Ko e Hā Te u Leaʻakí?

ʻI he taimi ʻoku tau fetaulaki ai mo e kakaí ʻi he ngāue fakafaifekaú ʻoku nau tali leleí, ʻoku tau saiʻia ke toe ʻaʻahi ke ʻoatu kiate kinautolu ha toe fakamoʻoni lahi ange. Kae kehe, ʻoku ʻikai nai te tau fakapapauʻi pe ko e hā ʻa e meʻa ke leaʻaki ke toe langaʻi hake ai ha fetalanoaʻaki hoko mai. Te ke ʻahiʻahiʻi nai ʻa e lea ko ʻení: Langaʻi hake ha fehuʻi fakatupu mahuʻingaʻia, pea huke leva ki he tohi Reasoning ke fakahā mei ai ʻa e tali Fakatohitapú. ʻE tokoni ke ʻi ai ha fakahokohoko ʻo e ngaahi fehuʻi ʻa ia te ke lava ʻo fili mei ai ha taha ʻokú ke pehē te ne tohoakiʻi mai ai ha tali lelei ʻi ha ʻaʻahi ʻe fai. Ko e fakahokohoko ʻi laló, naʻe faʻu ia mei he tohi Reasoning, ʻoku hā ai ʻa e fika ʻo e peesi ʻoku maʻu ai ʻa e tali taki taha:

◼ Ko e hā ʻoku tau tupu ai ʻo motuʻa pea maté? (98)

◼ ʻOku ʻi ai ha ngaahi ʻuhinga lelei ke tui ai ki he ʻOtuá? (145)

◼ ʻOku tokanga moʻoni mai ʻa e ʻOtuá ki he meʻa ʻoku hoko kiate kitautolu faʻahinga ʻo e tangatá? (147)

◼ Kuo pau ke ʻalu ha taha ki hēvani ke maʻu ai ha fiefia moʻoni ʻi he kahaʻú? (163)

◼ Ko e hā ʻoku mahuʻinga ai ke ʻilo pea ngāueʻaki ʻa e huafa fakafoʻituitui ʻo e ʻOtuá? (196)

◼ Ko e hā ʻe fakahoko ʻe he Puleʻanga ʻo e ʻOtuá? (227)

◼ Ko e hā ʻa e taumuʻa ʻo e moʻui ʻa e faʻahinga ʻo e tangatá? (243)

◼ Ko e hā ʻoku lahi pehē fau ai ʻa e ngaahi lotú? (322)

◼ ʻE lava fēfē ke ʻilo ʻe ha taha pe ko fē ʻa e lotu ʻoku tonú? (328)

◼ ʻOku mālohi fēfē ʻa e tokotaha ko Sētané ʻi he māmani ʻo e ʻaho ní? (364)

◼ Ko e hā ʻoku fakangofua ai ʻe he ʻOtuá ʻa e faingataʻá? (393)

◼ Ko e hā ʻoku lahi pehē fau ai ʻa e anga-fulikivanú? (427)

ʻE lava ke ke faʻo ha fakahokohoko pehē ʻo e ngaahi fehuʻí ʻi hoʻo Tohitapú pe tohi Reasoning ki ha maʻuʻanga fakamatala vave. Ko e ʻi ai ha ngaahi meʻa pau ʻi he ʻatamaí ke leaʻaki ʻi he ngaahi toe ʻaʻahí te ne fakalototoʻaʻi koe ke ke anga-tonu ʻi he toe ʻaʻahi ki he kotoa ʻo e kau mahuʻingaʻia ʻokú ke maʻú.