ʻOkú Ke Ngāue mo ha Taumuʻa?
1 Ko Sihová ko e ʻOtua ʻo e taumuʻa. (Ai. 55:10, 11) ʻOku enginakiʻi kitautolu ke tau faʻifaʻitaki kiate ia. (Ef. 4:32e) ʻOku totonu ke moʻoni ʻeni ʻi he founga ʻoku tau fakahoko ai ʻetau ngāue fakafaifekaú. Ko ia ʻoku feʻungamālie ʻa e fehuʻí: “ʻOkú ke ngāue mo ha taumuʻa?”
2 Ko hoʻo malanga mei he matapā ki he matapaá, faifakamoʻoni ʻikai ʻi he founga anga-mahení, mo hono tufa ʻo e ngaahi tohí ko e konga kotoa ia ʻo ha ngāue fakafaifekau mohu taumuʻa. Kae manatuʻi, ʻoku kau ki heʻetau ngāué ʻa e ʻikai ko e malanga pē ka ke toe ngāohi-ākonga foki. (Mt. 28:19, 20) ʻI he hili hono tō ʻa e ngaahi tenga ʻo e moʻoni ʻo e Puleʻangá, ʻoku fiemaʻu ke tau toe foki ke fuʻifuʻi kinautolu pea fai ha tokanga maʻu pē ki ai ʻi heʻetau hanga atu kia Sihova ke ʻomai hono tupú. (1 Kol. 3:6) ʻOku fiemaʻu ke tau tokanga fakamātoato fekauʻaki mo hono fai ʻo e ngaahi toe ʻaʻahí pea mo hono kamata ha ngaahi ako Tohitapú.
3 Fakalahi Atu Hoʻo Ngāue Fakafaifekaú: ʻOku ʻi ai maʻu pē ha ongoʻi lelei he taimi ʻoku lava ai ke ke sio atu ki mui ki he meʻa naʻá ke fai ʻi he ngāue fakamalangá pea lea hifo kiate koe: “Kuó u fakahoko ʻa e meʻa naʻá ku kamata ke faí.” Hangē ko ia ʻoku hiki ʻi he 2 Timote 4:5, naʻe enginaki mai ai ʻa Paula: “Fai hono kotoa ʻo ho lakanga.” ʻOku kau ki ai ʻa hono fakalahi atu hoʻo ngaahi feingá ke toe foki ki he mahuʻingaʻia kotoa naʻe maʻú. ʻI hoʻo taimi-tēpile ngāue fakamalanga fakauiké, palani ha taimi pau ke fai ai ʻa e ngaahi toe ʻaʻahí. Ngāue atu ki he taumuʻa ʻo e feinga ke kamata ha ngaahi ako Tohitapu mo e faʻahinga ʻoku hehema ki he māʻoniʻoní. ʻOku totonu ko hoʻo taumuʻa ʻeni ʻi hoʻo kau ki he ngāue fakafaifekaú.
4 ʻEke ki he kau malangá ʻa e anga ʻo ʻenau ongoʻi ʻi he taimi naʻa nau sio ai ki heʻenau kau ako Tohitapú ʻoku nau papitaiso ʻi ha ʻasemipilī. Naʻa nau fiefia, mahalo pē ʻo hangē ko e faʻahinga naʻa nau papitaisó. Naʻa nau fakahoko ha taumuʻa maʻongoʻonga! Naʻe fakahā ʻe ha tokotaha ngaohi-ākonga ʻe taha ʻi he foungá ni: “Ko e ngaohi-ākongá ʻoku ʻuhingá ko e ngaohi ha kau fakahīkihikiʻi tokolahi ange ʻo Sihova. ʻOku ʻuhingá ko e moʻui maʻá e faʻahinga ʻoku nau tali ʻa e moʻoní. ʻOku ou saiʻia ʻi hono akoʻi ʻa e moʻoní ki he niʻihi kehé—ʻoku fuʻu fakaofo! . . . Ko e tokolahi ʻo e faʻahinga ʻoku nau ʻofa kia Sihová ʻoku nau hoko ko hoku ngaahi kaumeʻa ʻofeina.”
5 Fakaʻuta atu ki he malava ke tokoniʻi ha tokotaha ke hoko ko ha sevāniti fakatapui ʻa Sihova! Ko ha fakatupu fiefia ē! ʻOku maʻu ʻa e faʻahinga ola peheé mei he ngāue mo ha taumuʻa ʻi he ngāue fakafaifekaú.—Kol. 4:17.