Tokoniʻi ʻa e Niʻihi Kehé ke “Tauhi ʻa e Ngaahi Meʻa Kuo Tohí”
1 ʻOku ʻikai feʻunga ke “fanongo” pē ki he ngaahi lea ʻo e Tohi Tapu. Ke maʻu ʻa e ʻaonga kakató, ʻoku pau ke “tauhi” ʻa ia kuo tohí. (Fkh. 1:3) Ko e tuku ʻo ha tohi ko e ʻuluaki lākanga ia ki he ngaohi ākonga. ʻI heʻetau maʻu ha faʻahinga mahuʻingaʻia ʻoku nau fiefanongo, ʻoku totonu ke tau foki vave leva ke tokoniʻi kinautolu ke toe ako lahi ange. Ko e hā ʻoku lava ke tau talanoa fekauʻaki mo ia ʻi heʻetau toe ʻaʻahi?
2 Kapau naʻá ke lave ʻo fekauʻaki mo e “ngaahi ʻaho fakaʻosi” ʻi hoʻo ʻuluaki ʻaʻahí, ʻe lava nai ke kamata ʻa hoʻo fetalanoaʻakí ʻo pehē:
◼ “Naʻá ta talanoa ki muʻa ʻo fekauʻaki mo e ‘ngaahi ʻaho fakaʻosi’ mo e fiemaʻu ke tau tokanga ki he meʻa ʻoku hoko ʻi he māmaní. Pea neongo ʻoku ʻikai te tau ʻilo ʻa e ‘ʻaho pe ko e houa’ ʻo e ngataʻangá, ka ʻokú ke ʻilo ʻa e founga te tau ʻilo ai ʻoku ofi ʻaupito ia?” ʻI he ʻosi ha fakamatala ʻa e tokotaha ʻapí, huke ki he peesi 178 mo e 179 ʻi he tohi Fāʻūtaha ʻi he Lotu pea fakamatala ki he fakahokohoko ʻo e ngaahi meʻa ʻoku fakahoko ai ʻa e fakaʻilongá. Kapau ʻoku pau ʻa e talí, fakamatala lahi ange mei he vahe ko iá.
3 Kapau naʻá mo fetalanoaʻaki ki he Puleʻanga ʻo e ʻOtuá ʻi he ʻuluaki ʻaʻahí, te ke fakakaukau nai ke hoko atu ʻaki haʻo ʻeke ʻa e fehuʻí ni:
◼ “ʻI hoʻo fakakaukaú, ko e hā ʻa e faʻahinga founga-pule ʻoku fiemaʻu ke fakalatoʻaki ʻa e ngaahi fiemaʻu kotoa ʻa e faʻahinga ʻo e tangatá? [Tuku ke ne tali. Lau ʻa e Selemaia 10:23.] ʻOku lava ke mahino kiate koe, naʻe ʻikai ʻaupito ke fakakaukau ʻa e ʻOtuá ia ʻoku totonu ki he tangatá ke ne fakahinohino ʻa ʻene ngaahi meʻá. Ko e ngaahi feinga pehē ʻo ʻikai ke kau ai ʻa e tokoni mei he ʻOtuá ko e tupuʻanga ia ʻo e lahi taha ʻo ʻetau ngaahi palopalemá. Ko e Puleʻanga ʻo e ʻOtua ko e founga-pule pē ia ʻe taha ʻe lava ke ne tokonaki ʻa ia ʻoku tau fiemaʻú.” Huke ki he peesi 230 ʻi he tohi Reasoning, pea fakamatalaʻi ʻa e ngaahi konga Tohi Tapu ʻi he ʻuluaki kaveinga tokoni. Hoko atu ʻa e fetalanoaʻakí ʻaki ha fakamatala ki he ʻuhinga ʻoku lava ai ke tau falala kakato ki he ʻOtuá.
4 Te ke saiʻia nai ke ʻahiʻahi ʻeni ke kamataʻaki ʻa e fetalanoaʻaki Fakatohitapú:
◼ “Naʻá ta fetalanoaʻaki fakamuimui ki he anga hono ngaohi ʻe he ʻOtuá ʻa e māmaní ni ko ha palataisi. ʻE maʻu ʻe he faʻahinga ʻo e tangatá ʻa e ngaahi tuʻunga ko ʻení ʻi he taimi ʻe fai ai ʻa e finangalo ʻo e ʻOtuá ki māmani ʻo hangē ko ia ʻi hēvaní. Kae kehe, ʻoku manavasiʻi ʻa e niʻihi naʻa toe hoko mai pē ʻa e ngaahi tuʻunga koví. ʻE ʻikai malava ia koeʻuhi he ʻe ʻosi kotoa ʻa e faʻahinga fulikivanú ia.” Lau ʻa e Sāme 37:10, 11. Fakaafeʻi ʻa e tokotaha ʻapí ke ne ngāueʻaongaʻaki ʻa ʻetau polokalama ako Tohi Tapú ke ako lahi ange ai.
5 Kapau naʻá ke tuku ʻa e tuleki “Moʻui ʻi ha Māmani Foʻou Melino” tuhu ki he fakatātā ʻi he takafí pea lau ʻa e palakalafi 1 ʻi he kaveinga “Moʻui ʻi he Māmani Foʻou ʻa e ʻOtua.” Peá ke pehē:
◼ “Kapau ʻoku tau fie nofo ʻi ha māmani hangē ko iá, ʻoku ʻi ai ʻa e meʻa mahuʻinga ʻoku pau ke tau fai.” Lau ʻa e palakalafi fakaʻosí, pea tuʻuaki ʻa e tohi Fāʻūtaha ʻi he Lotu.
6 ʻOku fiemaʻu ke tau fai ha ngaahi toe ʻaʻahi ola lelei, koeʻuhi he ko ʻetau taumuʻá ke kamata ha ngaahi ako Tohi Tapu. Vaheʻi ha taimi ki ai, pea teuteu lelei. ʻI he founga ko ʻení ʻoku lava ke tau tokoni moʻoni ai ki he faʻahinga loto-totonú.—Fkh. 22:6, 7.