Ko ha Kau Tau ʻOku Nau Laka!

“ʻOku mau nofo ʻi ha kiʻi kolo Pēlisi ʻa ia ʻoku langalanga hake, ʻo takatakaiʻi ʻe ha ngoue lahi. ʻI he pongipongi ʻe taha ʻi he taimi hivá nai, naʻe fakatūʻuta ai ʻi homau ʻapí ha kau tau. Naʻe ʻaukolo mai ai ha fuʻu fanga lō tokolahi ʻi he lalo matapaá pea ʻi he fanga kiʻi avaava kotoa pē, ko e kumi meʻakai. Naʻe ʻikai ha meʻa ne lava ke mau fai ka ko ʻemau mavahe mei homau ʻapí ʻi ha houa nai ʻe taha pe ua lolotonga ʻa hono kapu ia ʻe he fanga loó. ʻI he taimi naʻa mau foki mai aí, ne maʻa fakaʻaufuli ʻa e falé mei he fanga kiʻi ʻinisēkité.”

KI HE KAKAI TOKOLAHI ʻoku nofo ʻi he ngaahi fonua fakatalopiki hangē ko Pēlisí, ko ha meʻa anga-maheni eni ʻoku hoko pea ʻoku ʻikai ke kovi fakaʻaufuli. Ko ha founga ia ʻo hono toʻo mei he falé ʻa e fanga kiʻi ʻinisēkite maumaú hangē ko e fanga mongomongá mo e fanga kiʻi manu maumau kehé. Pea ʻoku ʻikai ke toe ai ha ʻuli.

Ko e meʻa ʻoku fakatupu mahuʻingaʻiá, ko e fanga lō ʻoku lāulea ki ai hení ʻoku ui kinautolu ko e fanga lō fakakautau koeʻuhí ko ʻenau founga moʻui mo e ngaahi ngāue hangē ha kau taú.a ʻI he ʻikai langa hanau nofoʻangá, ko e kau tau hikihiki holo ko ení, ʻoku laui kilu honau tokolahí, ʻoku nau faʻu ha ngaahi nofoʻanga fakataimi, ko e fuʻu fanga lō tokolahi ʻoku nau fepikitaki honau vaʻé ke faʻu ha puipui moʻui ʻo takatakai ʻi honau kuiní mo hono fāngangá. Mei he nofoʻangá, ʻoku fekauʻi atu ai ha ngaahi kulupu ʻo e fanga lō ʻi he ngaahi ʻotu lōloa ke nau kumi meʻakai, ʻo kau ki ai ʻa e fanga kiʻi ʻinisēkite mo e fanga kiʻi meʻamoʻui iiki, hangē ko e fanga mokó. Ko e kau taki ʻo e fanga lō fakakautaú ʻoku nau toe fakahoko ha meʻa ʻa ia ʻoku hā ko e ngaahi ngaʻunu fakatafaʻaki ke tauheleʻi ʻaki ʻa e meʻa ke kaí. ʻOku hoko ʻa e meʻá ni ʻi he taimi ʻoku ʻikai ai ha halanga nanamu ke muimui aí ʻo toumoua ai ʻa e kau ngāue takí pea nau taʻofi ʻa e ngaʻunú. Ko e fanga lō ʻi muí ʻoku nau tutui taʻetuku pē ki muʻa, pea ʻoku hoko ai ha mateke ʻi he ngaahi konga kehe ʻo e ʻotu muʻá, ʻo iku ai ki ha holongā ngaʻunu ʻoku tatau mo e ngaahi ngaʻunu fakatafaʻakí.

Ko e fanga lō fakakautaú ʻoku nau ngāue ʻi ha vahaʻa taimi ko e ʻaho ʻe 36, ʻo nau laka ʻi ha ʻaho nai ʻe 16 pea tuʻumaʻu leva ʻi he ʻaho ʻe 20, ʻa ia ʻi he lolotonga iá ʻoku fakatō ai ʻe he kuiní ʻa hono fuá. Hili iá, ʻoku fakatupunga ʻe he fiekaiá ʻa e koloniá ke toe hoko atu ʻenau laká. Ko ʻenau ngaahi ʻotu laká, ko e niʻihi ʻoku mita ʻe 10 ʻa hono fālahí, ʻoku fakakauʻā ʻaki ʻa e fanga hina ʻoku nau hola, ko e fanga sikopio, fanga mongomonga, fanga poto, mo e fanga moko pea ʻoku muimuiʻi ia ʻe he fanga manupuná, ʻa ia ʻoku nau pō ʻa e fanga kiʻi manu ko eni ʻoku holá kae hā mahino ʻoku ʻikai ko e fanga loó.

ʻI hono fakamatalaʻi ʻoku nau “poto he poto ange fau” ʻi he Tohitapú ʻi he Palovepi 30:​24, 25, ko e fanga loó ʻa e taha ʻo e ngaahi meʻa fakaofo ʻo e fakatupú.

[Fakamatala ʻi lalo]

[Fakatātā ʻi he peesi 25]

Lō fakakautau

[Maʻuʻanga]

© Frederick D. Atwood

[Fakatātā ʻi he peesi 25]

Faʻu ha halafakakavakava ʻaki hono fakafepikitaki honau vaʻé

[Maʻuʻanga]

© Tim Brown/www.infiniteworld.org