Tokoniʻi Kinautolu ke Nau Ngāue ʻo Fakatatau ki he Pōpoakí
1 ʻOku fakahoko atu ʻe heʻetau ngāue fakamalangá ha faingamālie ki he kakaí ke nau “fanongo ki he ngaahi lea ʻo e palofisai.” (Fkh. 1:3) Ka ʻo kapau te nau fie hao moʻui atu ʻi he “mamahi lahi,” kuo pau ke nau toe ngāue ki ai. (Fkh. 7:14) ʻOku fekauʻaki mo e moʻuí! Ko ia ai, fakapapauʻi ke toe ʻaʻahi ki he faʻahinga naʻe kamata ke hā mei ai ha fie fanongo ʻi he taha ʻo e ngaahi founga malanga naʻá ke ngāueʻaki ʻi he māhina ko ʻení.
2 Kapau naʻá ke tuku ʻa e tohi ko e “Moʻui Taʻengatá,” te ke lea pehē ni nai:
◼ “ʻOku ou fiefia ke toe sio kiate koe. Ko e taimi fakamuimui naʻá ta talanoa aí, naʻá ta talanoa ʻo kau ki he niʻihi ʻo e ngaahi kikite ʻi he Tohi Tapú ʻo fekauʻaki mo e ‘kuonga fakamui,’ pea naʻá ku tuku atu kiate koe ha tohi ʻokú ne fakamatalaʻi ʻa e ngaahi kikite ko iá. Mahalo pē naʻá ke fakatokangaʻi neongo ʻoku ʻuhinga loloto ʻa e Tohi Tapú, ka ʻoku malava pē ke mahino ia ʻi he fakakaukau atu ki he ngaahi meʻa ʻoku lolotonga hokó ʻaki hono ngāueʻaki ha ngaahi moʻoni tefito ʻe niʻihi mei he Tohi Tapú. ʻOku ou fie lave ʻi ha ngaahi miniti siʻi ki ha ngaahi meʻa ʻe niʻihi ʻoku fakahā mai ʻe he Tohi Tapú kiate kitautolu ʻo fekauʻaki mo hotau taimí.” Huke leva ki he konga feʻunga mālie ʻo e tohi ko e Moʻui Taʻengatá ʻa ia ʻoku malava ke ke ngāueʻaki ki hono kamata ha ako Tohi Tapu ʻi ʻapi.
3 Kapau naʻá ke tuku ʻa e tuleki ko e “ʻE Kei Tuʻu ʻa e Māmani ko Ení? ʻi hoʻo ʻuluaki ʻaʻahí, te ke lea pehē ni nai:
◼ “ʻOku ou fiefia ʻi heʻeku maʻu mai koe ki ʻapí ni he ʻaho ní. ʻI heʻeku ʻaʻahi fakamuimui mai kiate koé, naʻá ta talanoa ai ʻo fekauʻaki mo e ngaahi meʻa ʻoku hoko ʻa ia ʻoku nau faʻu ha fakaʻilonga ʻe hā ki muʻa pē ʻi he ngataʻanga ʻo e māmaní. [Toe vakai ki he ngaahi tafaʻaki feʻunga mālie ʻo e fakaʻilongá ʻi he Mātiu 24:3-14.] Kuó ke fakatokangaʻi ha meʻa kuo hoko ki muí ni mai ʻi he māmaní pe ʻi hotau feituʻú ʻokú ke fakakaukau ko hano fakahoko ia ʻo e konga ʻo e fakaʻilonga ko iá?” Fakamatala ki hono fakahoko ʻo e niʻihi ʻo e ngaahi kikite faka-Tohitapú ni ʻaki ʻa e ngaahi fakatātā ʻi he vahe 18 ʻo e tohi ko e Moʻui Taʻengatá. ʻI he fakaʻosi ʻo e ʻaʻahí, lave ki he kaveinga ʻo e malanga fakahāhā ki he uike ko iá, pea fakahoko atu ha fakaafe ke mo fetaulaki ai ki he Kingdom Hall.
4 Kapau naʻá ke fakaafeʻi ʻa e toko taha ʻapí ki he Fakamanatú, te ke pehē:
◼ “ʻI heʻeku ʻaʻahi fakamuimui mai kiate koé, naʻá ta talanoa ʻo kau ki hono mahuʻinga lahi ʻo e pekia ʻa Sīsuú ki he faʻahinga ʻo e tangatá. Naʻá ku toe fakaafeʻi ai koe ke ke maʻu ʻa e Fakamanatu ʻo ʻene pekiá, ʻa ia ʻe fai ʻe he kau Kalisitiané ʻi māmani kotoa ʻi Maʻasi 26. Kuó u haʻu he ʻahó ni ke fakamanatu kiate koe ʻoku fakaafeʻi koe ki he meʻa mahuʻinga ko iá. [Fakahā ʻa e taimi mo e feituʻu ʻo e Fakamanatú.] ʻE tokoni nai kiate koe ke ke houngaʻia ʻi he mahuʻinga ʻo e meʻá ni ʻo kapau te ta toe vakai ki he niʻihi ʻo e ngaahi tāpuaki ʻoku tau maʻu ʻi he taimí ni ko e ola ia ʻo e meʻa naʻe fai ʻe Sīsū maʻá e faʻahinga ʻo e tangatá, pea toe pehē ki he ngaahi tāpuaki ʻoku teʻeki ai ke hoko maí.” Pea feinga leva ke fakamatala ki ha ngaahi poini feʻunga mālie mei he taha ʻo e ngaahi makasini ʻoku lolotonga maʻú pe mei he vahe 19 ʻo e tohi ko e Moʻui Taʻengatá. Te ke toe fakaeʻa nai ʻa e ngaahi fakatātā ʻi he peesi 156-158 mo e 161-162. Kapau ʻoku malava, fai ha ngaahi fokotuʻutuʻu ke tokoni ki he toko taha ʻoku fie fanongó ke ne maʻu ʻa e Fakamanatú.
5 Kapau ko ha toko taha naʻe fie fanongo lelei pē, ʻe ola lelei nai ʻeni:
◼ “Naʻá ku fiefia lahi ʻi heʻeta talanoa fakamuimui ʻo kau ki he Tohi Tapú. ʻOku ou foki maí koeʻuhi ʻoku ou saiʻia ke ke maʻu ʻa e fiefia ʻi he meʻa kuo talaʻofa mai ʻe he ʻOtuá maʻá e faʻahinga ʻoku nau loto ke ako lahi ange ʻo kau kiate iá.” Lau ʻa e Sione 17:3, pea lave ki he tuleki ko e Moʻui ʻi ha Māmani Foʻou Melino.
6 ʻOfa ke hanga ʻe hoʻo ʻofa ki he moʻuí mo hoʻo houngaʻia ki he huhuʻí ʻo ueʻi koe ke ke fai ha ngaahi toe ʻaʻahi ki he faʻahinga fie fanongó. Tokoniʻi kinautolu ke nau ngāue ʻo fakatatau ki he pōpoaki fakatupu-fiefia ʻi he Tohi Tapú ʻo fekauʻaki mo e “kuonga fakamui.” Manatuʻi, “kuo panaki hono taimi”!—Fkh. 1:3.