Ngāueʻaki ʻa e Tohi Foʻoú ke Tokoniʻi ʻa e Niʻihi Kehé
1 Naʻa tau fiefia kotoa ʻi he taʻu kuo ʻosí ʻi hono maʻu ʻa e tohi foʻou ʻi he lea faka-Tonga, Fāʻūtaha ʻi he Lotu ki he ʻOtua Moʻoni Pē Taha. ʻOku fai ha fakamatala ʻi he peesi 2 ʻo e tohi ko ia: “ ʻOku laui miliona ʻa e faʻahinga kuo nau maʻu ha ʻilo ki ha ngaahi tefitoʻi akonaki faka-Tohitapu. Ka ʻoku fiemaʻu kiate kinautolu ke nau tutui atu ki he tuʻunga matuʻotuʻa faka-Kalisitiané ke aʻusia ki he kakato tahá ʻa e fiefia ʻo e kau ʻi he lotu fāʻūtaha ki he ʻOtua moʻoní. Kuo teuʻi ʻa e tohí ni ke tokoni ki he faʻahinga peheé kotoa ke fakalahi mo fakaloloto ʻenau mahino fekauʻaki mo e Folofola ʻa e ʻOtuá pea ke ngāuekakatoʻaki ange ia ʻi heʻenau moʻuí.” Talu mei heʻetau maʻu ʻa e tohí ni kuo tau ʻoatu nai ia ki ha tokotaha ʻe lava ke ne maʻu ha ʻaonga mei ai ʻi he founga ko ia?—Pal. 3:27.
2 ʻE ola lelei nai ʻa e lea-kamatá ni:
◼ “Ko e taú, hongé, mo e mahakí kuo nau fakahohaʻasi ʻa e faʻahinga ʻo e tangatá ʻi he senituli hono 20 ni. ʻOku anga-fēfē ʻa e hoko ʻa e meʻá ni he kuo fai ʻe he tangatá ʻa e fakalakalaka fakatekinikale lahi? [Tuku ke ne tali.] Kuo ʻohovale ʻa e tokolahi ʻi hono ʻilo ko e ngaahi meʻá ni kotoa pē naʻe ʻosi kikiteʻi ia ʻi he Tohi Tapu. Ngalingali ʻokú ke maheni mo e kupuʻi lea ‘ko e ngaahi ʻaho fakaʻosi.’ ʻOkú ke tui ʻoku tau lolotonga moʻui ʻi he ‘ngaahi ʻaho fakaʻosí’? [Tuku ke ne tali.] ʻOku tala mai ʻe he Tohi Tapú kiate kitautolu ʻoku totonu ke tau mahuʻingaʻia ʻi he vahaʻa taimi ko ʻení.” Lau ʻa e Luke 21:34-36 pea huke ki he peesi 177 ʻi he tohi Fāʻūtaha ʻi he Lotu. Kapau ʻoku mahuʻingaʻia, tuʻuaki ʻa e tohí.
3 Mahalo ko e fehuʻi ko ʻení ʻe langaʻi nai ai ha fetalanoaʻaki lelei:
◼ “Ke toʻo atu ʻa e ngaahi tuʻunga kovi ʻi he māmaní ko e hā e meʻa ʻokú ke pehē ʻe fiemaʻú? [Tuku ke ne tali.] ʻOku pehē ʻe he kakai tokolahi ʻoku ʻi ai ʻa e fiemaʻu ki he ngaahi liliu lahi kae toe taulanga ʻa e māmani. ʻOku fakahā ʻi he Tohi Tapú ʻoku ʻilo ʻe he ʻOtuá ʻa hono fakaleleiʻi ʻa ʻetau ngaahi palopalemá pea kuó ne talaʻofa ke tokoniʻi kitautolu.” Sio ki he tohi Fāʻūtaha ʻi he Lotu, peesi 83, pea lau ʻa e 2 Pita 3:13 ʻi he palakalafi 12. Huke ki he fakatātā ʻi he peesi 84 mo e 85, pea fakahaaʻi ʻa e ngaahi tāpuaki ʻe hoko ʻi he malumalu ʻo e Puleʻanga ʻe pule ai ʻa Kalaisí. Pea fakamatala ki he anga ʻo ʻenau maʻu ha ʻaonga tāutaha. Kapau ʻoku lelei ʻa e talí tuʻuaki ʻa e tohí ke tuku.
4 Kapau ʻoku moʻua ʻa e tokotaha ko iá pe ʻoku ʻikai te ke fakapapauʻi pē ʻoku mahuʻingaʻia, te ke tuku nai ha makasini pe ko ha tuleki. ʻI haʻo toe ʻaʻahi pea hā mai ʻa e mahuʻingaʻiá, ʻe lava ke tuʻuaki ʻa e tohí.
5 ʻOfa ke hoko ʻa ʻetau ngāueʻaki ʻa e tohi lelei ko ʻení ke malava ai ʻe ha tokolahi ange ke ʻinasi mo kitautolu ʻi he fiefia moʻoni ʻoku maʻu mei he lotu fāʻūtaha kia Sihova, ko e ʻOtua moʻoní pē ia.