Tuʻuaki Atu ʻa e Tohi ko e Young People Ask
1 Neongo ko e tohi Moʻui Taʻengatá ʻoku lolotonga tuʻuaki atu ʻi he māhina ko ʻení, te ke fili nai ke tuʻuaki atu ʻa e tohi ko e Young People Ask ʻo kapau ko hoʻo lea ki ha taha ʻo e ongo mātuʻá pe ko ha talavou ʻokú ne loto-hohaʻa ʻo fekauʻaki mo e ngaahi palōpalema ʻoku nau fakapuputuʻuʻi ʻa e kau talavoú.
2 Te ke ʻilo nai ʻoku feʻunga mālie ke lea pehē ni:
◼ “Ko e tupu hake ʻi he ngaahi taimi faingataʻá ni ʻoku ʻikai faingofua. ʻOku fehangahangai ʻa e kau talavoú mo e ngaahi tuʻunga foʻou ʻoku fie maʻu ai kiate kinautolu ke nau fai ha ngaahi fili ʻoku mahuʻingá. ‘ʻOku totonu ke u inu ʻolokaholo? Ke ngāueʻaki ʻa e faitoʻo kona tapú? Ko e hā ʻa e ʻulungāanga ʻoku totonu ʻi he feangai mo ha fefine pe ko ha tangata?’ ʻI he taimi ʻoku ʻeke ai ʻe he kau talavoú ʻo fekauʻaki mo e ngaahi tuʻunga tefito ko ʻení, ʻoku faʻa lōmekina kinautolu ʻaki ha ngaahi tali kehekehe ʻoku fepaki. ʻOkú ke fakakaukau ʻe hanga ʻa e tokolahi ʻo kinautolu ʻo kumi faleʻi mei fē? [Tuku ke ne tali.] Ko e tohi ko ʻení, Questions Young People Ask—Answers That Work, ʻokú ne fakahā mai ha fakamatala ʻe tokoni. [Fakahanga ʻa e tokangá ki he fakahokohoko ʻo e ngaahi meʻa ʻoku ʻi lotó, ʻo fakahā ʻa e kehekehe ʻo e ngaahi kaveinga ʻoku fakamatalaʻi aí.] ʻOku fie maʻu ki he kau talavoú ha ngaahi tali ʻoku fakahangatonu mo ʻaonga ʻi hono ngāueʻaki iá. Ko e ngaahi tali ʻi he tohi ko ʻení ʻoku poupouʻi ia ʻaki ʻa e lau ʻa e Tohi Tapú.”
3 Ko e toe tuʻuaki ʻeni ʻe taha ʻe lava nai ke ke ngāueʻaki:
◼ “ʻOku tofanga ʻa e kau talavoú mo e ngaahi mafasia lahi ʻi he ʻahó ni. ʻOku fie maʻu kiate kinautolu ha tokoni ke nau lavameʻa ʻi he fekuki mo iá. ʻI heʻetau feinga ʻi he lelei taha ke tau tokoni kiate kinautolú, ʻikai ʻoku tau fekumi ki ha meʻa te ne fakahoko mai ʻa e tataki ʻoku ʻaongá? [Tuku ke ne tali.] Ko e niʻihi ʻo e ngaahi mafasia lahi tahá ʻoku fakahoko mai ia ʻe he kau talavou kehé, ʻe honau toʻu meʻá. Fakatokangaʻi ʻa e ngaahi fakatātā ʻi he peesi 76 mo e 77 ʻi he tohí ni. [Fakahanga ʻa e tokangá ki he ngaahi fakamatala ki he ngaahi fakatātā ko ʻení pea pehē ki he ngaahi palakalafi ʻoku hiki mataʻitohi fakaʻītali ʻi he peesi 77.] Ko e ngaahi peesi hoko mai ʻi he vahe ko ʻení ʻoku fakaeʻa ai ʻa e ngaahi tali totonu mo ʻaonga.”
4 ʻOku moʻoni ko e “ngaahi taimi faingataʻa” eni, tautefito ki he kau talavoú. (2 Tīm. 3:1) Ko e tohi ko ʻeni ko e Young People Ask ʻoku tokoni moʻoni ia ki ha toko taha kei talavou ke ne lavameʻa ʻi he fekuki mo e ngaahi faingataʻa ʻi he ʻaho ní. ʻOku ʻi ai ʻa e ngaahi fakatātā lelei ʻaupito ʻi he ngaahi vahe ʻe 39, pea ʻoku hā ʻa e meʻa moʻoni mo ʻaonga ʻi hono ngāueʻakí ʻi he ngaahi kupu ʻi aí. Ko ia ʻi ha taimi pē ʻoku malanga hake ai ha faʻahinga faingamālie, ʻai ke tokanga ke ngāueʻaki ʻa e tohi lelei ní.