Tō ki he Niʻihi Kehé ʻa e ʻAmanaki ko e Moʻui Taʻengatá
1 Neongo kuo fekumi ʻa e tangatá ki ha ngaahi founga ke māmālie ai ʻa e fakaʻau ke motuʻá pea fakalahi atu ʻa e vahaʻa taimi ʻo ʻene moʻuí, ko e taʻumotuʻá mo e maté ʻoku kei taʻealataʻofi pē ia. Ko ha fakamālō ē ka ko kitautolu ko hono fakamatalaʻi ʻe he Tohitapú ʻa e ʻuhinga ʻoku tupu ai ʻa e faʻahinga ʻo e tangatá ʻo motuʻa pea maté, pea pehē foki ki he founga ʻe liliu ai ʻa e ngaahi nunuʻa ʻo e taʻumotuʻá pea mo e maté ke toʻo fakaʻaufuli atu. Ko e ngaahi moʻoni ko ʻení ʻoku fakahaaʻi fakapatonu mai ia ʻi he tohi ʻIlo ʻA Ia ʻOku Taki Atu ki he Moʻui Taʻengatá. ʻOku tali maʻalaʻala ʻe he tohí ʻa e ngaahi fehuʻi fakapuputuʻu-loto fekauʻaki mo e moʻuí mo e maté, ʻo fakahanga ʻa e tokotaha lau tohí ki he taimi ʻe toe fakafoki mai ai ʻa e Palataisí.
2 ʻI Maʻasí te tau tuʻuaki ai ʻa e tohi ʻIlo pea mo e taumuʻa ko hono kamata ha ngaahi ako Tohitapu ʻi ʻapi. (Mt. 28:19, 20) Te tau fai leva ha ngaahi toe ʻaʻahi ki he kotoa ʻo e faʻahinga ʻoku nau fakahā ʻa e mahuʻingaʻia ʻi he pōpoaki ʻo e Puleʻangá. ʻI he founga ko ʻení ʻoku tau tō nai ai ki he niʻihi kehé ʻa e ʻamanaki ko e moʻui taʻengatá. (Tai. 1:2) Ke fakahoko ʻa e meʻá ni, te ke ʻilo nai ʻoku ʻaonga ʻa e ngaahi fokotuʻu ʻoku hoko haké.
3 ʻI hono fai ʻa e ʻuluaki ʻaʻahí, te ke ʻeke nai ʻa e fehuʻi ko ʻení:
◼ “Kuó ke fifili ki he ʻuhinga ʻoku fakaʻānaua ai ʻa e faʻahinga ʻo e tangatá ki ha moʻui fuoloa angé? [Tuku ke ne tali.] Ko e kau lotu Putá, kau Kalisitiané, kau Hinituú, kau Mosilemí, pea mo e niʻihi kehe kotoa pē ʻoku ʻi ai ʻenau ʻamanaki ki ha moʻui ʻi he hili ʻa e maté.” Fakaava ʻa e tohi ʻIlo ki he vahe 6, “Ko e Hā ʻOku Tau Tupu Ai ʻo Motuʻa pea Maté?,” pea lau ʻa e palakalafi 3. Fakaʻuhinga ʻi he ngaahi konga Tohitapu ʻoku lave ki aí. Lave ki he fehuʻi ʻe ua ʻi he ngataʻanga ʻo e palakalafí, ʻeke ange ki he tokotaha-ʻapí pe te ne saiʻia ke ne ʻilo ʻiate ia pē ki he talí. Kapau ʻokú ne loto ki ai, hoko atu ʻo lāulea ki he ngaahi palakalafi siʻi hoko maí. ʻOku kamata ai ha ako Tohitapu! Ka ʻikai, tuku ʻa e tohí ʻiate ia ke ne lau, pea fai ha fokotuʻutuʻu ke toe foki ki ai, ʻoku lelei angé ke ʻi loto ʻi ha ʻaho ʻe taha pe ua, ke lāulea ai ki he talí.
4 ʻI hono fai ha toe foki ki he tohi “ʻIlo” naʻe tukú, ʻe lava ke ke pehē:
◼ “ʻOku ou toe foki mai ke vakai ki he fehuʻi ʻe ua fekauʻaki mo e maté ʻa ia naʻá ta tuku ʻo teʻeki ke talí.” Fakamanatu ki he tokotaha-ʻapí ʻa e ongo fehuʻí. Lāulea leva ki he fakamatala ʻi he vahe 6 ʻi he kaveinga tokoni “Ko ha Faʻufaʻu Fakafufū Kākā.” Makatuʻunga ʻi he ngaahi tuʻungá, pe ko e hoko atu ʻa e akó pe ko e ngāueʻaki ʻa e fehuʻi fakamuimui ʻi he ngataʻanga ʻo e palakalafi 7 ke fakatoka ha makatuʻunga ki he konga hoko maí. Fai ha fokotuʻutuʻu pau ke toe foki ki ai. ʻOange ki he tokotaha-ʻapí ha lauʻi pepa tuʻuaki, pea fakamatalaʻi nounou ʻa e founga ʻoku fakahoko ai ʻa e ngaahi fakataha ʻa e fakatahaʻangá. Fakaafeʻi loto-māfana ia ke ne haʻu ki ai.
5 Pe ko e ngāue matapā-ki-he-matapā pe faifakamoʻoni ʻi he founga ʻikai anga-mahení, te ke kamata nai ha fetalanoaʻaki ʻaki hoʻo pehē:
◼ “Kuó ke fifili pe ko e hā ʻoku tuku tauhi mai ʻe he kahaʻú maʻa kitautolu pea mo e foʻi māmaní? [Tuku ke ne tali.] ʻOku fakatahaʻi ʻe he Tohitapú ʻa e kahaʻú ʻi he foʻi lea ʻe taha—Palataisi! ʻOku fakamatalaʻi ai, ʻi he kamataʻangá naʻe ngaohi ʻe he ʻOtuá ha konga ʻo e foʻi māmaní ko ha palataisi fakaʻofoʻofa ʻa ia naʻá ne tuku ki ai ʻa e ongo mātuʻa fakaetangata naʻá ne fakatupú. Ko kinauá te na fakatokolahi ʻa e foʻi māmaní kātoa, ʻo faai atu pē ʻo liliu ia ko ha palataisi. Fakatokangaʻi ʻa e fakamatala ko ʻeni ʻo e meʻa kuo pau naʻe tatau mo iá.” Fakaava ʻa e tohi ʻIlo ki he peesi 8, pea lau ʻa e palakalafi 9, ʻi he kaveinga tokoni ko e “Moʻui ʻi he Palataisí.” Lāulea leva ki he ngaahi poini ʻi he palakalafi 10, pea lau ʻa e konga Tohitapu ʻoku lave ki aí, Aisea 55:10, 11. Fokotuʻu ange ke hoko atu ʻa e lāuleá ki he anga ʻo e faʻahinga moʻui ʻi he Palataisi ʻe fakafoki maí pea fakaʻosi fakataha ʻa e palakalafi 11-16. Pe ko e fakalototoʻaʻi ʻa e tokotahá ke ne lau ia ʻiate ia pē, pea fokotuʻutuʻu ke mo toe fetaulaki ʻo lāulea ki ai.
6 Kapau naʻe ʻikai ke fokotuʻu ha ako ʻi he ʻuluaki kamatá, ʻe lava ke ke ʻahiʻahi ke fai pehē ʻi he toe ʻaʻahí ʻaki hoʻo pehē:
◼ “Hangē ko ia naʻá ta lāulea ki ai ʻi heʻeta fetalanoaʻaki fakamuimuí, ko e taumuʻa ia ʻa e ʻOtuá ke liliu ʻa e foʻi māmaní fakalūkufua ko ha palataisi. ʻOku maheʻa hake ai ha fehuʻi, ʻE fēfē ʻa e Palataisí?” Fakaava ʻa e tohi ʻIlo ki he vahe 1, pea ako ʻi he palakalafi 11-16, ʻi he kaveinga tokoni ko e “Moʻui ʻi he Palataisi ʻe Fakafoki Maí.” ʻI he hili iá, fakahā ange ʻa e fakatātā ʻi he peesi 4-5, pea ʻeke ange ki he tokotahá pe te ne saiʻia ke moʻui ʻi ha ʻātakai fakaʻofoʻofa pehē. Lau leva ʻa e ʻuluaki sētesi ʻo e palakalafi 17 ʻi he peesi 10. Makatuʻunga ʻi he ngaahi tuʻungá, pe ko e hoko atu ʻa e akó pe tala ange, ʻi hoʻo ʻaʻahi hoko maí te ke fakamatalaʻi ai ʻa e meʻa ʻoku fiemaʻu kae moʻui ha taha ʻi he Palataisi ʻe fakafoki maí. Tuku ha lauʻi pepa tuʻuaki, fakamatalaʻi ʻa e taimi-tēpile ki he fakatahá, pea fakaafeʻi loto-māfana ʻa e tokotahá ke ne haʻu ki he Fale Fakatahaʻangá.
7 Ko e tohi ʻIlo ko ha meʻangāue lelei ʻaupito ia ke ngāueʻaki ʻi hono fakahā atu ki he niʻihi kehé “ʻa e moʻui taʻengata” ʻoku talaʻofa mai ʻe he ʻOtuá. Ko hoʻo fai ʻa e ngaahi ako Tohitapu mo e kakaí ʻe lava ke tō ai kiate kinautolu ʻa e ʻamanaki maʻongoʻonga ko ʻeni ʻa ia ʻoku tākiekina ʻe he ʻOtua “taʻe faʻa loi.”