Ko e Fakamanatú—Ko ha Meʻa ʻOku Mātuʻaki Mahuʻinga!
1 ʻI he Sāpate, Maʻasi 23, hili ʻa e tō ʻa e laʻaá, te tau fai ai ʻa e Fakamanatu ʻo e pekia ʻa Kalaisí. (Luke 22:19) Ko ha meʻa ʻeni ʻoku mātuʻaki mahuʻinga moʻoni! ʻI he tauhi maʻu ʻene mateaki-angatonu kia Sihová ʻo aʻu ki he pekiá, naʻe fakamoʻoniʻi ai ʻe Sīsū ʻoku malava ki he faʻahinga ʻo e tangatá ke tauhi maʻu ʻa e anga-līʻoa fakaʻotua haohaoá neongo ʻa e ʻi he tuʻunga faingataʻaʻia kakahá, ʻa ia ʻoku hākeakiʻi ai ʻa e totonu ʻo e tuʻunga-hau ʻo Sihová. (Hep. 5:8) Tānaki atu ki ai, naʻe tokonaki mai ʻe he pekia ʻa Kalaisí ʻa e feilaulau fakaetangata haohaoa naʻe fiemaʻu ki hono huhuʻi ʻa e faʻahinga ʻo e tangatá, ʻo ʻai ai ke malava ʻa e faʻahinga ʻoku nau ngāueʻi ʻa e tuí ke nau moʻui taʻengata. (Sione 3:16) ʻI he kau ki he Fakamanatú, ʻoku lava ai ke tau fakahāhā ʻetau houngaʻia loloto fakatouʻosi ʻi he ʻofa ʻa Sihová pea mo e feilaulau ʻa Sīsū maʻatautolú.
2 ʻOku fakalototoʻaʻi kotoa ke muimui ʻi he polokalama lau Tohitapu ko ia ʻoku fakahokohoko ki Maʻasi 18-23, ʻa ia ʻoku hā ʻi he 1997 Calendar of Jehovah’s Witnesses. ʻIkai ko ia pē, ko ha fetalanoaʻaki fakafāmili ʻi he vahe 112-116 ʻo e tohi ko e The Greatest Man Who Ever Lived ʻe tokoni ia ke fakahangataha ʻetau tokangá ki he uike mahuʻinga lahi taha ʻi he hisitōlia ʻo e faʻahinga ʻo e tangatá.
3 ʻE lava ke ke fakalahi ʻa e taimi ʻokú ke fakamoleki ki he ngāue fakafaifekaú he lolotonga ʻo e faʻahitaʻu Fakamanatú? Ko e kau malanga tokolahi te nau ngāueʻaki kakato ʻa e fakaʻosinga ʻo e uike ʻe nima ʻi Maʻasí ke ngāue ko ha kau tāimuʻa tokoni. Fēfē ke ke kau ai mo kinautolu? Ko e kotoa ʻo kitautolú ʻe lava ke tau kau kakato ʻi hono fakamamafaʻi ʻa e mahuʻinga ʻo e kau ki he Fakamanatú. Koeʻuhi ʻe fakahoko ia ʻi he Sāpaté, ʻe faingofua ange ai ki he tokolahi ke kau ki ai. Fakapapauʻi ke fakaafeʻi kotoa ʻa e kau ako Tohitapú pea mo ha faʻahinga mahuʻingaʻia kehe ke kau fakataha mo kitautolu. Vahevahe mo kinautolu ʻa e meʻa ʻoku fakahā mai ʻi he peesi 127, palakalafi 18, ʻi he tohi ko e ʻIlo ʻo fekauʻaki mo e ʻaho ʻe taha ʻi he taʻú ʻoku tauhi makehé.
4 Fakaofi atu ki he meʻa mahuʻinga lahi taha ko ʻeni ʻo e 1997 mo e houngaʻia loloto ki he ʻuhinga ʻo e pekia ʻa Sīsū maʻatautolú. Ke ke ʻi ai ʻi he efiafi ʻo Maʻasi 23, ʻi he taimi ʻe fai loto-tōnunga ai ʻa e Fakamantú ʻe he kau Kalisitiane moʻoní ʻi he feituʻu kotoa pē.