Fakalotoʻi ke Nau Hoko ko Hono Kau Muimui
1 Naʻe tohi ʻe Paula ʻi he 1 Kolinitō 3:6: “Naʻe aʻaku ʻa e to, naʻe ʻa Apolosi ʻa e fakaviviku; kae ʻa e ʻOtua ai pe ʻa e fakatupu.” Naʻe ngāueʻaki ʻe Paula ʻa e ʻuhinga ko ʻení ke tokoni ki hono ngaahi tokouá ke nau ʻilo ʻa e fiemaʻu ʻo e ngāue fāʻūtaha ʻi he tuʻunga-ʻulu ʻo Kalaisí. ʻI he founga ko ʻení naʻá ne toe tokoniʻi ai kinautolu ke nau houngaʻia ki he konga mahuʻinga ʻoku nau kau ai ʻi he toó mo e fakavivikú.
2 Ko e ngāue fakahaofi moʻui ko iá ʻoku vavé ni hano fakangata ia. ʻI hotau tuʻunga ko e kau Kalisitiane kuo ʻosi fakatapuí, ʻoku tau kau ai ki he fatongia mamafa ko hono tokoniʻi ʻa e niʻihi kehé ke nau hoko ko e kau muimui ʻo Kalaisi. (Ng. 13:48) ʻE anga-fēfē haʻo toe ʻaʻahi ki ha tokotaha fiefanongo ʻo malava ai ke fakaʻaiʻai ia ʻi hano ngāueʻaki ʻa e Ko ʻEku Tohi ʻo e Ngaahi Talanoa Faka-Tohitapú?
3 Kapau ko hoʻo toe ʻaʻahí ki ha tokotaha naʻá ne tali ʻa e tohí, te ke pehē nai:
◼ “ʻI heʻeta talanoa fakamuimuí, naʻá ta talanoa ai ʻo fekauʻaki mo e ngaahi meʻa naʻe fai ʻe Sīsū ʻi he lolotonga ʻo ʻene ʻi he māmaní naʻe hā mei ai ʻokú ne tokanga moʻoni mai ʻo fekauʻaki mo kitautolu. Ko e hā ʻokú ke fakakaukau te ne fai leva ke fakafiemālieʻi ʻa e faʻahinga ʻoku fuʻu faingataʻaʻiá?” Tuku ke ne tali. Huke ki he talanoa 115, pea toe lau ʻa e ngaahi fakamatala ʻi he palakalafi hono tolú. Fakahanga ʻa e tokangá ki he fakatātā ʻi he peesi ko iá, pea fakamatala ki he tuʻunga ʻe ʻi aí ʻi hono fai ʻa e finangalo ʻo e ʻOtuá ʻi he māmaní ʻo hangē ko ia ʻi hēvaní. Fakahā ʻa e ngaahi ʻaonga ʻe maʻu ʻi ha ako ke toe lahi ange.
4 Kapau naʻe ʻikai ke ʻi ai ha fiefanongo feʻunga ke tuku ai ʻa e tohí ki muʻa, ʻe lava nai ke ke kamata ʻa e fetalanoaʻakí ʻo pehē:
◼ “ʻOku ou fakakaukau ʻoku tatau ʻa ʻeta fakakaukaú ko e kakai tokolahi ʻi he ʻahó ni ʻoku ʻikai te nau fakakaukau ʻo fekauʻaki mo e meʻa ʻoku fai ʻe Sīsū ʻi he taimi ní. Ka ʻokú ke ʻilo ʻoku teuteú ni ʻa Sīsū ke fakaʻauha atu ʻa e anga-fulikivanu kotoa pē mei he māmaní? [Huke ki he talanoa 114 ʻi he tohi ʻo e Ngaahi Talanoa Faka-Tohitapú, pea fakahanga ʻa e tokangá ki he meʻa ʻoku ʻamanaki ke fai ʻe Sīsū ʻi he kahaʻu ofi maí.] ʻOku fakamanatu mālohi mai ʻe he meʻá ni ʻa e meʻa ʻoku leaʻaki ʻi he Tohi Tapú ʻi he tohi Fakahā 16:16. Ta lau ange iá.” Kapau ʻoku ngali fiefanongo lahi ange, tuku atu ʻa e tohí pe ko e kiʻi tohi ʻOku ʻI Ai Ha ʻOtua ʻOku Tokanga Mai?
5 Pe te ke saiʻia nai ke ʻahiʻahi ʻa e lea fakahangatonu ko ʻení:
◼ “ʻI heʻeku ʻi heni fakamuimuí, naʻá ta fetalanoaʻaki ai ki he mahuʻinga ʻo e maʻu ʻo e ʻilo ʻo fekauʻaki mo Sīsuú. ʻOku pehē ʻi he Sione 17:3 ʻe ‘maʻu ʻa e moʻui taʻengata’ mei he maʻu ʻo e ʻilo peheé. ʻOku lava fēfē ke tau fai ʻa e meʻa ko iá?” Tuku ke ne tali. Hoko atu ʻaki hano fakamatalaʻi ʻa ʻetau fokotuʻutuʻu ki he ako Tohi Tapú pea mo e founga ke maʻu ai ha ʻaonga mei ai.
6 ʻOku pehē ʻe Paula ko ha tokotaha ngāue ʻi he ututaʻú “e taki taha maʻu ene totogi aana, o fakatatau ki he ene gaue.” (1 Kol. 3:8, PM) Kapau ʻoku tau fai longomoʻui ʻa e tokoni ki ha niʻihi kehé ke nau hoko ko e kau muimui ʻo Sīsuú, ko e moʻoni ʻe lahi ʻa hotau palé.