ʻOku Tauhi Loto-Vēkeveke ʻe he “Meʻaʻofa ʻi he Kau Tangatá” ʻa e Tākanga ʻa e ʻOtuá
1 Ko ha tokonaki anga-ʻofa ē kuo fai ʻe Sihova fakafou ʻi hono ʻAló ʻi hono tokonaki mai ʻa e “meʻaʻofa ʻi he kau tangatá”! (Ef. 4:8, 11, 12, NW) ʻOku nau maʻu ʻa e ngaahi fatongia lahi, ʻo kau ai ʻa e tauhi longomoʻui mo loto-vēkeveke ʻa e tākanga ʻa e ʻOtuá. (1 Pita 5:2, 3) ʻOku tau maʻu ʻaonga kotoa mei he tokonaki fiemaʻu lahi ko ʻení. Pe ʻoku fetaulaki ha niʻihi mo ha ngaahi faingataʻa, feohi foʻou mo e fakatahaʻangá, maʻu ha ngaahi vaivaiʻanga pau, pe hē mamaʻo atu, ko e kau tangata ko ʻení ʻoku nau mahuʻingaʻia loto-vēkeveke fakafoʻituitui ʻi he lelei fakalaumālie ʻa e tokotaha kotoa pē.—Fili. 2:4; 1 Tes. 5:12-14.
2 ʻI he taimi ʻoku fakatupunga ai ʻe he ngaahi meʻa fakahohaʻa ʻo e māmaní ha tuʻunga manavaheé, ʻoku fakamoʻoniʻi ai ʻa e hoko ʻa e kau tauhi-sipi tokoni ko ʻení ʻo “hage koe toitoiaga mei he matagi, mo e hufaga mei he afā.” ʻI he taimi ʻoku tau ongosia pe mafasia ai pea ongoʻi ʻa e fiemaʻu ʻo ha fakafiemālié, ʻoku nau fakaivifoʻou kitautolu, “hage koe gaahi vaitafe i he botu momoa” pe “hage koe malumalu o ha maka lahi i he fonua oku buhegia.”—Ai. 32:2, PM.
3 Fakalototoʻaʻi ʻa e ʻIkai Longomoʻuí: ʻOku fai ʻe he kau mātuʻá ha feinga makehe ke fakalototoʻaʻi ʻa e faʻahinga ko ia kuo nau hoko ʻo tōmokosi pe ʻikai longomoʻuí, ʻo tokoniʻi kinautolu ke toe foki ʻo kau maʻu pē ʻi he kotoa ʻo e ngāue ʻa e fakatahaʻangá. Kuo tokoniʻi ʻa e tokolahi ʻe he ʻaʻahi fakatauhisipi anga-ʻofá ke nau maʻu maʻu pē ʻa e ngaahi fakataha ʻa e fakatahaʻangá pea hoko ʻo laka ki muʻa fakalaumālie ki he tuʻunga ʻa ia ʻoku nau toe kau ai ʻi he malaʻe fakafaifekaú. Ko e kotoa ʻo e ngaahi feinga pehē ʻi he tafaʻaki ʻa e kau mātuʻá ʻoku tapua atu ai ʻa e tokanga anga-ʻofa ʻa Sihová pea mo e tuʻunga-taki longomoʻui ʻo Sīsū Kalaisí. Naʻá ne fokotuʻu ha sīpinga ʻo hono fakahaaʻi ha tokanga pehē ki ha taha pē ʻo ʻene fanga sipi naʻe hē mamaʻo nai pe molé.—Mt. 18:12-14; Sione 10:16, 27-29.
4 ʻOku fakasio ʻe he kau tauhi-sipi tokoní ha ngaahi fakaʻilonga ʻoku hā mei ai ʻa e taimi ʻoku tūkia fakalaumālie nai ai ha niʻihi. Ko ha faʻahinga ʻoku hā mei ai ha ngaahi fakaʻilonga ʻo e loto-siʻí, ʻoku nau hoko ʻo tōmokosi ʻi hono maʻu ʻa e ngaahi fakatahá, pe ʻoku holo ʻenau ngāue ʻi he malaʻe ngāué, ʻoku ngalingali ʻoku nau fiemaʻu ha tokoni fakalaumālie. ʻOku vēkeveke ʻa e kau mātuʻá ke tokoniʻi ha taha pē ʻoku kamata ke hā mei ai ha hehema ki he vala mo e teuteu fakamāmaní pe ʻokú ne fakatupu ha fakakaukau fakaanga ki he fakatahaʻangá. ʻI he mahuʻingaʻia loto-moʻoni mo tokanga fakaalaalá, ʻoku loto-lelei ai ʻa e kau ʻovasia tokangá ke ‘ʻatu ʻenau moʻuí tonu’ ʻi he feinga ke tokoniʻi ʻa e faʻahinga peheé ke toe langaʻi hake ʻenau ʻofa kia Sihová.—1 Tes. 2:8.
5 ʻI he kuohilí, naʻe ʻikai toe fetuʻutaki ʻa e kau Kalisitiane fakatapui ʻe niʻihi ia mo e fakatahaʻangá, ʻo nau tō ai ki he ʻikai longomoʻui fakalaumālie koeʻuhi ko e hoko ʻo lōmekina kinautolu ʻe ha ngaahi palopalema fakaemoʻuilelei, tōlalo fakaʻekonōmiká, pe ngaahi tenge mei he fāmilí. ʻI he ʻikai hoko ʻo fakaangá, ʻoku ʻoatu anga-ʻofa ʻe he kau mātuʻá ha fakapapau ʻoku tokanga mai ʻa Sihova ki he kotoa ʻo ʻene fanga sipí pea te ne poupouʻi kinautolu ʻi he ngaahi taimi faingataʻá. (Sāme 55:22; 1 Pita 5:7) ʻOku lava ke tokoniʻi kinautolu ʻe he kau tauhi-sipi tokangá ke nau ʻiloʻi kapau te nau ‘ʻunuʻunu ofi ki he ʻOtuá, te ne ʻunuʻunu mai kiate kinautolu,’ ʻo ʻoange ha fakafiemālie mo ha fakaivifoʻou.—Sem. 4:8; Sāme 23:3, 4.
6 Fakamahuʻingaʻi ʻa e Kau Vaivaí: Ko e kau tauhi-sipi tokoni anga-ʻofá ʻoku nau toe tokanga fekauʻaki mo e faʻahinga ʻa ia ʻe lava ke tukunoaʻí. ʻOku feohi mo e fakatahaʻanga kotoa pē ʻa e faʻahinga ʻoku nau vaivai, nofo ʻi he ngaahi ʻapi tauhiʻanga vaivaí, pe ʻi he tuʻunga ʻo e ʻikai lava ha meʻá. Ko ʻenau kau ʻi hono talaki ʻa e pōpoaki ʻo e Puleʻangá ʻoku hā mahino ʻoku fakangatangata koeʻuhi ko honau ngaahi tuʻungá. Mahalo ko honau faingamālie ke fai ai ha fakamoʻoní ʻoku hoko mai pē nai ia mei he fetuʻutaki mo e kau ʻaʻahí, kau mahaki kehé, pe ko e kau tauhí. Ka neongo ia, ko e hā pē meʻa ʻoku malava ke nau faí ʻoku fai ʻa e vakai ki ai ko ha poupou mahuʻinga ia ki he kotoa ʻo e ngāue fakamalangá. (Mt. 25:15) Naʻa mo e taimi ʻoku nau faifakamoʻoni ai ʻi ha miniti pē ʻe 15, ʻoku totonu ke līpooti ʻeni, pea ʻe hokohoko atu hono lau kinautolu ko e kau malanga tuʻumaʻu ʻo e Puleʻangá.
7 ʻOku mātuʻaki tokanga ʻa e “meʻaʻofa ʻi he kau tangatá” ki he ngaahi fiemaʻu fakalaumālie ʻa honau fanga tokouá ʻi he taimi ko ʻeni ʻo e taʻú—faʻahitaʻu Fakamanatú. Ko ha taimi feʻungamālie ē ki he kau mātuʻá ke nau fai ha feinga makehe ke tokoniʻi ʻa kinautolu kotoa kuo hē mamaʻo atú ke nau toe maʻu ʻa e fiefia mo e nonga ʻo e ʻatamaí ʻa ia ʻoku hoko mai mei he feohi māfana ʻi he fakatahaʻangá! ʻOku tau fiefia ʻi he taimi ʻoku tau sio ai ki he faʻahinga pehē “ʻoku felāveʻi mo [kitautolu] ʻi he tuí” ʻoku nau kau ʻi he ngaahi fakataha ʻa e fakatahaʻangá pea ʻalu ʻi he ngāue fakafaifekaú, ʻo toe fakapapauʻi ʻenau tui ki he feilaulau huhuʻí.—Kal. 6:10, NW; Luke 15:4-7; Sione 10:11, 14.