Ko e Teuteú—Ko e Kī ki he Lavameʻá
1 Ko e teuteu ki muʻa ki he ngāue fakafaifekaú te ne tokoniʻi kita ke lavaʻi nai ʻete ongoʻi tetekí ke kau ki he ngāue fakamalangá. ʻI hoʻo fakaofiofi atu ki he matapá, kuó ke ʻilo ʻa e meʻa ʻokú ke fiemaʻu ke leaʻaki ki he tokotaha-ʻapí. ʻE ʻikai te ke hoko ʻo manavasiʻi ʻo kau ki ha ngaahi tuʻunga faingataʻa ʻa ia te ke fepaki nai mo ia. ʻI hoʻo foki ki ʻapi mei he ngāue fakamalangá, te ke ongoʻi loto-toʻa ange, ʻi hono ʻiloʻi naʻá ke fai ha feinga lelei ʻi he ngāue fakafaifekaú. ʻIo, ko e teuteu fakamākukangá ko e kī ia ki hono fakamasilaʻi ʻetau malangá pea mo e pōtoʻi fakafaiakó.
2 Naʻe fakamamafaʻi ʻe Paula ʻa e teuteú ʻaki hono enginakiʻi kitautolu ke “topuvaʻe ʻaki ʻa e ʻosi teuteu mei he Kosipeli fakamelino.” (ʻEf. 6:15) ʻOku kau ai hono teuteuʻi hotau ʻatamaí pea mo e lotó pehē foki ke pau ʻete vakaí pea maʻu mo ha fakakaukau loto-fiefai. ʻI he taimi ʻoku tau mateuteu ai ke fakahā atu ʻa e moʻoní ki he niʻihi kehé, ʻe fakapaleʻi ʻetau ngāué ʻaki ʻa e fua ʻo e Puleʻangá, ʻo tau fiefia ai.—Ng. 20:35.
3 Founga ke Teuteu Ai ki he Ngāue Fakamalangá: ʻOku totonu ke tau fili ha tuʻuaki ʻa ia te tau ongoʻi fiemālie ange ai, mahalo pē mei he niʻihi ʻoku fokotuʻu mai ʻi he tohi Reasoning pe ko e niʻihi ʻoku ʻasi ʻi he peesi fakaʻosi ʻo ʻEtau Ngāue Fakafaifekau ʻo e Puleʻanga. Fai ha tokanga lelei ki he konga Tohitapu ʻokú ke fokotuʻutuʻu ke ngāueʻakí, fakapapauʻi pe ko e hā ʻa e ngaahi lea pe kupuʻi lea ke te fakamamafaʻi ke ʻai ʻete poini tefitó ke mahino lelei. ʻOku ʻikai fiemaʻu ke ako maʻuloto ʻa e tuʻuakí; ka, ʻoku lelei ke maʻu ʻa e tefitoʻi fakakaukaú ʻi he ʻatamaí, pea ʻai ia ki hoʻo ngaahi lea pē ʻaʻaú, pea fakahā ia ʻi ha founga te ke fakakaukau ʻe fakamānako ki hoʻo tokotaha fanongó.
4 Vakaiʻi ʻa e ngaahi tohi ʻoku ʻamanaki ke ke tuʻuakí, pea fili ha ngaahi poini fetalanoaʻaki mahuʻinga. Filifili ha meʻa ʻokú ke ʻilo ʻe mahuʻingaʻia ai ʻa e kakai ʻi ho feituʻu ngāué. Fai ha fakakaukau ki he founga te ke feʻunuʻaki ai hoʻo fetalanoaʻaki mo e tokotaha-ʻapi kehekehe—ko ha tangata, ko ha fefine, ko ha taha matuʻotuʻa, pe ko ha talavou.
5 Kuó ke ʻahiʻahi fai hano fakaangaanga ha ngaahi konga? Fakatahatahaʻi ʻa e ngaahi mēmipa ʻo e fāmilí pe ko ha kau malanga ʻe niʻihi ke fetalanoaʻaki pe ko e hā nai ha ngaahi tuʻuaki ʻe ola lelei, pea ʻahiʻahiʻi leʻo lahi foki kinautolu koeʻuhi ke maʻu lelei ia ʻi he ʻatamai ʻo e tokotaha kotoa pē. Feinga ke fakahā ha ngaahi tuʻunga moʻoni pea mo e ngaahi fakafepaki ʻoku faʻa hoko ʻi he feituʻu ngāué. Ko e founga ʻahiʻahi peheé ʻe fakalakalaka ai hoʻo poto he leá, tupulekina hoʻo ola lelei ange ʻi he malangá, pea langa hake hoʻo tui paú.
6 Tānaki atu ki hono teuteu pea ʻahiʻahiʻi hoʻo tuʻuakí, ʻoku totonu ke ke ʻeke hifo kiate koe, ‘Ko e kofu ʻoku ʻamanaki ke u tuí ʻoku taau nai ia ki he ngāue fakafaifekaú? ʻOku ou maʻu ʻa e meʻa ʻoku ou fiemaʻú ʻi heʻeku kató, ʻo kau atu ai ʻa e ngaahi tohi ʻoku ou fokotuʻutuʻu ke ngāueʻakí? ʻOku nau ʻi ha tuʻunga lelei? ʻOku ʻi ai haʻaku tohi Reasoning, ngaahi tuleki, ngaahi lēkooti fale-ki-he-fale, pea mo ha peni-vahevahe?’ Ko e tomuʻa fakakaukau ki muʻá ʻe tokoni ia ki ha ʻaho lelei ange ʻi he ngāue fakamalangá.
7 ʻI he hili ʻetau fai ʻa e lelei taha ʻoku tau malavá ke teuteu ʻiate kitautolu pē, ʻoku totonu ke tau lotu ʻo kole ʻa e laumālie ʻo Sihová ke tokoniʻi kitautolu ke tau lavameʻa. (1 Sione 5:14, 15) Ko hono fai ha tokanga lelei ki hono fai ha teuteú ʻe ʻi ai ʻa e ola ʻi heʻetau maʻu ha fiefia lahi ange ʻi heʻetau ngāué, ʻi hono ‘fai ke kakato ʻetau gaue fakafaifekaú.’—2 Tīm. 4:5, PM.