Fai ha Tokanga ki he Mahuʻingaʻia ʻOku Maʻú
1 ʻI heʻetau tufaki atu ʻetau ngaahi makasiní mo e ngaahi tohi fakateokalati kehé, ʻoku tau fakamafola atu ʻa e fanongonongo naʻe fakahā ʻe Sīsū Kalaisí. ʻOku totonu leva ke tau feinga makehe ke toe ʻaʻahi ki he toko taha kotoa pē ʻoku hā mei ai ha mahuʻingaʻia.
2 Kapau naʻá ke fakaeʻa ha kupu ʻe taha ʻi he Ko e Taua Leʻó, ʻo langaʻi hake ai ʻa e mahuʻingaʻia ʻi he toko taha ʻapí, ngāueʻaki ha toe poini kehe mei he kupu ko iá ʻi hoʻo toe ʻaʻahí, ʻo fakatuʻunga ʻa hoʻo fetalanoaʻakí ʻi he konga Tohi Tapu tefito pē ʻe taha pea mo e palakalafi ʻe taha pe ua nai. Kapau ʻoku kei mahuʻingaʻia, fakahanga ʻa e tokangá ki he ʻaonga ʻo e Ko e Taua Leʻó ki he fāmilí fakakātoa. ʻOku lave ʻa e ngaahi tatau taki taha ki he ngaahi kaveinga kehekehe, ʻo hangē ko e fakaleleiʻi ʻo kita pē, ko e fekuki mo e ngaahi palōpalema ʻo e ʻaho ní, pea mo e ngaahi fehuʻi ʻoku tokanga ki ai ʻa e kau talavoú. ʻI he hā mai ha mahuʻingaʻia moʻoni, ʻai ke ʻilo ʻe he toko taha ʻapí ʻe malava ke ne maʻu ha tukuhau ki he Ko e Taua Leʻó pea te ne malava ke maʻu ha tatau ʻe 12 ʻi he taʻu ʻe taha.
3 Ka fēfē kapau ʻoku ʻikai ke mahuʻingaʻia ʻa e toko taha ʻapí ʻi ha taha ʻo e ngaahi kaveinga ʻo e Ko e Taua Leʻo ʻoku lolotonga maʻú? ʻI he lelei ange ke ʻoua ʻe fakangata ai ʻa e fetalanoaʻakí, te ke ngāueʻaki nai ʻa e faingamālié ke fakahā ki he toko taha ʻapí ʻo kau ki he ngāue ʻa e Kau Fakamoʻoni ʻa Sihová ʻaki ʻa e ngaahi fakamatala ʻoku hā ʻi he peesi 206 ʻo e tohi Reasoning.
4 Kapau naʻá ke ʻuluaki tuku ha tatau ʻo e “Ko e Taua Leʻó,” ʻi he ngāueʻaki ʻa e 2 Tīmote 3:1-5 pea mo fakaeʻa ʻa e fakamatala ʻi he peesi 2 ʻo e makasiní, te ke lea ʻo pehē ni nai ʻi hoʻo toe ʻaʻahí:
◼ “ʻI heʻeta fetalanoaʻaki ki muʻá, naʻá ta lāulea ai ʻo kau ki he ngaahi meʻa ʻoku hoko ʻi he māmani ko ʻení he ʻahó ni. ʻOku ngalingali ko e tokolahi ʻo e kakaí kuo mole ʻenau mahuʻingaʻia ʻi he ʻOtuá pea mo ʻene ngaahi tuʻunga ʻo kau ki he founga moʻui ʻoku hā ʻi he Tohi Tapú. Kuo uesia lahi ʻe he meʻá ni ʻa e anga ʻo e fakakaukau ʻa e kakaí ki he niʻihi kehé, ʻo hangē ko ia ʻoku fakamatalaʻi ʻi he Tohi Tapú ʻi he 2 Tīmote 3:1-5. ʻOkú ke fakakaukau ʻoku ʻi ai ha ʻuhinga lelei ke tau ʻamanekina ʻe toe lelei ange ʻa e ngaahi tuʻunga ʻi he kahaʻú?” Tuku ke ne tali, pea ʻi he ʻosi iá fakahanga nai ʻa e tokangá ki he 2 Pita 3:13. Pea hukeʻi leva ki he peesi 227-233 ʻi he tohi Reasoning, ʻo fakaeʻa ʻa e meʻa ʻe fai ʻe he Puleʻangá ki he faʻahinga ʻo e tangatá.
5 ʻI he toe ʻaʻahí, te ke fakatokangaʻi nai ʻoku ʻikai ke fuʻu loto-lelei ʻa e toko taha ʻapí ke fai ha talanoa ki he lotu ʻokú ne kau ki aí, ʻo ne fakakaukau ko e meʻa fakafoʻituitui pē ia ʻaʻana. Te ke leaʻaki nai ha meʻa meimei tatau mo ʻeni:
◼ “Koeʻuhi ko e fuʻu lahi ʻa e ngaahi lotú ʻi ha māmani ʻa ia ʻoku fakaʻau ke toe siʻisiʻi ange ʻi he toe fuʻu vave ange ʻa e fefonongaakí mo e fetuʻutakí, ʻoku uesia ʻa e māmaní kotoa ʻe he ngaahi tui kehekehe, tatau ai pē pe ʻoku tau saiʻia ai pē ʻikai. Ko ia ai, ko e femahinoʻaki fekauʻaki mo e anga ʻo ʻetau fakakaukaú, ʻe iku nai ai ki ha fetuʻutaki ʻuhinga lelei ange ʻi he vahaʻa ʻo e kakai ʻoku nau kau ki he ngaahi lotu kehekehe. Te ne fakasiʻisiʻi nai ha fetāufehiʻaʻaki ʻa ia ʻoku fakatuʻunga pē ʻi he ngaahi tui fakalotú. Ko e hā haʻo fakakaukau ki ai?” Tuku ke ne tali, pea ʻi he ʻosi iá fakahanga ʻa e tokanga ʻa e toko taha ʻapí ki he fakahokohoko ʻo e ngaahi kaveinga ʻi he tohi ko e Mankind’s Search for God.
6 ʻAi ke tau mātuʻaki feinga lahi ke toe ʻaʻahi kiate kinautolu ʻoku hā mei ai ha mahuʻingaʻia ʻi he moʻoní mo tokoniʻi kinautolu ki he hala ʻoku fakatau ki he moʻui taʻengatá.—Sione 4:23, 24.