Fānau​—Ko Kimoutolu Homau Fiefiaʻangá!

¹ Longaʻi fānau tangata mo e fefine, ʻoku mou maheni mo e fekau ʻa Sihova ke fakakau kimoutolu ʻi he ngaahi ngāue ʻa e fakatahaʻangá? (Teu. 31:12; Sāme 127:3) Ko ha meʻa fakafiefia ia ke mou kau fakataha mo kimautolu ʻi he lotu fakataha kia Sihová! ʻOku fiefia homau lotó ʻi he taimi ʻoku mou tangutu fakalongolongo ai ʻi he ngaahi fakatahá ʻo fanongo tokangá. ʻOku ʻai ai kimautolu ke fiefia tautefito ʻi he taimi ʻoku mou feinga ai ke tali ʻi hoʻomou ngaahi lea pē ʻa moutolú. ʻOku fiefia ʻa e fakatahaʻangá fakalūkufua ʻi he taimi ʻoku mou fakahoko ai ha ngaahi konga kuo vaheʻi ʻi he Akoʻanga Fakafaifekau Fakateokalatí, ʻi he taimi ʻoku mou feinga vēkeveke ai ke kau fakataha mo kimautolu ʻi he ngāue fakamalangá, pea ʻi he taimi ʻoku mau fanongo ai ʻoku mou faifakamoʻoni loto-toʻa ki homou kaungāakó mo e kau faiakó.​—Sāme 148:​12, 13.

² ʻOku mau fiemaʻu ke mou ʻilo ʻoku mau laukauʻaki kimoutolu ʻi he taimi ʻoku mau sio ai ki hoʻomou ʻulungaanga leleí, fōtunga maʻá, ko hoʻomou ʻulungaanga maʻá, pea mo hoʻomou fakaʻapaʻapa ki he kakai lalahí. Ko ʻemau fiefiá ʻoku lahi tautefito ʻi he taimi ʻoku mou fakahāhā ai ʻoku mou ‘manatu ki homou Tubuagá’ ʻaki hono fokotuʻu ha ngaahi taumuʻa fakateokalati maʻamoutolu.​—Koh. 12:2 (12:​1, PM); Sāme 110:3.

³ Tala Mai Kiate Kimautolu Hoʻomou Ngaahi Taumuʻá: Naʻe tala ange ʻe ha tamasiʻi taʻu valu ʻe taha ki ha ʻovasia fakavahe: ‘ʻUluakí, ʻoku ou saiʻia ke hoko ʻo papitaiso, pea te u saiʻia leva ke tokoni ʻi he fakatahaʻangá ʻaki ʻeku ngāue ʻi he meʻa fakaleʻo lahí mo ʻave holo ʻa e maiká, hoko ko ha tokotaha fakanofonofo, tokoni ki he ʻū tohí, lau tohi ʻi he ngaahi ako tohí mo e ngaahi Ako Taua Leʻo. Pea te u saiʻia leva ke hoko ko ha sevāniti fakafaifekau, pea toki hoko leva ko ha tokotaha mātuʻa. ʻOku ou toe saiʻia ke hoko ko ha tāimuʻa pea ʻalu ki he akoʻanga tāimuʻá. ʻOku ou saiʻia foki ke u ʻalu ki Pēteli, hoko ko ha ʻovasia fakafeituʻu pe ko ha ʻovasia fakavahe.’ Ko ha houngaʻia lelei ē naʻá ne fakahā ki he monū ʻo e ngāue ki he ʻOtuá!

⁴ ʻI hoʻomou fakalakalaka fakaesino mo fakalaumālié, ʻoku mau fiefia ke sio kiate kimoutolu ʻoku mou aʻusia hoʻomou ngaahi taumuʻá. (Fakafehoanaki mo Luke 2:52.) ʻI he taʻu taki taha, ko e laui afe ʻo kimoutolu ʻoku hoko ko e kau malanga teʻeki papitaiso pea toki taau ke papitaiso ko e kau sevāniti fakatapui ʻa Sihova. ʻOku tupulekina ʻemau fiefiá ʻi he taimi ʻoku mau toe sio ai ʻoku mou kakapa atu ke tāimuʻa tokoni pea naʻa mo e kau ki he ngāue taimi-kakató. Ko e moʻoni, fānau, ko kimoutolu homau fiefiaʻangá pea mo ha matavai fakaofo ʻo e fakahīkihiki ki heʻetau Tamai fakahēvaní. ʻOfa ke tāpuakiʻi lahi kimoutolu ʻe Sihova!​—Pal. 23:​24, 25.