“Mou Fai Pehe Mōku Fakamanatu”
1 ʻOku hehema ʻa e faʻahinga ʻo e tangatá ke tuku atu ʻa e ʻuhinga ʻo e ngaahi meʻa ʻoku mahuʻingá ke mole atu ʻi he ʻalu ʻa e taimí. Ko e ʻuhinga ʻeni ʻe taha ki he ʻuhinga, ʻi hono fokotuʻu “ʻa e kai efiafi ʻa e ʻEiki,” naʻe fekauʻi ai ʻe Sīsū ʻene kau ākongá: “Mou fai pehe mōku fakamanatu.” Talu foki mei ai, ʻi he fakamanatu fakataʻu ʻo e pekia ʻa Sīsuú, ʻoku hanganaki talangofua ʻa e kau Kalisitiané ke “fakaha ʻa e pekia ʻa e ʻEiki kaeʻoua ke ne hoko mai.”—1 Kol. 11:20, 23-26.
2 ʻOku fuʻu vavé ni he taimí ni, ʻa hono ʻohake ʻe Sīsū ki he nofoʻanga fakalaumālié ʻa e faʻahinga fakaʻosi ʻo e toenga ʻo e “fanga sipi siʻi” kuo fakaʻau ke ʻosí. (Luke 12:32; Sione 14:2, 3) ʻI he taʻú ni ko e toenga ʻo e faʻahinga paní fakataha mo e fuʻu kakai lahi fakautuutu ʻo e “fanga sipi kehe” te nau toe maʻu ha monū ko hono kātoangaʻi ʻa e Kai Efiafi ʻa e ʻEikí, ʻi ʻEpeleli 11. (Sione 10:16; Fkh. 7:9, 10) ʻE ʻai ke mālohi ai ʻa e houngaʻia ki he ʻofa lahi ʻa Sihová ʻi hono fekau hifo hono ʻAlo tofu-pē-tahā-ne-fakatupú koeʻuhi ko e faʻahinga ʻo e tangatá. ʻE fakaeʻa ai ʻa e faʻifaʻitakiʻanga ʻa Sīsuú, ko ʻene ʻofá, ko ʻene anga-tonu ʻo aʻu ki he pekiá ʻi hono tokonaki mai ʻa e huhuʻí, pea mo ʻene pule he taimí ni ko ha Tuʻi ʻo e Puleʻanga ʻo e ʻOtuá kuo ʻosi fokotuʻú, pea pehē foki ki he ngaahi tāpuaki ʻe ʻomai ʻe he Puleʻanga ko iá ki he faʻahinga ʻo e tangatá. ʻOku moʻoni ko ha kātoanga ʻo e fakamanatu!
3 Teuteu he Taimí Ni: ʻAi ke tau ngāue kotoa ke ʻai ʻa e faʻahitaʻu Fakamanatu ko ʻení ko ha taimi fakafiefia mo fakatupu loto-houngaʻia lahi kiate kitautolu pea mo e kotoa ʻo e faʻahinga te nau kau fakataha mo kitautolú. ʻE lava ke tau teuteuʻi hotau lotó ʻaki hono toe lau ʻa e ngaahi fakamatala ʻi he Tohitapú fekauʻaki mo e ngaahi ʻaho siʻi fakamuimui ʻo e ngāue fakafaifekau ʻa Sīsuú pea mo e ngaahi meʻa naʻe taki atu ki heʻene pekiá. Ko ʻetau ako fakafāmili ʻi he ngaahi uike siʻi ki muʻa ʻi he Fakamanatú ʻe fai nai ai ʻa hono fakamanatu ʻo e vahe 112-116 ʻi he tohi Greatest Man.
4 Ko e toko fiha ʻokú ke ʻiloʻi nai te nau haʻu ki he Fakamanatú kapau te ke tomuʻa fai ha langa hake ʻenau houngaʻia ki he kātoangá ni, fakaafeʻi kinautolu, pea ʻai ke nau ongoʻi ʻoku talitali lelei kinautolú? ʻAi ha lisi he taimí ni, pea fai ʻa e meʻa ʻoku lava ke ke faí ke tokoniʻi ai kinautolu ke nau haʻu. ʻI he hili iá, tokoniʻi kinautolu ke hanganaki tupu fakalaumālie ʻaki hono fakalototoʻaʻi kinautolu ke maʻu maʻu pē ʻa e ngaahi fakatahá.
5 ʻI he lolotonga ʻo e faʻahitaʻu Fakamanatú, ʻe fai ha ngaahi fokotuʻutuʻu makehe ke fakalahi ʻa e ngaahi faingamālie malanga ʻa e tokotaha kotoa pē. ʻI ha taimi-tēpile lelei, ʻe lava ke ke tāimuʻa tokoni ʻi ʻEpeleli? ʻi Mē? Ko e taha ʻo e ngaahi founga lelei taha ke fakahā ai ʻoku tau houngaʻia ʻo manatuʻi kotoa ko e ʻuhinga ʻo e feilaulau ʻa Sīsū maʻatautolú ko ʻetau lea fekauʻaki mo hotau ʻOtuá, ko Sihova, pea mo e ngaahi tāpuaki ʻe ʻomai ʻe he Puleʻanga ʻoku pule ai hono ʻAló.—Sāme 79:13; 147:1.