Ko e ʻĪsiu Makehe ʻo e Awake! ke Tuʻuaki ʻi Sepitema
1 ʻOku fiefia ʻa e meimei tokotaha kotoa pē ʻi he ongo mai ʻa e hiva ʻa e fanga manupuná pea mo e vakai atu ki he fakatōtō hifo ʻa e laʻaá. Kae kehe, ʻoku ʻikai ke ʻilo ʻe he tokolahi naʻe fakatupu ʻa e ngaahi meʻá ni ʻe ha Tamai fakahēvani ʻofa. Te tau maʻu ha faingamālie makehe ke faifakamoʻoni ki he tuʻunga-fakatupu ʻo Sihová ʻaki hono tufaki ha ʻīsiu makehe ʻo e Awake! (Ai. 40:28; 43:10) Ko e ʻīsiu ʻo Sepitemá ʻoku fakatefito kotoa ia ʻi he kaveinga “ʻOku ʻi Ai ha Tokotaha-Fakatupu?”
2 ʻI he Feituʻu Ngāué: Kapau ʻe malava, fokotuʻutuʻu ke kau ki he ngāue fakafaifekau fale-ki-he-falé fakataha mo e fakatahaʻangá he Tokonaki kotoa pē. Ko e moʻoni, ʻe lava ke ke tuʻuaki ʻa e ʻīsiu makehé ʻi he ngaahi taimi kehe he lolotonga ʻo e uiké. Ko e kau faiakó mo e niʻihi kehe ʻoku ngāue ʻi he malaʻe ʻo e akó ʻe ngalingali te nau mahuʻingaʻia tautefito ʻi he ʻīsiu ko ʻení. Ko ia ai, ʻe fai nai ʻa e ngaahi fokotuʻutuʻu makehe ke ʻaʻahi ki he faʻahinga pehē ʻoku nau ʻi ho feituʻu ngāué.
3 Kapau ʻoku hā mai ha mahuʻingaʻia, tuku ha fehuʻi ki he tokotahá ʻa ia ʻe toki tali ʻi hoʻo ʻaʻahi hono hokó. Ko e fakatātaá, te ke lava ke ʻohake ha fehuʻi fekauʻaki mo e ʻuhinga ʻoku fakaʻatā ai ʻe ha Tokotaha-Fakatupu anga-ʻofa ʻa e faingataʻaʻia pehē faú. ʻI hoʻo ʻaʻahi leva hono hokó, ʻe lava ke ke fakaʻaliʻali ʻa e vahe 1 pe vahe 11 ʻo e tohi Akoʻi ʻe he Tohi Tapú. Pe te ke fili nai ke ʻohake ha fehuʻi fekauʻaki mo e taumuʻa ʻa e Tokotaha-Fakatupú ki he foʻi māmaní pea lāulea leva ki he vahe 3 ʻi hoʻo toe foki atú.
4 ʻI he ʻApiakó: Kapau ʻokú ke ʻi ʻapiakó, fēfē ke ke ʻoange ʻa e Awake! makehé ni ko ha meʻaʻofa ki hoʻo kau faiakó pea mo e kaungāakó? Ko hono hili pē ha tatau ʻi hoʻo tesí ʻe langaʻi nai ai ha ngaahi fehuʻi ʻo kau ki hoʻo tuí. Ngalingali te ke maʻu ai ha ngaahi faingamālie ke ngāueʻaki ʻa e fakamatala mei aí ke taukapoʻi ʻaki hoʻo tuí ʻi he ngaahi fetalanoaʻaki he loki akó pea ʻi hano faʻu ha ʻēsei. Ke tokoniʻi koe, ʻoku ʻi he ʻīsiu ko ʻení ha kupu “ʻOku ʻEke ʻe he Toʻutupú” ʻa ia ʻoku fakakaveinga “ʻE Lava Ke U Taukapoʻi Fēfē ʻEku Tui ki he Fakatupú?”
5 ʻOku taau mo Sihova ʻa e fakaʻapaʻapa mo e fakalāngilangi ki he meʻa kuó ne fakatupú. (Fkh. 4:11) ʻE lava ke tau fakalāngilangiʻi hotau Tokotaha-Fakatupú pea tokoniʻi ʻa e niʻihi kehé ke nau fai pehē ʻaki hono tuʻuaki faivelenga ʻa e ʻīsiu ʻo e Awake! ʻo Sepitemá.