ke fakapapauʻi pe ko fē ʻa e taha ʻoku hōifua ki ai ʻa e ʻOtuá?” ʻI he hili ha tali, fakaava ʻa e tohi Mankind’s Search for God ki he peesi 377. Fakamatalaʻi ʻa e poini fika 7, pea ʻeke kapau ʻoku loto-tatau ʻa e tokotaha-ʻapí ko e lotu moʻoní ʻoku totonu ke ne fakafāʻūtahaʻi ʻa e kotoa ʻo e ngaahi matakali ʻo e faʻahinga ʻo e tangatá. Sio ki ha taha ʻo e ngaahi konga Tohitapu ʻoku lave ki aí, pea fakatatau ki he taimí, fakamatala ki ha niʻihi ʻo e ngaahi poini kehe ʻi he fakahokohokó. Kapau ʻoku ʻi ai ha mahuʻingaʻia moʻoni, tuʻuaki ʻa e tohí. ʻI hoʻo mavahé, te ke ʻeke ange, “ʻOku totonu ke fēfē hono ueʻi ʻe he lotu moʻoní ha ʻulungaanga ʻo ha tokotaha?” Fokotuʻutuʻu ki ha toe ʻaʻahi ke tali ʻa e fehuʻí.
6 Ngaahi Kamataʻanga ʻo e Fetalanoaʻakí: ʻOku ʻi ai ʻa e ngaahi tokoni fakafaiako lahi ʻi he tohi Mankind’s Search for God ʻe ngāueʻaki nai ko e ngaahi kamataʻanga ʻo e fetalanoaʻaki ʻi he ʻuluaki ʻaʻahí pe toe ʻaʻahí. ʻOku lava ke ke kamata ha fetalanoaʻaki faingofua ʻaki hono ʻeke ha fehuʻi feʻungamālie. Ko e fakatātaá, fakatokangaʻi ʻa e ngaahi fehuʻi mo e ngaahi tuʻunga-lea ko ʻení pea mo e ngaahi peesi ʻa ia ʻoku nau ʻi aí:
“Ngaahi Fehuʻi ʻOku Fiemaʻu ki Ai ha Tali”—peesi 17-18.
“Ko Sīsuú ko ha Talatupuʻa Pē?”—peesi 237.
“Ko Hai Naʻá Ne Tohi ʻa e Tohitapú?”—peesi 241.
“Ko e Kōlaní pea mo e Tohitapú”—peesi 285.
“Fakamoʻoni ʻo e Moʻoni ʻa e Tohitapú”—peesi 340-341.
“Ko e Meʻa ʻOku Tui ki Ai ʻa e Kau Fakamoʻoni ʻa Sihová”—peesi 356-357.
“Founga ke ʻIlo Fakapapau Ai ʻa e Lotu Moʻoni”—peesi 377.
7 ʻE lava ke ke huke ki he ngaahi peesi kuo fili ʻi he tohi Mankind’s Search for God pea fakamatalaʻi ʻa e poini ʻoku fakamatalaʻi aí. Pea fokotuʻutuʻu ha toe ʻaʻahi ʻaki hono ʻeke ha fehuʻi felāveʻi mo ia ʻa ia ʻe tali mei he polosiua Fiemaʻu pe ko e tohi ʻIlo. Fakapapauʻi ke fakaafeʻi ʻa e tokotaha-ʻapí ki he Fakataha maʻá e Kakaí pea tuku ai ha lauʻi pepa tuʻuaki. ʻOange ha faingamālie ki he tokotaha tāutaha ke tokoni ki heʻetau ngāué, mahalo pē ʻaki hoʻo pehē, “ʻOku saiʻia ʻa e niʻihi ke fai ha tokoni siʻisiʻi ki heʻemau ngāue ʻi māmani lahí.”
8 Ko e faʻahinga kakai loto-totonu kotoa pē ʻoku nau kumi ki he moʻoni fekauʻaki mo e ʻOtuá mo Kalaisi. ʻOku lava ke tau tokoniʻi kinautolu ʻi heʻetau ngāue fakaefakamoʻoní. Ko ia ai, ʻai ke tau hanganaki “fakafitefitaʻa ki ai mo tau, koeʻuhi kuo tuʻu ʻetau falala ki he ʻOtua Moʻui, ʻa ia ko e Fakamoʻui ʻo e kakai kotoa pe.”—1 Tim. 4:10.