Tokoniʻi Kinautolu ke Ngāueʻaki ʻa e Polosiua Foʻoú
1 ʻOku ʻikai ha toe veiveiua ko e tokolahi kuo nau mahuʻingaʻia ʻi hono lau ʻa e polosiua foʻou ko e Laumālie ʻo e Kau Maté. ʻI heʻetau toe foki ke ʻaʻahi ki he faʻahinga mahuʻingaʻia ʻa ia naʻa nau tali ʻa e polosiuá ʻe lava fēfē ke tau tokoniʻi kinautolu ke ngāueʻaki lelei ia?
2 Kapau naʻá ke fetalanoaʻaki ʻi he Koheleti 9:5 ʻi hoʻo ʻuluaki ʻaʻahí, ko e fakakaukaú ni te ne langaʻi nai ha mahuʻingaʻia foʻou:
◼ “Ki muʻá naʻá ta talanoa ai ʻo kau ki he kau maté ʻoku ʻikai te nau lava ʻo fai ha tokoni pe uesia ʻa e kau moʻuí. Kae kehe, ko e hā ʻa e ʻamanaki ki he ngaahi ʻofaʻanga kuo nau mole atu ʻi he maté?” Lau pea fai ha poupou ʻi he Sione 5:28, 29. Huke ki he peesi 29, pea lave ki he ʻamanaki fakaofo ʻo e toetuʻú.
3 Kapau naʻá ke fetalanoaʻaki ʻi he Sione 17:3 ʻi hoʻo ʻuluaki ʻaʻahí, ʻe lava ke ke fakamamafaʻi ʻa e fiemaʻu ke maʻu ʻa e ʻilo lahi ange mei he Tohitapú ʻaki ʻa e pehē:
◼ “Ko e taimi fakamuimui naʻá ku ʻi heni aí, naʻá ta lau ai ʻi he Sione 17:3 ko hono maʻu ʻa e ʻilo ʻo fekauʻaki mo e ʻOtuá ʻe lava ke taki atu ki he moʻui taʻengatá. Ka te ke fiemaʻu ke moʻui taʻengata ʻi he faʻahinga māmani pehē ʻoku tau moʻui ai ʻi he ʻaho ní? [Tuku ke ne tali.] Ko e tokolahi ʻe ʻikai. Koeʻuhi ko e ʻuhingá ni, ʻe lava ke tau fiefia ʻi heʻetau fanongo ʻo fekauʻaki mo e meʻa kuo talaʻofa ʻe he ʻOtuá.” Huke ki he peesi 30 mo e 31, lau ʻa e Fakahā 21:4, pea toki fakamatalaʻi pe ʻe fēfē ʻa e māmaní ʻi he taimi ʻe “mole ʻa e ngaahi meʻa muʻa.” Tala ange te ke toe foki atu ʻo fai ha fetalanoaʻaki lahi ange.
4 Kapau naʻá ke ngāueʻaki ʻa e fakatātā ʻi he peesi 30 ke fakahā ko e Puleʻanga ʻo e ʻOtuá te ne fakangata ʻa e mamahí, ʻe lava ke ke toe fakaava ʻa e polosiuá ki he peesi ko iá pea pehē:
◼ “Naʻá ta fetalanoaʻaki ki he ngaahi tāpuaki ʻoku fakatātaaʻi hení ko e kakaí te nau fiefia ʻi he malumalu ʻo e pule ʻa e Puleʻanga ʻo e ʻOtuá. Ko e hā ʻokú ke fakakaukau kuo pau ke tau fai kapau ʻoku tau fiemaʻu ke moʻui ʻi he malumalu ʻo e Puleʻanga ko iá? [Tuku ke ne tali.] Ko e faʻahinga ʻe niʻihi ʻi he ngaahi taimi ʻo e Tohitapú naʻa nau fokotuʻu ha faʻifaʻitakiʻanga lelei ʻaupito ʻa ia ʻoku ʻaonga ia kiate kitautolu ke faʻifaʻitaki ki ai.” Lau ʻa e Ngāue 17:11, fakamamafaʻi ʻa e fiemaʻu ke ‘vakaiʻi fakaʻaho ʻa e Tohitapú.’ Fakamatalaʻi ko e Kau Fakamoʻoni ʻa Sihová ʻoku nau tokoniʻi ʻa e kakai loto-totonu ʻi he koló ke ako ʻa e Folofola ʻa e ʻOtuá mo mahinoʻi lelei ange ia.
5 Kapau ʻokú ke maʻu ha taha mahuʻingaʻia, te ke faifai atu pē ʻo fakahanga ʻa e tokangá ki he tohi Te Ke Malava ʻo Moʻui Taʻengata he Palataisi ʻi he Māmaní pea ngāueʻaki ia ke kamata ha ako. ʻOku pau te ke maʻu ʻa e fiefiá ʻi hoʻo tokoni ke “fakapoto ʻa e loto ʻataʻatā.”—Sāme 119:130.