Ko e Hā ʻa e Ngaahi Kolo ʻOkú Ke Fokotuʻu ki Hoʻo Fānaú?
1 ʻOku fakatuʻunga ʻa e lavameʻa ʻi he moʻuí ʻi hono fokotuʻu mo fakahoko ha ngaahi kolo ʻaonga. Ko kinautolu ʻoku tulimui ki he ngaahi kolo taʻeʻaonga pe ʻikai ʻi ai hano moʻoní ʻoku nau iku ki he loto-mamahi mo e taʻefiemālie. ʻOku fiemaʻu ʻa e potó ke ʻilo ai pe ko fē ʻa e ngaahi taumuʻa ke tulimui ki ai kae lava ke “puke ki he moʻui moʻoni.” (1 Tīm. 6:19) He fakamalō lahi ē ka ko kitautolu kia Sihova, ʻi heʻene fakahā mai ʻa e hala tofu pē ko ia ke tau fou aí, ʻo fakafou mai ʻi heʻene Folofolá mo ʻene kautahá!—ʻAi. 30:21.
2 ʻI hono tokonaki mai ʻa e tataki anga-ʻofa peheé, ʻoku fokotuʻu ai ʻe Sihova ha faʻifaʻitakiʻanga lelei ki he ngaahi mātuʻá. ʻI he ʻikai ke tuku pē ki heʻenau fānau taʻetaukeí ke nau fili pe ko fē ʻa e hala ʻoku lelei tahá, ko e ngaahi mātuʻa fakapotopotó ʻoku nau fakahinohino kinautolu ki he hala ʻoku totonu ke nau fou aí, pea ʻi heʻenau tupu ʻo motuʻá, ‘ʻe ʻikai te nau hiki mei ai.’ (Pal. 22:6) Ko e ngaahi mātuʻa Kalisitiané ʻoku nau ʻiloʻi mei heʻenau fakataukeí ʻoku ʻikai lava ke nau falala ki he fakafuofua pē ʻanautolú; ka kuo pau ke nau falala kia Sihova. (Pal. 3:5, 6) ʻOku toe lahi ange ʻa e fiemaʻu ia ko ʻení ki he fānaú, ʻa ē ʻoku fakangatangata pē ʻenau ʻiló pea mo e taukeí.
3 ʻE lava ke fokotuʻu ʻe he ngaahi mātuʻá ʻa e ngaahi kolo ʻaonga ki heʻenau fānaú ʻa ia ʻe tokoniʻi ai kinautolu ke hanga ki he “ngaahi meʻa ʻoku lelei lahi.” (Fili. 1:10) ʻE lava ke nau kamata ʻi he ako fakafāmilí, ʻi hono fakalototoʻaʻi ʻa e fānaú ke nau houngaʻia ʻi hono mahuʻingá pea ke nau ako mei ai. ʻOku lelei ke maʻu ʻe he fānaú ʻa e tōʻongaʻaki ke ako ki muʻa ki he ngaahi fakataha ʻa e fakatahaʻangá pea teuteu ke fai ha ngaahi tali ʻi he lea pē ʻanautolú. Ko ha kau maʻu pē ʻi he ngāue fakamalangá ʻoku mahuʻinga. ʻE lava ke tokoni ʻa e fānau iikí ʻi hono tuʻuaki ʻo e ngaahi tulekí, lau ʻa e ngaahi konga Tohitapú, pe ko e tuʻuaki ʻo e ngaahi makasiní. ʻI he taimi ʻoku nau malava ai ke lautohí, ko hono fakahū ki he Ako Fakafaifekau Fakateokalatí ʻe lava ke vave ai ʻa ʻenau fakalakalaka fakalaumālié. Ko e taau ke hoko ʻo malanga teʻeki papitaisó pe ko hono tali ke hoko ʻo papitaisó ko ha laka ki muʻa mahuʻinga ia.
4 ʻI he fakaofiofi ʻa ʻenau fānaú ki honau taʻu hongofulu tupú, pe ki muʻa ange ai, ʻoku totonu ki he ngaahi mātuʻá ke nau talanoa moʻoni kiate kinautolu ʻo fekauʻaki mo e ngaahi kolo ki he ngāué. ʻOku lava pē ke faingofua ʻa hono tākiekina kinautolu ʻe he kau faleʻi mo e kaungāako ʻi he akoʻangá ke nau manako ʻi he tulimui ki he ngaahi meʻa fakamātelie fakamāmaní. ʻOku totonu ki he ngaahi mātuʻá ke nau tokoniʻi ʻa ʻenau fānaú ke fili ʻa e ngaahi lēsoni fakaako ʻoku ʻomai ai ʻa e poto ʻaongá, ʻi hono teuʻi kinautolu ke tokangaʻi ʻa ʻenau ngaahi fiemaʻu fakamatelié kae ʻikai liʻaki ai ʻa e ngaahi meʻa mahuʻinga ʻo e Puleʻangá. (1 Tīm. 6:6-10) ʻE lava ke fakalototoʻaʻi kinautolu ke tulimui ki he “meʻaʻofa” ʻo e nofo taʻemalí, pea ki mui mai leva, kapau ʻoku nau fakapapauʻi ke mali, te nau hoko ai ʻo ʻi ha tuʻunga ke fua ʻa e ngaahi fatongia mamafa ʻi he nofo malí. (Mt. 19:10, 11, NW; 1 Kol. 7:36-38) Ko e leaʻaki ʻi ha founga papau fekauʻaki mo e tāimuʻá, ngāue ʻi he feituʻu ʻoku ʻi ai ʻa e fiemaʻu lahi angé, ngāue Pēteli, pe ngāue fakamisinalé, ʻoku lava ke ne fakahūhū ki he fānaú neongo ʻa ʻenau kei taʻu siʻí ha holi ke ngāueʻaki ʻa ʻenau moʻuí ʻi ha founga ʻe fakahōifuaʻi ai ʻa Sihová, maʻu ai ʻa e ngaahi ʻaonga ʻe he niʻihi kehé, pea ʻomai ai kiate kinautolu ʻa e ngaahi tāpuaki.
5 Naʻe ʻikai ke hoko noa mai pē ʻa ʻetau maʻu ʻi he kautahá ʻa e kau talavou tokolahi ʻi he ʻahó ni ʻoku nau piki ki he ngaahi tuʻunga lelei faka-Kalisitiané pea tulimui ki he ngaahi kolo fakateokalatí. Ko e konga lahi ʻo ʻenau lavameʻá ʻoku lava ke pehē ko e ngāue ia ʻa e ngaahi mātuʻa anga-ʻofa. Kapau ko e mātuʻa koe, ʻoku ngalingali ʻoku huʻu ki fē ʻa hoʻo fānaú? ʻOku nau ngaʻunu fakalakalaka ki muʻa ki ha moʻui ʻoku fakahangataha ki he ngaahi meʻa mahuʻinga ʻo e Puleʻangá? Manatuʻi, ko e taha ʻi he ngaahi meʻa mahuʻinga taha ʻe lava ke ke faí ko hono faʻa akonakiʻi ʻa e moʻoní ki hoʻo fānaú, pea lea fekauʻaki mo ia ʻi he ʻaho kotoa pē. ʻE tāpuakiʻi nai ai koe ʻaki ha fāmili ʻoku nau anga-tonu ʻi hono tauhi ʻo Sihová.—Teu. 6:6, 7; Siōs. 24:15.