ʻOhofi ʻe Lūsia ʻa ʻIukalaine

ʻI he hengihengi ʻo Fepueli 24, 2022, naʻe kamata hono ʻohofi fakakautau ʻe Lūsia ʻa ʻIukalaine, neongo ʻa e ngaahi feinga ʻa e kau taki ʻo e māmaní ke fakaʻehiʻehi mei ha tau. ʻE uesia fēfē nai ʻa e māmaní ʻi he tau ko ení? Naʻe pehē ki muí ni mai ʻe he sekelitali seniale ʻa e Ngaahi Puleʻanga Fakatahatahá, ʻa António Guterres: “ʻOku ʻikai lava ke tau sioloto atu ki he faingataʻaʻia mo e maumau ʻe hoko mei he tau ko ení pea mo e uesia ai ʻa e malu ʻo e ngaahi fonua ʻi ʻIulopé mo e kotoa ʻo e māmaní.”

Ko e hā ʻa e ʻuhinga ʻo e ngaahi meʻá ni ʻo fakatatau ki he Tohi Tapú?

• Naʻe tomuʻa tala ʻe Sīsū Kalaisi ha taimi ʻa ia “ʻe tuʻu ʻa e fonua ki he fonua mo e puleʻanga ki he puleʻanga.” (Mātiu 24:7) Lau ʻa e kupu “Ko e Hā ʻa e Fakaʻilonga ʻo e ‘Ngaahi ʻAho Fakaʻosí’?” ke sio ki he anga hono fakahaaʻi ʻe he Tohi Tapú ko e ngaahi tau he ʻaho ní ʻoku fakahoko ai ʻa e kikite ʻa Sīsuú.

• ʻI he tohi ʻa Fakahaá ʻoku fakatātaaʻi ai ʻa e taú ko ha taha ʻoku heka ʻi “ha hoosi lanu kulokula mālohi” pea ʻokú ne ʻave “ʻa e melinó mei he māmaní.” (Fakahā 6:4) Lau ʻa e kupu “Kau Tangata Heka Hoosi ʻe Toko Faá​—Ko Hai Kinautolu?” ke ʻiloʻi ʻa e anga ʻo e kaunga ʻa e kikite ko ení ki he tau he ʻaho ní.

• Naʻe tomuʻa tala ʻi he tohi ʻa Tanielá ʻa e feʻauʻauhi ʻi he vahaʻa ʻo e “tuʻi ʻo e tokelaú” mo e “tuʻi ʻo e tongá.” (Taniela 11:25-45) Sio ʻi he vitiō Fakahoko ʻo e Kikité​—Taniela Vahe 11 ke ako ki he ʻuhinga ko Lūsia mo ʻene faʻahí ʻa e tuʻi ʻo e tokelaú.a

• ʻOku toe fakamatalaʻi ʻi he tohi ʻa Fakahā ʻa e “tau ʻo e ʻaho lahi ʻo e ʻOtua Māfimafi-Aoniú.” (Fakahā 16:14, 16) Neongo ia, ʻoku ʻikai ko ha tau eni ia ʻi he vahaʻa ʻo e ngaahi puleʻangá ʻo hangē ko ia ʻoku tau sio ki ai he taimi ní. Lau ʻa e kupu “Ko e Hā ʻa e Tau ʻo ʻĀmaketoné?” ke maʻu ʻa e fakamatala lahi ange fekauʻaki mo e meʻa ko ia ʻe hoko ʻi he kahaʻú.

Ko e hā heʻikai siva ai hoʻo ʻamanakí ki he kahaʻú?

• ʻOku pehē ʻe he Tohi Tapú ʻe hanga ʻe he ʻOtuá ʻo “fakangata ʻa e ngaahi taú ʻi he māmaní kotoa.” (Saame 46:9) Lau ʻa e kupu “A Real Hope for a Better Tomorrow” ke ako lahi ange fekauʻaki mo e kahaʻu ʻoku talaʻofa mai ʻe he ʻOtuá.

• Naʻe akoʻi ʻe Sīsū hono kau muimuí ke lotu ke hoko mai ʻa e Puleʻanga ʻo e ʻOtuá. (Mātiu 6:9, 10) Ko e Puleʻanga ko iá ko e puleʻanga fakahēvani ʻa ia te ne fakahoko ʻa e finangalo ʻo e ʻOtuá ʻi māmani, pea ʻoku kau ai ʻa e melino ʻi he māmaní. Ke ako ki he founga ke ke maʻu ai ʻa e ʻaonga mei he Puleʻangá, sio ʻi he vitiō Ko e Hā ʻa e Puleʻanga ʻo e ʻOtuá?

ʻOku laka hake ʻi he toko 129,000 ʻo e Kau Fakamoʻoni ʻa Sihová ʻoku nofo ʻi ʻIukalaine. Hangē pē ko e Kau Fakamoʻoni ʻi he fonua kotoa pē, ʻoku nau faʻifaʻitaki kia Sīsū ʻaki ʻenau hanganaki tuʻu-ʻatā fakapolitikale pea fakafisi ke kau ʻi he taú. (Sione 18:36) ʻI he māmaní kotoa, ʻoku hokohoko atu ʻa e Kau Fakamoʻoni ʻa Sihová hono talaki ʻa e “ongoongo lelei . . . ʻo e Puleʻangá” ko e solovaʻanga pē ia ki he palopalema ʻo e faʻahinga ʻo e tangatá, ʻo kau ai ʻa e taú. (Mātiu 24:14) ʻOku mau fakaafeʻi koe ke ke fetuʻutaki mai ke ako lahi ange fekauʻaki mo e pōpoaki ʻo e ʻamanaki mei he Tohi Tapú.