Talaki ʻa e Pōpoaki Fakatupu-Fiefia Fekauʻaki mo e “Kuonga Fakamui”
1 Kuo tokoniʻi kitautolu ʻe he tohi ko e Moʻui Taʻengatá ke tau maʻu ʻa e mahino fekauʻaki mo e pōpoaki fakatupu-fiefia naʻe hiki ʻi he Tohi Tapú ʻo fekauʻaki mo e “kuonga fakamui.” Tokoniʻi ʻa e niʻihi kehé ke nau maʻu ʻa e mahino ki hono kaunga ʻo e pōpoaki ko iá kiate kinautolú ʻaki hono tuʻuaki atu ʻa e tohí ni ʻi he ngāue fakamalangá he lolotonga ʻo Maʻasí. Te ke ʻilo nai ʻe ʻaonga ʻa e ngaahi fokotuʻu ko ʻeni ʻoku hoko haké ʻi hono teuteu ʻa hoʻo fakamatala ʻe faí.
2 ʻI he hili hano fai ha fakafeʻiloaki feʻunga mālie, te ke lea pehē ni nai:
◼ “Kuó ke fanongo ʻi ha taimi ʻo fekauʻaki mo e “kuonga fakamui”? [Tuku ke ne tali.] Kuo ʻi ai ha ngaahi fakamatala kehekehe ʻo fekauʻaki mo hono ʻuhingá. Ka naʻá ke ʻilo naʻe kikiteʻi ʻi he ngaahi kikite ʻi he Tohi Tapú ʻa e meʻa ko ia kuo hoko ʻi hotau taimí pea ʻoku lave ai ki he vahaʻa taimi ko ʻení ko e “kuonga fakamui”? [Tuku ke ne tali.] Te ke saiʻia ke maʻu ha mahino pe ko e hā ʻa e ʻuhinga ʻo e meʻá ni kiate kitautolú?” Kapau ʻoku hā mai ha fie fanongo moʻoni, ʻe lava ke ke fakahanga ʻa e tokangá ki he ngaahi fakatātā ʻi he vahe 18 ʻo e tohi ko e Moʻui Taʻengatá pea fakafehokotaki mo e niʻihi ʻo e ngaahi veesi ʻoku tohi mataʻitohi matolú. Pe te ke ngāueʻaki ʻa e tuleki ko e ʻE Kei Tuʻu ʻa e Māmani ko Ení? Kapau ʻoku hā mai ha fie fanongo, tuʻuaki ʻa e tohí pe fokotuʻutuʻu ke toe ʻaʻahi ki ai ke fai ha fetalanoaʻaki lahi ange.
3 Pe te ke saiʻia nai ke ʻahiʻahi ʻa e founga ʻo hangē ko ʻení:
◼ “Kuó ke fanongo fekauʻaki mo e kupuʻi lea ko e ‘ʻĀmaketone’? [Tuku ke ne tali.] Kuo fakakaukau ʻa e tokolahi ʻoku lave ia ki ha fakaʻauha ʻi ha tau fakaniukilia ʻi he vahaʻa ʻo e ngaahi mafai fakamāmani lalahí, ka ʻoku hā ngalingali kuo hōloa ʻa e fakamanamana ko iá talu mei he ngataʻanga ʻo e fakafili fakapolitikale ʻi he vahaʻa ʻo e ongo puleʻanga mālohí. Ko hono moʻoní, ʻoku kehe ʻaupito ʻa ʻĀmaketone ia. Fakatatau ki he Tohi Tapú, ʻe ʻuhinga iá ko ha ngaahi liliu lahi ʻe fakahoko mai ai ha fakalelei, ʻo iku atu ki ha māmani melino tuʻuloa.” Fakatuʻunga ʻi he anga ʻo e tali ʻa e toko tahá, ʻe lava ke ke fakahanga ʻa e tokangá ki ha konga Tohi Tapu ʻo hangē ko e tohi Fakahā 16:16 pe Sāme 37:10, 11 pea fakahanga leva ʻene tokangá ki he vahe 19 ʻo e tohi ko e Moʻui Taʻengatá. Kapau ʻoku hā mai ha fie fanongo moʻoni, te ke saiʻia nai ke tuʻuaki atu ʻa e tohí. Ka ʻikai ia, te ke loto nai ke fai ha lave ki ha ngaahi poini feʻunga mālie ʻi he tuleki ko e ʻE Kei Tuʻu ʻa e Māmani ko Ení?
4 Te ke malava nai ke fakatupunga ha fie fanongo ʻaki hono ngāueʻaki ʻa e fokotuʻú ni:
◼ “ʻI he vahaʻa taimi ko eni ʻo e taʻú, ʻoku fakakaukau ʻa e tokolahi ʻi māmani kātoa ʻo fekauʻaki mo e pekiá pea mo e toe tuʻu ʻa Sīsū Kalaisí. Naʻá ke fifili nai ʻi ha taimi pe ko e hā kuó ne fai talu mei heʻene toe tuʻú? ʻOku lahi ʻa e ngaahi meʻa fakatupu-fiefia ʻoku hoko ʻi hotau taimí ʻoku fehokotaki mo e ngafa lolotonga ʻo Sīsū ʻi he taumuʻa ʻa e ʻOtuá. Ko e niʻihi ʻo e ngaahi meʻá ni ʻoku fakamatalaʻi ʻi he tohi Fakahaá. Te ke saiʻia ke ako lahi ange ʻo fekauʻaki mo e taumuʻa ʻa e ʻOtuá ʻi heʻene fekau hifo hono ʻAló ki he māmaní pea mo e kaunga ʻo e meʻa ko iá kiate koe pea mo e faʻahinga ʻokú ke ʻofa aí?” Te ke malava nai ke fakahanga ʻa e tokangá ki he palakalafi 18 pea mo e fakatātā ʻi he peesi 119 ʻo e tohi ko e Moʻui Taʻengatá pe ko hoʻo fakaeʻa ʻa e ngaahi poini feʻunga mālie mei he ngaahi tatau lolotonga ʻo e Ko e Taua Leʻó pe Awake! Pe te ke saiʻia nai ke ngāueʻaki ʻa e tuleki ko e Moʻui ʻi ha Māmani Foʻou Melinó ke langaʻi ha toe fie fanongo lahi ange.
5 Fakapapauʻi ke fakaafeʻi ha taha pē ʻoku hā mei ai ha fie fanongó ke ne maʻu ʻa e Fakamanatú. ʻI he tāpuaki ʻa Sihová, te ke malava nai ke tokoni ki ha taha kehe ke ne “fanongo ki he ngaahi lea ʻo e palofisai ni, mo tauhi ʻa e ngaahi meʻa kuo tohi ai.”—Fkh. 1:3.