Ngaahi Founga ke Mapuleʻi Aí
“ʻI HEʻEMAU fakamoʻuí pē, naʻa mau sio ʻi ha meʻa pē naʻe hulu, ʻi he hokohoko ʻa e polokalamá,” ko e lau ia ʻa Claudine. “Naʻe ʻikai te mau tāmateʻi kae ʻoua pē kuo mau toki mohe.” ʻOku pehē ʻe he niʻihi: “ʻOku ʻikai pē lava ke u hanga kehe au mei ai,” pea pehē ʻe he niʻihi, “ʻOku ʻikai te u loto ke sio TV lahi ʻo hangē ko ia ʻoku ou faʻa faí, ka ʻoku ʻikai te u lava ʻe au ʻo taʻofi.” ʻOku fuʻu tōtuʻa ʻa hoʻo sio televīsoné? ʻOkú ke hohaʻa ʻo fekauʻaki mo e ikuʻanga ʻe lava ke fai ʻe he TV ki ho fāmilí? Ko e ngaahi fokotuʻu eni ʻe niʻihi ʻe lava ke ne tokoniʻi koe ke ke mapuleʻi ʻa hoʻo sió.
1. FEINGA KE ʻILOʻI ʻA E LAHI ʻO E MEʻA ʻOKÚ KE SIO AÍ. “Ko e fakapotopoto ʻoku ne fakakaukau ʻene laka,” ko e lau ia ʻa e Palovepi 14:15. ʻOku fakapotopoto ke ʻanalaiso ʻa hoʻo tōʻonga sió ke ʻiloʻi ai pe ʻoku totonu ke fai ha ngaahi feliliuaki. Tauhi ha tohinoa ʻi ha uike nai ʻe taha, ʻo tohiʻi ai ʻa e lahi ʻo e taimi ʻokú ke fakamoleki ʻi he sio TV. ʻE toe fiemaʻu nai ke ke hiki ʻa e ngaahi polokalama naʻá ke sio aí, meʻa naʻá ke akó mo e lahi ʻo e fiefia naʻá ke maʻu mei he ngaahi polokalama ko iá. Neongo ia, ko e meʻa tefitó, ko hono fikaʻi ʻa e lahi ʻo e taimi ʻokú ke fakamoleki ʻi he sio TV. Te ke ʻohovale nai ʻi he meʻa te ke ʻiloʻi aí. Ko hono ʻiloʻi pē ʻa e lahi ʻokú ke līʻoa atu hoʻo moʻuí ki he televīsoné ʻe ueʻi nai ai koe ke fai ha ngaahi feliliuaki.
2. FAKASIʻISIʻI ʻA HO TAIMI SIÓ. Feinga ke ʻoua ʻe sio TV ʻi he ʻaho ʻe taha ʻi he uike, ko ha uike kakato, pe ko ha māhina. Ko e toe fokotuʻu ʻe taha, ʻe fiemaʻu nai ke ke fokotuʻu ha ngaahi fakangatangata ki he taimi ʻo hoʻo sió ʻi he ʻaho taki taha. Kapau te ke tuʻusi ha haafe houa ʻo e sio TV ʻi he ʻaho taki taha, te ke maʻu ai ha houa lahi ange ʻe 15 ʻi he māhina kotoa pē. Ngāueʻaki ʻa e taimi ko iá ki he ngaahi ngāue mahuʻinga, hangē ko e tuli ki he ngaahi meʻa fakalaumālié, lau ha tohi lelei, pe fakamoleki ʻa e taimi mo e fāmilí pea mo e ngaahi kaumeʻá. Kuo fakahaaʻi ʻi he ngaahi fakatotoló ko e kakai ʻoku siʻi ʻenau sio TV ʻoku nau fiefia ange ʻi he kakai ʻoku nau sio lahi aí.
Ko e founga ʻe taha ke fakasiʻisiʻi ai ʻa e sio TV ko hono toʻo ʻa e televīsoné mei he loki mohé. Ko e fānau ʻoku ʻi ai ha TV ʻi honau lokí ʻoku nau fakamoleki ʻa e meimei houa ʻe taha mo e konga lahi ange ʻi he ʻaho he sio TV ʻi he fānau ko ia ʻoku ʻikai haʻanau TV. ʻIkai ko ia pē, ʻi he taimi ʻoku ʻi ai ai ha TV ʻi he loki ʻo ha kiʻi leká, ʻoku ʻikai ke ʻiloʻi ʻe he ongo mātuʻá ia ʻa e meʻa ʻoku sio ai ʻa e kiʻi leká. Ko e ngaahi mātuʻá mo e ngaahi hoa malí te nau ʻiloʻi ʻe lahi ange ʻa e taimi te nau maʻu ke nau feohi aí kapau te nau toʻo foki ʻa e TV mei honau loki mohé. ʻI he fili ʻa e niʻihi, kuo nau fakapapauʻi ai ke ʻoua ʻaupito ʻe ʻi ai ha TV ʻi ʻapi.
3. FAKATAIMITĒPILEʻI ʻA E MEʻA ʻOKÚ KE SIO AÍ. Ko e moʻoni, ʻoku lahi ʻa e ngaahi polokalama lelei ke sio aí. ʻI he ʻikai fefokiʻaki holo ʻi he ngaahi sēnoló pe sio ʻi ha meʻa pē ʻoku hulu maí, vakaiʻi ki muʻa ʻa e meʻa ʻoku ʻi he fakahokohokó ke filifili ʻa e ngaahi polokalama ʻokú ke loto ke sio aí. Fakamoʻui ʻa e TV ʻi he taimi ʻoku kamata ai ʻa e polokalama kuó ke filí, pea tāmateʻi ʻa e TV ʻi heʻene ʻosí. Pe ʻi he ʻikai sio ʻi ha polokalama ʻi he taimi ʻoku haʻu aí, te ke fiemaʻu nai ke hiki ia ke toki sio ai ʻamui. ʻE ʻai ai ke malava ʻo toki sio ai ʻi ha taimi faingamālie ange pea leleʻi vave ke ʻosi ʻa e ngaahi meʻa fakakomēsialé.
4. FILIFILI. Naʻe tomuʻa tala ʻe he Tohi Tapú ko hotau taimí ʻe fakaʻilongaʻiʻaki ia ʻa e kakai ʻa ia ko e kau “ʻofa kiate kinautolu pe, te nau ʻofa ki he paʻanga, te nau fielahi, te nau angataʻetokaʻi, te nau lea fieʻotua, te nau talangataʻa ki he matuʻa; ko e kau taʻehounga, ko e kau angataʻemolumalu, ko e kau taeʻofa-ki-hoʻota, ko e kau taʻe fakamolemole, ko e kau fakakovi, ko e kau taʻefakamaʻumaʻu, ko e kau angafakamanu, ko e kau taeʻofa ki he lelei, ko e kau lavaki, ko e kau ʻohonoa, ko e kau loto ʻaoʻaofia ʻi he ʻafungi, ko e kau ʻofa ki he malie ʻo ʻikai ʻofa ki he ʻOtua.” Ngalingali te ke loto-tatau ʻoku pehē tofu pē ʻa e faʻahinga ʻoku ʻasi ʻi he televīsoné. “Ki he kakai pehe,” ʻoku naʻinaʻi mai ʻa e Tohi Tapú, ke “fulituʻa” meia kinautolu. (2 Timote 3:1-5) “ʻOua naʻa takihalaʻi koe,” ko e fakatokanga mai ia kia kitautolú, “ko e ngaahi feohi koví ʻokú ne maumauʻi ʻa e ngaahi ʻulungāanga leleí.”—1 Kolinito 15:33, NW.
Ko e filifilí ʻoku kau ki ai ʻa e mapuleʻi-kita. Kuó ke sio ʻi ha taimi ʻi he ʻuluaki ngaahi miniti siʻi ʻo ha tulama pe faiva, pea neongo naʻá ke ʻiloʻi naʻe taʻetaau, naʻá ke sio ʻi he foʻi filimí kotoa ke ʻiloʻi pe ko e hā naʻe hokó? Kuo pehē ʻa e tokolahi. Kae kehe, kapau ʻokú ke maʻu ʻa e fakapapau ke tāmateʻi ʻa e TV koeʻuhi ke ke lava ʻo fai ha meʻa kehe, ʻoku ngalingali te ke ʻiloʻi ai ʻoku ʻikai moʻoni te ke tokanga ki he meʻa naʻe hokó.
Naʻe tohi fuoloa ki muʻa ʻe he tokotaha-tohi-sāmé ʻi hono fuofua ʻiloʻi ʻo e televīsoné: “E ikai teu tuku ha mea kovi i hoku ao.” (Sāme 101:3, PM) Ko ha taumuʻa lelei ia ke tau manatuʻi ʻi he taimi ʻoku tau fili ai ʻa e meʻa ke sio aí! Ko e niʻihi, hangē ko Claudine, kuo nau fili ke toʻo ʻosi ʻenau televīsoné. Naʻá ne pehē: “Naʻe ʻikai ʻaupito te u ʻiloʻi ʻa e lahi ʻo hono fakaongonoaʻi au ʻe he TV. ʻI he taimi ʻoku ou maʻu ai he taimí ni ʻa e faingamālie ke sio TV, ʻoku ou ʻohovale he ngaahi meʻa naʻe ʻikai te ne fakahohaʻasi au ki muʻá. Naʻá ku faʻa fakakaukau naʻá ku fakapotopoto ʻi he meʻa naʻá ku sio aí, ka ʻoku ou ʻiloʻi he taimí ni naʻe ʻikai. ʻI he taimi ʻoku ou sio ai he ngaahi meʻa leleí, ʻoku ou fiefia lahi ange ai.”
[Fakatātā ʻi he peesi 8]
Tohiʻi ʻa e lahi ʻo e taimi ʻokú ke fakamoleki ʻi he sio TV
[Fakatātā ʻi he peesi 8]
Fetongi ʻa e sio TV ʻaki ʻa e ngāue mahuʻinga
[Fakatātā ʻi he peesi 9]
ʻOua ʻe toumoua ke tāmateʻi ʻa e TV!