Hanganaki Pehē: “Haʻu!”
1 Ko ha tokonaki fakaofo ē kuo fai ʻe Sihova ʻo fakafou mai ʻi he feilaulau huhuʻi ʻa Sīsū! ʻOku tau maʻu ʻi he meʻa ko ʻení ʻa e makatuʻunga ki he meʻa kotoa pē ʻoku fiemaʻu ke ne ʻai ʻa e kakaí ke nau fiefia moʻoní. (Sione 3:16) Kaekehe, ʻoku fakamamahi ke leaʻaki, ko e tokosiʻi ʻaupito kuo nau ʻilo mo tui fakamakatuʻu ki he moʻoni ko ʻení. Ka neongo ia, ʻi heʻene tokanga ʻofa ki he faʻahinga ʻo e tangatá, kuo fokotuʻutuʻu ai ʻe Sihova ke ʻai ʻa e ongoongo leleí ni ke ʻilo ʻe he kakai ʻi he feituʻu kotoa pē. Fakafou mai ʻi hono ʻAló, ko Sīsū Kalaisi, kuó ne fakaʻatā ki he tokotaha kotoa pē ʻa e faingamālie ke maʻu ʻa e fiefia mo e ʻamanaki ʻo e moʻui taʻengatá.—Sione 17:3.
2 ʻI he ngaahi laui afeʻi taʻu, ko e ʻiloʻanga ʻo e Tokotaha ʻa ia te ne huhuʻi ʻa e faʻahinga ʻo e tangatá mei he angahalá mo e maté naʻe ʻikai ke ʻilo ia. Ko ha “fakalilolilo toputapu” ia kaeʻoua ke haʻu ʻa Kalaisi Sīsū ʻo “ne huluhulu ʻa e moʻui mo e taʻeʻauha ʻaki ʻa e Kosipeli.” (Loma 16:25; 2 Tīmote 1:10) Naʻe fai ʻe he kau muimui ʻo Sīsuú ʻa hono fanongonongo ʻa e ongoongo lelei ko ʻení ʻi he ʻuluaki senitulí; ko kitautolu ʻoku tau moʻui ʻi he ngaahi taimi ʻo onopooní ʻoku tau maʻu ʻa e faingamālie lahi ange ʻo hono fanongonongo ʻo e ongoongo lelei tatau pē ko ʻení. ʻI heʻetau malangaʻi ʻa e pōpoaki ʻo e Puleʻangá, ʻoku tau kau mo Sihova ko e ʻOtuá, mo Sīsū Kalaisi, mo e ngaahi tokoua ʻo Kalaisí, ʻa ia ʻoku nau fakaafeʻi ʻa e kakai mei he ʻalunga kotoa pē ʻi he moʻuí ʻaki ʻenau pehē: “Haʻu! . . . toʻo taʻetotongi ʻa e Vaiola.”—Fakahā 22:17.
3 Ko e moʻoni, ʻe ʻikai ke tali ʻa e ongoongo leleí ʻe he tokotaha kotoa pē. Ko e tokosiʻi ʻaupito te nau tokanga ki aí. Ko e niʻihi te nau anga taʻefakaʻapaʻapa ʻo tali tekeʻi ʻa e kau sevāniti ʻa e ʻOtuá, ʻa ia ʻoku nau fakaafeʻi kinautolu ke nau maʻu ʻa e ʻaonga mei he vai foaki-moʻui ʻo e moʻoní. Ka neongo ia, ko e ivi meia Sihova, ʻoku tau kītaki ai ʻi he ngāué ni. ʻOku tau ʻilo ko ʻetau loto-lelei ke leaʻaki ʻa e moʻoní pea mo tokoniʻi ha taha pē ʻe fie fanongó ʻoku fakahōifua ia kia Sihova pea ʻoku maʻu ai ʻa ʻene tāpuakí.
4 Neongo te tau tuʻuaki ʻa e polosiua Vakai! ʻi heʻetau ngāue fakamalanga ki Māʻasí, te tau fakalototoʻaʻi ʻa e faʻahinga ʻoku mahino ki ai ʻa e lea faka-Pilitāniá ke nau lau ʻa e tohi ko e Revelation Climax ʻo maʻu ʻa e fiefia ʻi he ʻamanaki ʻoku fakahā mai aí. Te nau maʻu ai ʻa e ngaahi tāpuaki lahi ʻi he fai peheé. ʻIkai ko ia pē, ko e tohi Fakahā ʻoku fekauʻaki mo e kahaʻú—ko honau kahaʻú mo hotau kahaʻú. Ko e niʻihi kuo nau hoko he taimí ni ko e kau sevāniti fakatapui ʻa Sihová ko ʻenau ʻuluaki mahuʻingaʻia ʻi he moʻoní ʻi he ʻosi ʻenau lau ʻa e ngaahi fakamatala ʻo e tohi Fakahaá ʻi ha taha ʻo e ngaahi tohi kuo pulusi ʻe he Sōsaietí. ʻI heʻetau maʻu ʻi heʻetau ngāue fakamalangá ʻa e faʻahinga loto-totonu ʻa ia ʻoku nau fiekaia ki he moʻoní, te tau lava ke feinga ke fakahā atu ha meʻa mahuʻinga ʻe taha pe ua mei he tohi Revelation Climax ke fakahā kiate kinautolu ʻa hono mahuʻingá. ʻI he lotolotonga ʻo e ngaahi meʻa kehe, ʻe lava ke tau fakahā ʻa e ngaahi fakamatala mahino ʻo e ngaahi kikite faka-Tohitapu kuo fakahoko ʻi he senituli hono 20 ni, ʻo hangē ko e fakatātā fakaofo ʻo e kau heka hoosi fakaefakatātā ʻoku fakamatalaʻi ʻi he vahe hono ono ʻo e tohi Fakahā vahe 6.
5 ʻOku mātuʻaki feʻungamālie kiate kitautolu ke talanoa ʻo fekauʻaki mo e ngaahi tokonaki ʻofa ʻa Sihova ki he faʻahinga ʻo e tangatá koeʻuhi he ʻoku tau teuteu ke fai ʻa e Fakamanatu ʻo e pekia ʻa Kalaisí ʻi ʻEpeleli 6. Tatau ai pē pe ʻe tali ʻe he kakaí pe ʻikai, ʻoku tau kītaki ʻi heʻetau ngāue kuo vaheʻi mei he ʻOtuá ke fakalahi ʻa e fakaafe ki ha tokotaha pē ʻoku fie haʻu: “Haʻu! . . . toʻo taʻetotongi ʻa e Vaiola.”