Toʻutupu​—Lau ʻa e Folofola ʻa e ʻOtuá!

¹ Ko e taimi talavoú ko ha taimi ia ʻo e ngaahi pole mo e ngaahi fili mafatukituki ke fai. Ko e tokolahi ʻo kimoutolu kau talavou Kalisitiané ʻoku mou fehangahangai fakaʻaho mo e tenge ke maumauʻi ʻa e ngaahi tuʻunga fakaʻotua ki he ʻulungāangá. ʻI hoʻomou kamata ke fai ʻa e ngaahi fili fakafoʻituitui fekauʻaki mo e akó, ngāué, mo e nofo malí, ʻoku totonu ke mou ʻuluaki fokotuʻu hoʻomou ngaahi taumuʻa fakalaumālié. Ko e founga pē ko iá ʻe lava ke mou fai ai ʻa e ngaahi fili kehe ʻa ia te ne fakafuo lelei ʻa e toenga kotoa ʻo hoʻomou moʻuí. Ko e ngaahi taumuʻa fakalaumālie paú ʻe tokoniʻi ai kimoutolu ke ngāue fakapotopoto pea ʻai ke lavameʻa homou halá. ʻI hono lau mo fakalaulauloto tuʻumaʻu ki he Folofola ʻa e ʻOtuá, ʻe ueʻi ai kimoutolu ke moʻui ʻo fehoanaki mo ʻene akonaki fakamānavaʻí, pea ko hoʻomou ngaahi feinga totonú ʻe hoko ia ʻo lavameʻa.​—Sios. 1:8; Sāme 1:​2, 3.

² ʻE Anga-Fēfē ʻEne ʻAonga kia Kimoutolú? Ko e māmani ʻo Sētané ʻoku fonu ia ʻi he ngaahi fakatauele ke kau ʻi he faihalá. (1 Sione 2:​15, 16) ʻOku mou ʻilo nai fekauʻaki mo e ngaahi kaungā kalasi pe niʻihi kehe ʻi homou taʻú kuo nau hokosia ʻa e fakatamaki koeʻuhi ko e tukulolo ki he tenge ʻa e toʻumeʻá. Ko e pipiki ki he akonaki ʻa e Tohi Tapú ʻe ʻoatu ai kia kimoutolu ʻa e mālohi fakaeʻulungāanga mo fakalaumālie ke siʻaki ai ʻa e ʻalunga angahalaʻiá. ʻIkai ko ia pē, ko e akonaki ʻa e Folofola ʻa e ʻOtuá ʻe lava ke ne tokoniʻi kimoutolu ke fakaʻehiʻehi ai mei he ngaahi tauhele olopoto ʻa Sētané. (2 Kol. 2:​11; Hep. 5:​14) Ko e ʻaʻeva ʻi he ngaahi founga ʻa e ʻOtuá ʻe ʻoatu ai kia kimoutolu ʻa e fiefia moʻoní—ʻa e fiemālie fakafoʻituitui ʻi he ʻalunga ʻo hoʻomou moʻuí.​—Sāme 119:​1, 9, 11.

³ Ko e ngaahi tefitoʻi moʻoni tuʻuloa ʻa e Folofola ʻa e ʻOtuá ʻoku mahulu atu ia ʻi he poto fakaetangatá. (Sāme 119:​98-​100) Ko e maheni mo e ngaahi tefitoʻi moʻoni ʻi he Tohi Tapú mo e fakalaulauloto ki he ngaahi taumuʻa ʻa Sihova kuo fakahāʻí fakataha mo ha lotu fakamātoato ʻe lava ke ne tokoniʻi kimoutolu ke langa hake ai ha vahaʻangatae vāofi mo e Faʻu-Tohi poto-tāfataha ʻo e Tohi Tapú, ko Sihova ko e ʻOtuá. ʻOkú ne talaʻofa mai: “Te u akonakiʻi koe mo hulu ki he hala te ke foua: te u faleʻi koe ʻaki ʻeku hila.”—Sāme 32:8.

⁴ ʻAi ha Taimi ke Lau Ia: Naʻe ʻai ʻe ha finemui Kalisitiane ʻe taha ko ʻene taumuʻá ia ke lau ʻa e Tohi Tapú fakakātoa, pea naʻá ne ʻosiki ia ʻi ha taʻu ʻe taha. Naʻe anga-fēfē ʻene maʻu ʻaonga aí? ʻOkú ne manatu: “Naʻá ku ako ʻa e meʻa lahi fau fekauʻaki mo Sihova—ko e ngaahi meʻa naʻá ne tohoakiʻi au ke ofi ange ai kiate ia pea ʻai au ke u loto ke manavahē kiate ia ʻi he toenga ʻo ʻeku moʻuí.” (Sem. 4:8) Kuo mou lau ʻa e Tohi Tapú fakakātoa? Kapau ʻoku ʻikai, ko e hā ʻoku ʻikai ai te mou ʻai ko hoʻomou taumuʻá ke fai iá? ʻE tāpuakiʻi moʻoni ʻe Sihova hoʻomou ngaahi feingá pea te mou utu ʻa e ngaahi pale lahi.