Fiefia ʻi Hono Fai ʻo ha Fakamoʻoni Fakaʻāuliliki
1 Ko e kotoa ʻo kitautolú ʻoku tau fiefia ʻi hono fai ʻa e ngaahi meʻa ko ē ʻoku tau fai leleí. ʻOku pehē ʻe he Maake 7:37 ko e fuʻu tokolahi naʻa nau talaki atu fekauʻaki mo Sīsū: “Hono ʻikai tuʻutai ʻene ngaue kotoa pe!” ʻOku ʻikai ha veiveiua naʻe fiefia ʻa Sīsū ʻi hono fai ʻa e finangalo ʻo Sihová! (Fakafehoanaki mo Sāme 40:8.) ʻI hono fai ha tokanga ki he ngaahi fokotuʻu ʻoku hoko haké, ʻoku pehē pē mo kitautolu te tau maʻu ʻa e fiefia ʻi heʻetau talangofua ki he fekau ʻa Sīsū ke “malaga ki he kakai, mo fakamooni.” (Ng. 10:42, PM) ʻI Sanuali, ʻoku tau tuʻuaki ai ʻa e tohi Fāʻūtaha ʻi he Lotu. Kapau ʻoku ʻosi ʻa e ngaahi tataú, ngāueʻaki ʻa e tohi Moʻui Taʻengata. ʻOku anga-fēfē ʻetau ngāueʻaki ʻa e ongo tohi ko ʻení ke fai ha fakamoʻoni fakaʻāulilikí?
2 Koeʻuhi ʻoku faʻa hohaʻa ʻa e kakaí fekauʻaki mo e ngaahi fekīhiaki ʻo kau ki he moʻui leleí, te ke leaʻaki nai ʻeni:
◼ “Neongo ʻa e ngaahi lavameʻa ʻiloa ʻoku fai ʻi he malaʻe ʻo e faitoʻó, ʻoku ʻi ai ʻa e mamahi lahi ʻaupito koeʻuhi ko e mahamahakí. ʻI hoʻo fakakaukaú, ko e hā ʻa e ʻuhinga ki he meʻá ni? [Tuku ke ne tali.] Naʻe pehē ʻe Sīsū Kalaisi ko e mahaki fakaʻauhá ʻe hoko ia ko e meʻa ʻo e ngaahi ʻaho fakamuí. (Luke 21:11) Ko ia, ʻoku toe fakamatalaʻi ʻe he Tohitapú ha taimi ʻe ʻikai ke toe ʻi ai ha puke. [Lau ʻa e Aisea 33:24.] Fakatokangaʻi ʻa e founga ʻoku ʻomai ai ʻe he tohi ko ʻení ʻa e ʻamanaki ʻi he akonaki tefito ʻa e Tohitapú.” Fakaeʻa ʻa e ngaahi fakamatala mei he palakalafi 11 ʻi he peesi 82 ʻo e tohi Fāʻūtaha ʻi he Lotu. Tuʻuaki ʻa e tohí pea fakamatalaʻi te tau talitali lelei ha tokoni siʻisiʻi pē ki heʻetau ngāue fakafaifekau ʻi māmani lahí.
3 ʻI he faifakamoʻoni ʻi he founga ʻikai anga-mahení ʻo ofi ʻi he ngaahi feituʻu faiʻanga fakataú, te ke lava ʻo leaʻaki ha fakafeʻiloaki peá ke ʻeke leva:
◼ “ʻOku hā kiate koe ko e ngaahi meʻa totongi mamafa ʻaupito ko ia he ngaahi ʻaho ní ʻokú ne ʻai ai ke faingataʻa ke maʻu ha paʻanga feʻunga ki he ngaahi fakamolé? [Tuku ke ne tali.] ʻOkú ke fakakaukau ʻe ʻi ai ha taimi ʻe hoko ha maluʻanga fakaʻikonōmika moʻoni?” Tuku ke ne tali. Pea fakaʻaliʻali ange ha konga Tohitapu feʻungamālie ʻoku hiki ʻi he palakalafi 10, peesi 81, 82 ʻo e tohi Fāʻūtaha ʻi he Lotu. Hokohoko atu ʻaki hoʻo pehē: “Ko e tohí ni ʻokú ne fakahā ʻa e founga, fakafou ʻi hono Puleʻangá, ʻe fakaleleiʻi ai ʻe he ʻOtuá ʻa e ngaahi palopalema ʻokú ne ʻai ke faingataʻa fau ʻa e moʻuí ʻi he ʻaho ní.” Tuʻuaki ʻa e tohí, pea kapau ʻoku talitali lelei, ʻoange ki he tokotahá ha faingamālie ke ne tokoni ki he ngāue ʻi māmani lahí ʻaki ha tokoni loto-fiefoaki siʻisiʻi. ʻE lava ke ke fakahā ange ʻa e lahi ʻo hoʻo fiefia ʻi he fetalanoaʻakí, pea ʻeke ange leva: “ʻOku ʻi ai ha founga ʻe lava ke ta hokohoko atu ai ʻa e fetalanoaʻaki ko ʻení ʻi ha taimi kehe?” ʻI he founga ko ʻení ʻe lava ke ke maʻu nai ai ʻa e fika telefoni ʻo e tokotahá pe tuʻasila hono ʻapí.
4 Te ke maʻu nai ha faingamālie ke ʻahiʻahi ʻa e tuʻuaki ko ʻení fekauʻaki mo e melino ki he māmaní, ʻo ngāueʻaki ʻa e tohi “Moʻui Taʻengata”:
◼ “ʻI hoʻo fakakaukaú, ko e hā ʻoku faingataʻa ai ke maʻu ʻa e melinó ʻi he māmaní? [Tuku ke ne tali, pea fakahā ange ʻa e fakatātā ʻi he peesi 20-21.] Ko ha fakatātā ʻeni ʻo ha meʻa naʻe hoko ʻi he Tohitapú ʻoku fakamatalaʻi ʻi he tohi Fakahaá. [Lau ʻa e Fakahā 12:7-9, 12 fakahangatonu mei he palakalafi 17. Pea lau leva ʻa e fakamatala ʻoku ʻalu fakataha mo e fakatātaá.] Ko e siʻi ange ʻa e melino ʻi he māmaní ko e taha ia ʻo e nunuʻa ʻo hono lī hifo ʻa e Tēvoló ki he māmaní. ʻOku tali ʻe he tohi ko ʻení ʻa e ngaahi fehuʻi mahuʻinga lahi, pea ʻoku ou fiefia ke ʻoatu ia maʻau kapau te ke lau ia.”
5 ʻI he toe foki ke ʻaʻahi kiate kinautolu ʻoku nau fakahā ʻa e mahuʻingaʻiá, te ke feinga ke kamata ha ako Tohitapu ʻaki hono ngāueʻaki ʻa e lea ko ʻení:
◼ “Ko e taimi fakamuimui naʻá ta talanoa aí, naʻá ke ʻomai ʻa e fakamatala mahuʻinga ʻaupito. [Lave ki ha fakamatala naʻe fai ʻe he tokotahá.] Naʻá ku fakakaukau fekauʻaki mo ia, pea te u saiʻia ke vahevahe atu ʻa e ngaahi ola ʻo e fekumi ʻe niʻihi naʻá ku fai ki he kaveingá. [Fakahā ha konga Tohitapu feʻungamālie.] ʻOku mau tuʻuaki ke fai ha polokalama ako taʻetotongi ʻa ia kuo malava ai ʻa e laui miliona ʻo e kakaí ke fekumi ki he ngaahi tefitoʻi akonaki tefito ʻa e Tohitapú ʻi ha vahaʻa taimi nounou. Ko ha sivisiviʻi pehē ʻe lava ke ne langa hake hoʻo tuipau ki hono fakahoko moʻoni ʻo e ngaahi talaʻofa ʻa e ʻOtuá.” Fakaeʻa ʻa e ngaahi fehuʻi ʻe niʻihi ʻe malava ke tali. Kapau ʻoku fakafisi ʻa e tokotahá ki he tuʻuaki ʻo ha ako Tohitapu, fakamatalaʻi ʻoku toe maʻu ha ako vave makehe ʻa ia ʻoku miniti pē ʻe 15 ʻi he uike ki he uike ʻe 16. Fakahā ange ʻa e polosiua Fiemaʻu, huke ki he lēsoni 1, pea ʻeke ange pe te ke fakahāhaaʻi ange ʻa e ʻuluaki lēsoní.
6 Manatuʻi ke Ngāueʻaki ʻa e Ngaahi Lauʻi Pepa Tuʻuakí: ʻOku lava ke ola lelei hono ngāueʻaki kinautolú ʻi hoʻo lea kamatá ke langaʻi ʻa e mahuʻingaʻia ʻi he ngaahi meʻa fakalaumālié, pe ko e tuku atu nai kinautolu kapau ʻoku ʻikai ke tali ha tohi. ʻI he ʻi ai ha mahuʻingaʻiá, ngāueʻaki ʻa e pōpoaki kuo pulusi ʻi he takafi ki mui ʻo e lauʻi pepa tuʻuakí ke fakalototoʻaʻi ʻa e tokotahá ke ne tali ha ako Tohitapu ʻi ʻapi pea ke ne haʻu ki heʻetau ngaahi fakatahá.
7 Ke fakapotopoto ʻi hoʻo ngāué, pea te ke fiefia ai. Tokangataha ke fai ha fakamoʻoni fakaʻāuliliki, pea fiefia ʻi hono fakahoko ʻa e tafaʻaki kotoa ʻo e ngāue fakafaifekaú ke lelei.—1 Tim. 4:16.