ʻAonga ki he Laui Miliona ʻa e ʻŪ ʻŌfisi Liliu-Lea Tuʻu Mavahé

Laka hake ʻi he pēseti ʻe 60 ʻo e ngaahi timi liliu-lea ʻoku nau ngāue taimi-kakato ʻi he ngaahi ʻŌfisi Liliu-Lea Tuʻu Mavahe (RTO) kae ʻikai ʻi he ngaahi ʻōfisi vaʻá. Ko e hā ko ha fokotuʻutuʻu lelei ai ení? Ko e hā ʻa e ngaahi meʻangāue ʻi he RTO ʻoku fiemaʻu ʻe he kau liliu-leá kae lava ke lele ʻi matangi ʻenau ngāué? Pea ko e hā ʻa e kaunga ʻa e feituʻu ʻoku ngāue mei ai ʻa e kau liliú ki he tuʻunga ʻo ʻenau liliu-leá?

ʻOku fakaʻatā ʻe ha RTO ʻa e kau liliu-leá ke nau nofo ʻi he feituʻu ʻoku ngāueʻaki lahi ai ʻenau leá. ʻOku fakamatala ʻe Karin ko ha tokotaha liliu-lea Low German: “Talu mei heʻemau hiki mai ki he RTO ʻi Cuauhtémoc, Chihuahua, Mekisikou mo ʻemau faʻa fetalanoaʻaki ʻi he lea Low German mo ʻemau kaungā-liliu-leá pea ʻi he ngāue fakamalangá ka e pehē ʻi heʻemau ʻalu ʻo fakataú. ʻOku ʻātakaiʻi kimautolu ʻe he kakai ʻoku nau leaʻaki ʻemau leá tonu. ʻOku mau fanongo foki ki he ngaahi kupuʻi lea ne fuʻu fuoloa ʻemau taʻefanongo ki aí pea ʻoku mau toe ako ki he ngaahi lea foʻou ʻoku ngāueʻaki fakaʻaho ʻe he kakaí.

ʻOkú ngāue ʻa James ʻi he timi liliu-lea Frafra ʻi Kaná ʻokú ne pehē ko e taimi ʻe niʻihi ʻokú ne manatu ʻofa ki he fāmili Pēteli ʻi he vaʻá ka ʻokú ne hoko atu: “ʻOku ou saiʻia he ngāue ʻi he RTO. Ko e faifakamoʻoni ʻi heʻeku leá tonu pea sio ki he maongo ki he kakaí ʻa e ongoongo leleí ʻokú ne ʻai au ke u fiefia lahi.”

ʻOku anga-fēfē hono fili ʻe he fanga tokouá ʻa e feituʻu ke fokotuʻu ai ha RTO? “Ko e pole ʻe taha ko e ngaahi feituʻu ʻe niʻihi ʻoku ʻikai fuʻu pau ʻa e maʻuʻanga ʻuhila, vai pe ʻInitaneti ke lava ʻo maʻu ʻa e ngaahi faile ki he liliú,” ko e lau ia ʻa Joseph mei he Potungāue Tisaini/Langa ʻi Māmani Lahi ʻi Warwick, Niu ʻIoke, ʻAmelika. “Ko ia ke fokotuʻu ha RTO te mau vakaiʻi nai ha ngaahi feituʻu kehekehe ʻi he feituʻu ʻoku leaʻaki ai ʻa e lea tuʻufonuá.”

ʻI he fakalūkufuá, ko e founga vave taha mo maʻamaʻá ko hono fokotuʻu ʻa e RTO ʻi ha Holo ʻAsemipilií pe Fale Fakatahaʻanga pe ko ha ʻapi misinale ʻoku ʻikai ke ngāueʻaki, ʻa ia ʻe lava ke ngāue ai ʻa e kau liliu-leá. Kapau leva ʻoku ʻikai ʻatā ha taha ʻo e ngaahi falé ni, ʻe maʻu nai ʻe he fanga tokouá ha ngofua ke fakatau ha ʻapaatimeni mo ha ʻōfisi ke nofo mo ngāue ai ʻa e kau liliu-leá. Kapau leva ʻe ʻi ai ha liliu ki he ngaahi fiemaʻu ʻa e timi liliu-leá, ʻe faingofua leva ke fakatau atu ʻa e ngaahi falé ni pea ngāueʻaki ʻa e paʻangá ki he meʻa ʻoku mahuʻinga angé.

Teuʻi ke Hokohoko Atu ʻa e Ngāué

Lolotonga ʻa e taʻu fakangāue 2020, naʻa tau fakamoleki ai ʻa e paʻanga ʻe 13 miliona ʻAmelika ke fakaleleʻaki ʻa e ʻū RTO. ʻOku fiemaʻu ʻe he ngaahi timi ʻi heʻetau ʻū RTO ʻa e ʻū komipiuta, ko ha polokalama fakakomipiuta makehe, ʻū meʻangāue ki he hiki-leʻó, ʻInitaneti mo e ngaahi meʻa tefito hangē ko e vai, ʻuhila mo e alā meʻa pehē. Ko ha seti komipiuta anga-maheni ʻe taha ʻoku feʻunga nai ia mo e $750 ʻAmelika. Kuo fakahū ki he ngaahi komipiutá ʻa e ngaahi polokalama fakakomēsiale pea mo e polokalama ko e Watchtower Translation System, ʻa ia ʻoku tokoni eni ki he kau liliu-leá ke fokotuʻutuʻu ʻenau ngāué pea faingofua ʻenau maʻu ʻa e ngaahi maʻuʻanga fakamatalá.

ʻOku toe maʻu foki ʻe he kau liliu-leá ʻa e ʻū meʻangāue hiki-leʻo ke lava ʻo nau ngāueʻaki ʻi he ʻōfisí. Naʻe fakamoʻoniʻi ʻa e ʻaonga lahi moʻoni ʻa e ʻū meʻangāue ko ení ʻi he kamata tō ko ia ʻa e COVID-19, koeʻuhí ko e tokolahi ʻo e kau liliu-leá naʻe lava ke nau ʻave ʻa e ngaahi meʻangāué ni ki honau ʻapí pea hokohoko atu ai ʻa ʻenau hiki ʻa e liliu ʻo e ʻū meʻa ke pulusí mo e ʻū vitioó.

ʻOku faʻa tokoni ʻa e kau ngāue pole fakalotofonuá ki hono sivisiviʻi ʻa e ʻū tohi kuo liliú pea pehē ki hono tauhi mo tokangaʻi ʻa e RTO. “ʻOku maʻu ʻe he tokolahi ʻo e kau malangá mo e kau tāimuʻa tuʻumaʻú ʻa e faingamālie ke ngāueʻaki honau talēnití ʻi heni,” ko e lau ia ʻa Cirstin ʻa ia ʻoku ngāue ʻi ha RTO ʻi Cape Town, ʻAfilika Tonga.

ʻOku fiefia lahi ʻa e kau ngāue pole ko ení ʻi he monū ko iá. ʻOku pehē ʻe ha tuofefine ʻoku kau he tokoni ki ha RTO ko e ngāue ʻi aí ʻoku fakaivifoʻou moʻoni ia. Ko e niʻihi ʻo e fanga tokoua mo e fanga tuofāfine fakalotofonuá ʻoku nau ngāueʻaki honau leʻó ʻi he ʻū hiki-leʻó. ʻOku pehē ʻe Juana ko ha tokotaha liliu-lea Totonac ʻi Veracruz, Mekisikou: “Koeʻuhí ko ʻemau nofo ofi ange ki he kolo ʻoku leaʻaki ai ʻemau leá ʻoku faingofua ai ki he fanga tokouá mo e fanga tuofāfiné ke nau tokoni mai ki hono hiki ʻemau ʻū vitioó mo e ʻū hiki-leʻó.”

Kuo fakalakalaka nai ʻa e tuʻunga ʻo e liliu-lea ʻa e ʻū RTO? ʻOku pehē ʻe he laui miliona ʻo ʻetau kau lautohí ʻio. ʻOku fakamatala ʻe Cédric ʻa ia ʻokú ne ngāue fakataha mo e timi Kongo ʻi he Lepupilika Temokalati ʻo Kongó: “Naʻe faʻa ui ʻe he fanga tokouá mo e fanga tuofāfiné ʻemau founga liliu-leá ‘ko e lea faka-Kongo ʻo e ʻū tohi Taua Leʻó,’ he naʻe ʻikai ko e founga lea anga-maheni ia ʻo e koló. Ka ʻi he taimí ni, ʻoku nau pehē ko ʻetau ʻū tohí ʻoku liliu ia ʻi he lea fakaeonopooni ʻo Kongó ko e meʻa tofu pē ia ʻoku nau leaʻaki fakaʻahó.”

Ko Andile ʻokú ne ngāue mo e timi Kosá kuó ne fanongo ʻi he meʻa meimei tatau ʻi ʻAfilika Tonga ʻokú ne pehē: “ʻOku tala mai ʻe he tokolahi kuo nau fakatokangaʻi ʻa e fakalakalaka ʻi he liliú. Naʻa mo e kau leka naʻa nau faʻa lautohi ʻi he Taua Leʻo faka-Pilitāniá kuo nau lautohi eni ʻi he lea faka-Kosá. Pea tautefito ʻenau saiʻia ʻi he ongo fakanatula ʻa e Liliu Tohi Tapu Māmani Foʻoú kuo fakaleleiʻí.”

Ko e kotoa ʻo e ngaahi fakamole ki hono tokangaʻi ʻa e kau ngāue ʻi he ʻū RTO pehē ki hono fokotuʻu mo tauhi iá ʻoku poupouʻi ia ʻe he ngaahi tokoni loto-fiefoaki ki he ngāue ʻi māmani lahí ʻo kau ai mo e ngaahi tokoni ʻoku fakahoko ʻi he donate.jw.org.