Kapau ʻOku Maʻu Ai ha Ngaahi Ola, Ngāueʻaki Ia!
1 ʻOku tokonaki hokohoko maʻa kitautolu ʻe he ʻEtau Ngāue Fakafaifekau ʻo e Puleʻanga ha ngaahi tuʻuaki kuo fokotuʻu mai ke ngāueʻaki ʻi he ngāue fakafaifekaú. ʻOku ʻomai ai heni kiate kitautolu ha ngaahi fakakaukau foʻou ki he founga ke fakatupulekina ai ha mahuʻingaʻia ʻi he pōpoaki ʻo e Puleʻangá. Mahalo pē te ke fai ha feinga ʻi he māhina taki taha ke ako ha taha pe lahi ange ʻo e ngaahi tuʻuaki ko ʻení. Kae kehe, ʻoku ʻilo nai ʻe he kau malanga ʻe niʻihi ʻi he taimi ʻoku nau ngāueʻaki ai ha taha ʻo kinautolu ʻi ha taimi nounou, ko e tatau kehe ʻo ʻEtau Ngāue Fakafaifekau ʻo e Puleʻanga ʻokú ne ʻomai ha ngaahi tuʻuaki foʻou. ʻOku hā mahino, ʻoku ʻikai nai ke faingofua ki he tokotaha kotoa pē ke ako ha tuʻuaki foʻou ki muʻa ke ne pōtoʻi ʻi he taha ki muʻá.
2 ʻOku moʻoni, ʻoku ʻi ai ʻa e kau tāimuʻa ʻe laui afe mo e kau malanga ʻe niʻihi ʻoku nau fakamoleki ha taimi lahi ange ʻi he malaʻe malangá. ʻIkai ko ia pē, ʻoku ngāueʻi ʻe he ngaahi fakatahaʻanga lahi honau feituʻú fakakātoa maʻu pē ʻi he uike siʻi. ʻI he ngaahi tuʻunga ko ʻení, ʻoku houngaʻia ʻa e kau malangá ke talitali lelei ha ngaahi lea kamata foʻou mo ha ngaahi fakakaukau ki hono ʻoatu ʻa e pōpoakí. ʻOku tokoniʻi ai heni kinautolu ke fakalahi ʻenau pōtoʻí. ʻOku ʻai ai foki ʻenau ngāue fakafaifekaú ke mahuʻinga pea fua lahi ange pea tokoniʻi ai kinautolu ke ikuʻi ʻa e ngaahi pole te nau fetaulaki mo iá.
3 ʻI ha faʻahinga tuʻunga pē, kapau kuó ke teuteu ha tuʻuaki ʻe ola lelei ʻi hono fakatupulekina ha mahuʻingaʻia, ʻi heʻene peheé hokohoko atu ke ngāueʻaki ia! ʻOku ʻikai fiemaʻu ke taʻofi hano ngāueʻaki ha tuʻuaki ola lelei ʻa ia ʻoku maʻu ai ha ngaahi ola. Liliu pē ia ki he tohi ʻoku tuʻuaki ki he māhina lolotongá. ʻI hoʻo fakamanatu ʻa e ngaahi fokotuʻu ʻoku ʻomai ʻi he ʻEtau Ngāue Fakafaifekau ʻo e Puleʻanga, fakatokangaʻi ha ngaahi poini mahuʻinga te ke saiʻia nai ke tānaki atu ki hoʻo tuʻuakí.
4 Ko ia, ʻi he taimi ʻokú ke maʻu ai ha tatau foʻou ʻo ʻEtau Ngāue Fakafaifekau ʻo e Puleʻanga, manatuʻi ko e ngaahi tuʻuaki ʻoku ʻi aí ko e ngaahi fokotuʻu pē ia. Kapau te ke lava ʻo ngāueʻaki kinautolu, lelei ia. Ka ʻo kapau ʻokú ke ʻosi maʻu ha tuʻuaki ʻoku maʻu ai ha ngaahi ola ʻi ho feituʻú, ngāueʻaki ia! Ko e meʻa ʻoku mahuʻingá ko e “fai ke kakato hoo gaue fakafaifekau” ʻi ha founga lelei, ʻo maʻu ai ʻa e faʻahinga loto-totonú pea tokoniʻi kinautolu ke hoko ko e kau ākonga.—2 Tim. 4:5, PM.