Te Ke Lava ʻo Ngāue kia Sihova ʻi he Tuʻunga ko ha Taaimuʻa?

¹ ʻI he Fakataha Fakavahe ko e “Kau Tapua Atu ʻo e Maama” ʻi he taʻu kuo ʻosí, naʻe ʻeke ai ʻe ha tokotaha-malanga: “Te ke lava ʻo ngāue ko e taaimuʻa? Te ke loto ke taaimuʻa?” Naʻá ne fakahā ʻa e kaunga ʻo e ongo fehuʻí ni koeʻuhi ko e fuʻu ofi mai ʻa ʻĀmaketoné, pea ʻokú ne ʻai ai ʻa e ngāue fakamalangá ke toe fakavavevave ange ia ʻi ha toe taimi ki muʻa.​—1 Kolinitō 7:29a.

² ʻOku ʻikai ke toe fehuʻia ko e ngāue taaimuʻá ko e ngāue lahi. ʻOku fiemaʻu ke te puleʻi-kita mo fokotuʻutuʻu maau lelei. Ka, ko ʻetau ngāue ʻi he ngāue fakamalangá “ʻoku ʻikai ko ha laufanō ia.” (1 Kolinitō 15:58) ʻE lava ke tau pehē ʻoku pehē mo e ngaahi ngāue kehe ʻa ia ʻoku tau fili nai ke tulitāupau ki ai pea fakamoleki hotau taimí mo hotau iví ki ai? ʻOku ueʻi ʻa e kau Kalisitiané ʻe he ʻofa kia Sihová ke nau faivelenga ʻi heʻene ngāué, pea ko e faivelenga ʻi he ngāue ʻa Sihová kuó ne taki ʻa e tokolahi ki he ngāue taaimuʻa.​—1 Sione 5:3; Fakahā 4:11.

³ ʻOku tokolahi ʻa e kau sevāniti kei talavou ʻa Sihova kuo nau toki nofo mei he ngaahi ako māʻolungá ʻoku nau fakakaukau fakamākukanga ʻo kau ki he ngāue taaimuʻá. ʻOku mātuʻaki feʻungamālie ia. Ko e hā mo ha toe ngāue pe taumuʻa ʻe toe mahuʻinga ange ʻi he ngāue fakamalanga taimi-kakató? (Mātiu 6:33) Kuo pau ke malangaʻi ʻa e ongoongo lelei ʻo e Puleʻanga ʻo e ʻOtuá; ko e ngāue ia ʻa Sihova, pea ko ha monū ē ke femoʻuekina ai mei he taimi kei talavoú ʻo faai atu!​—Mātiu 24:14.

⁴ ʻOku hanga ʻe kimoutolu ngaahi mātuʻa ʻo fakalototoʻaʻi hoʻomou fānaú ke nau kau ki he ngāue fakafaifekau taimi-kakató? ʻOku mahino lelei ki hoʻomou fānaú ʻokú mo fiemaʻu kinautolu ke nau ngāueʻaki ʻa e kotoa ʻo honau lotó, soulú, fakakaukaú, mo e iví ʻi he ngāue ʻaonga ko ʻení? (Maʻake 12:30) ʻOku tokolahi ʻa e kau malanga kei talavou ʻoku nau teuteuʻi kinautolu ki he ngāue taaimuʻa tuʻumaʻú ʻaki ʻenau kau ki he taaimuʻa fakataimí ʻi he faingamālie kotoa pē lolotonga ʻo e ngaahi taʻu ʻoku nau ako aí. ʻOku pau ko e mateaki pehē kia Sihová ʻokú ne ʻai ke māfana ai hono lotó!​—Palōvepi 27:11.

⁵ Ko e moʻoni, ʻoku ʻikai ke maʻu ʻe he tokotaha kotoa pē ha tuʻunga ke malava ai ke ngāue taaimuʻa. Kaekehe, tatau ai pē pe ʻokú ke nofo mali pe taʻemali, kei talavou pe taʻumotuʻa, kuó ke fai ha fakakaukau fakamātoato mo faʻa lotu ʻo kau ki he ngāue kia Sihova ʻi he tuʻunga ko ha faifekau taaimuʻa ʻo e ongoongo leleí? (Kolose 3:23) ʻOku tokolahi ʻa e ngaahi hoa mali kei talavou ʻoku nau feinga ke fakalahi ʻenau ngāue fakamalangá koeʻuhi ke na lava fakatouʻosi pe ko e tokotaha pē ʻiate kinaua ke taaimuʻa.

⁶ Kapau ʻoku ʻikai te ke ʻi ha tuʻunga ke taaimuʻa tuʻumaʻu ʻi he taimí ni, te ke lava ʻo hoko ko ha taaimuʻa fakataimi? ʻOku hangehangē ʻoku tokolahi ʻa e kau malanga ʻi hoʻo fakatahaʻangá ʻoku nau palani ke fai ʻa e meʻá ni he lolotonga ʻo ʻEpelelí. Te ke lava ʻo kau mo kinautolu? Neongo ko e kotoa ʻo e kau sevāniti mateaki ʻa Sihová ʻoku lahi ʻa e ngaahi tāpuaki ʻoku nau maʻú, ka ʻoku ʻi ai mo e ngaahi tāpuaki lahi ange ke maʻu ʻe kinautolu ʻoku nau ʻi ha tuʻunga ke fakamoleki ha taimi lahi ange ʻi he ngāue fekauʻaki mo e Puleʻangá ke fekumi atu kiate kinautolu ʻoku hangē ha sipí.​—Ngāue 20:35.