Ngāueleleiʻaki ʻa e Polosiua Foʻoú ʻi Fepueli
1 Ke fakavaveʻi ʻa e ngāue ngaohi ākongá, kuo foaki nima-homo ʻe he kautahá ʻa e ngaahi tohi kehekehe lahi. ʻI he lotolotonga ʻo kinautolú ʻoku ʻi ai ʻa e ngaahi polosiua ʻoku lave ki he ngaahi kaveinga pau, hangē ko e polosiua foʻou ko e Laumālie ʻo e Kau Maté—ʻOku Malava ke Nau Tokoniʻi Koe pe Uesia Koe? ʻOku Nau ʻI Ai Moʻoni? ʻE lava fēfē ke tau ngāueʻaki ola lelei ʻa e polosiuá ni ke tokoniʻi ʻa e kakai ʻi hotau feituʻu ngāué?
2 Te ke malava nai ke fai ha fetalanoaʻaki ʻo kamataʻaki ʻa e fehuʻí ni:
◼ “ʻOkú ke fakakaukau ʻe lava ʻa e kau maté ke tokoniʻi kitautolu pe uesia kitautolu? [Tuku ke ne tali.] Tokolahi ʻoku nau fakakaukau tatau mo koe. Fakatokangaʻi ʻa e meʻa ʻoku leaʻaki ʻe he Tohitapú ʻia Koheleti 9:5. [Lau.] Ko ia fakatatau ki he Tohitapú ko e kau maté ʻoku ʻikai lava ke nau uesia ʻa e kau moʻuí. Ka ʻoku pehē ʻe he kakai tokolahi kuo nau sio ki ha tēvolo pe kuo nau fetuʻutaki mo e faʻahinga kuo maté. ʻOku malava fēfē ʻeni?” Fakamatalaʻi ʻa e ngaahi foʻi fakakaukau ʻoku ʻasi ʻi he peesi 13-18 ʻo e polosiua Laumālie ʻo e Kau Maté, pea toki pehē: “Ko e polosiuá ni ʻokú ne ʻomai ha fakamatala mei he Tohitapú ʻo kau ki he kaveingá ni. ʻOku fuʻu lelei ʻaupito ke ke vaheʻi ha taimi ke lau ia. Te u saiʻia ke tuku ʻa e tataú ni maʻau.”
3 Koeʻuhi ko e tokolahi ʻoku hohaʻa fekauʻaki mo hono tokonaki ʻenau ngaahi fiemaʻu fakamatelié, ʻe langa hake nai ʻe he meʻá ni ha mahuʻingaʻia:
◼ “Ko e hā ʻokú ke fakakaukau ko ʻetau fiemaʻu lahi tahá ia? [Tuku ke ne tali.] ʻOku ʻi ai ʻa e tokolahi ʻoku nau tui pau ko e meʻa ʻoku fiemaʻú ko e ngaahi meʻa fakamatelie lahi ange.” Huke ki he peesi 30 mo e 31 ʻo e polosiua Laumālie ʻo e Kau Maté pea fakamatalaʻi ʻa e ngaahi poini tefitó. Hoko atu ʻaki ʻa e pehē: “ʻOku fakahaaʻi heni ʻa e kahaʻu fakaofo ʻa ia ʻe tokonaki ʻe he ʻOtuá maʻá e faʻahinga ʻo e tangatá. Ko e hā kuo pau ke tau fai ke tau hoko ai ko e konga ʻo e ngaahi tāpuaki fakaofo ko iá? Vakai ki he meʻa kuo leaʻaki ʻe hotau ʻEiki ko Sīsuú ʻi he veesí ni.” Lau ʻa e Sione 17:3, pea fakamatalaʻi ʻa e founga ʻe lava ke taki atu ai ʻe he ʻilo fekauʻaki mo e ʻOtuá ki he moʻui taʻengatá. Tuʻuaki ʻa e polosiuá ke ʻoange pea toe foki ki ai ke fakahā ʻa e founga ʻokú ne fakahā ai ʻa e fakamatala fakaofo fekauʻaki mo e taumuʻa ʻa e ʻOtuá ke fakafiemālieʻi ʻa e ngaahi fiemaʻu kotoa ʻa e faʻahinga ʻo e tangatá.
4 Koeʻuhi ko e tokolahi ʻoku hohaʻa fekauʻaki mo e mamahi ʻi he māmaní, ʻe lava nai ke ke ʻahiʻahi ʻeni:
◼ “Ko e tokotaha kotoa pē ʻoku ou talanoa ki ai ʻoku hohaʻa fekauʻaki mo e kahaʻú. ʻOku ongoʻi ʻe he kau taki ʻe niʻihi ʻi māmaní ʻoku tau ofi ʻaupito ki ha kuonga foʻou ʻo e melinó. ʻOku anga-fēfē hoʻo ongoʻi ʻo kau ki aí? [Tuku ke ne tali.] Neongo ʻa e ngaahi feinga kotoa ʻa e tangatá, ʻoku hokohoko atu ʻa e tupulaki ʻa e fakamālohí mo e mamahí ʻi māmani lahi. ʻOku fakahaaʻi ʻe he Tohitapú ʻa e fakaleleiʻanga tuʻuloa pē ʻe taha ki he ngaahi palopalemá ni. [Lau 2 Pita 3:13. Huke ki he fakatātā ʻi he peesi 28 mo e 29 ʻo e polosiua Laumālie ʻo e Kau Maté, pea fakamatalaʻi ʻa e founga ʻe ʻomai ai ʻe he Puleʻanga fakahēvani ʻo e ʻOtuá ʻa e melino tuʻuloá mo e maluʻangá ki he māmani ko ʻení.] Ko e tohí ni te ne tokoniʻi koe ke ke sio ki he founga ʻe lava ke ke hoko ai ko ha konga ʻo e sōsaieti foʻou ʻo e kakai ʻa ia te nau fiefia ʻi he moʻui taʻengata ʻi he malumalu ʻo e pule ʻa e Puleʻanga ʻo e ʻOtuá.”
5 Kapau te ke fetaulaki mo ha taha ʻa ia ʻoku femoʻuekina pea kuo pau ke ke fakanounou, te ke leaʻaki nai ʻeni:
◼ “Koeʻuhi ko e kiʻi taimi nounou pē ʻokú ke maʻú, te u saiʻia ke tuku atu ʻa e tulekí ni [pe kupu ʻi he makasiní] ʻoku fakakaveinga [filifili ha kupu pe tuleki feʻungamālie]. ʻOku ou fakalototoʻaʻi koe ke lau ia. Ko e taimi hono hoko te u ʻaʻahi mai aí, te u saiʻia ke ʻilo pe ko e hā hoʻo fakakaukau ki aí.”
6 ʻI hono tuʻuaki ʻetau ngaahi tohí, ʻoange ha faingamālie ki he niʻihi kehé ke fakahā ʻenau houngaʻiá ʻaki hono fai ha tokoni ki he ngaahi fakamole ʻo e ngāue fakamalanga ʻi māmani lahí. ʻE tānaki atu ʻa e faʻahinga foaki peheé ki he fiefia te nau maʻu ʻi he fakakaukau atu ki he ʻuhinga ʻo e kahaʻu fakaofo kuo talaʻofa ʻe Sihova maʻá e faʻahinga ʻoku manavahē kiate iá.—Pal. 3:13.