“Tokoni ʻi he Taimi Totonu”
1 Ko ha fakaongoʻi foʻou ē ʻa hono maʻu ʻa e tokoní ʻi he taimi pē ʻoku tau fiemaʻu aí! (Hep. 4:16) ʻI he Fakataha-Lahi Fakavahe “Kau Talafekau ʻo e Melino Fakaʻotuá,” naʻa tau fiefia ai ʻi heʻetau maʻu ʻa e ongo tokonaki makehe ʻe ua ʻo e tokoní ʻi he taimi totonú.
2 Ko e tohi foʻou, ko e The Secret of Family Happiness, naʻe aʻu mai ia ʻi ha taimi feʻungamālie. ʻOku fakahangataha ia ki he ngaahi meʻa mahuʻinga ʻe fā ʻa ia ʻe tokoni ki he moʻui fakafāmili fiefiá: (1) Māpuleʻi-kita, (2) tokaʻi ʻo e tuʻunga-ʻulú, (3) fetuʻutaki leleí, mo e (4) ʻofá.
3 Ko e ngaahi tefitoʻi moʻoni ko iá ʻoku fakaeʻa he Ko Hono ʻAi Hoʻo Moʻui Fakafāmilí ke Fiefia ʻa ia naʻe tukuange mai ʻi he lea faka-Tongá. Ko e akonaki ʻoku ʻomai ʻi he tohi ko e Moʻui Fakafāmilí te ne tokoniʻi ʻa e ngaahi fāmili kotoa ʻoku nau ngāueʻaki iá ke maʻu ʻa e melino fakaʻotuá. Vaheʻi ha taimi ke lau fakalelei ai ʻa e tohi foʻoú pea ako fakataha ia ʻi he tuʻunga fakafāmilí. ʻAi ke maheni lelei mo hono ngaahi kongá koeʻuhi ke ke mateuteu ke ngāueʻaki ola lelei ia ʻi hono tuʻuaki atu ki he kakaí ʻi he ʻuluaki taimí, ʻi Fepueli.
4 Ko e polosiua foʻou, Ko e Hā ʻOku Fiemaʻu ʻe he ʻOtuá Meiate Kitautolú?, kuo aʻu mai ʻi he taimi totonu ke tokoni ki hono fakavaveʻi ʻetau ngāue ngaohi ākongá. Neongo ʻoku tautefito nai hono ngāueʻakí ke tokoniʻi ʻa e kakai ʻoku fakangatangata pē ʻenau pōtoʻi lautohí, ʻoku tokolahi ʻa e kakai lalahi mo e fānau tupu lautohi lelei te nau maʻu foki ʻa e ʻaonga mei heʻene fakamatala faingofua fekauʻaki mo e ngaahi akonaki tefito ʻa e Tohitapú. Mahalo nai ko e meʻa ia ʻoku fiemaʻu ki hono kamata ha ako ʻi he tuʻunga ko ha maka-lakaʻanga ia ki he tohi ko e ʻIlo. Ko e tokonaki ko ʻení ʻoku fakapapauʻi te ne tokoniʻi ʻa e tokolahi ange ke houngaʻia ʻi he founga te nau lava ai ke maʻu ha tāpuaki lahi ʻi hono fai ʻa e meʻa ʻoku fiemaʻu ʻe he ʻOtuá.
5 Naʻe fakahaaʻi lelei ʻe Tēvita ʻetau ngaahi ongoʻí ʻi he taimi naʻá ne fakahā ai ‘ʻe ʻikai te ne masiva, ko hono laumalié ʻoku ne fakafoki, ʻoku fonu mahuohua a ʻene ipú.’ (Sāme 23:1, 3, 5) ʻOku tau fakatuʻotuʻa fiefia atu ke ʻoatu ʻa e tokoni fakalaumālie fakaofó ni ki ha niʻihi kehe tokolahi ʻoku nau holi loto-totonu ke ʻilo pea mo tauhi ki he ʻOtua moʻoni, ko Sihová.