Tohi Fakaafe Fakamanatu ke Tufaki ʻi Māmani Lahi!

1. Ko e hā ʻa e feingangāue makehe ʻi māmani lahi ʻoku palani ki muʻa ʻi he Fakamanatú?

¹ “Mou fai ʻeni mōku fakamanatu.” (Luke 22:19) ʻI he talangofua ki he fekau ko eni meia Sīsuú, ko e kau lotu ʻa Sihová te nau fakatahataha mo e faʻahinga mahuʻingaʻiá ʻi Maʻasi 30, 2010, ke fakamanatu ʻa e pekia ʻa Sīsuú. Ko ha tohi fakaafe makehe ki he Fakamanatú ʻe tufaki ia ʻi māmani lahi ʻi Maʻasi 13 ki Maʻasi 30.

2. ʻE fēfē nai haʻatau tuʻuaki ʻa e tohi fakaafé?

² Founga ke Fai Aí: ʻE lava ke ke ʻoange ʻa e tohi fakaafé ki he tokotaha-ʻapí koeʻuhi ke lava ʻo ne sio ki he fakatātā ʻi he takafí, peá ke pehē leva: “ʻI he efiafi ʻo Maʻasi 30, ʻe fakataha ai ʻa e laui miliona ʻi he māmaní takatakai ke fakamanatu ʻa e pekia ʻa Sīsuú. ʻOku ou ʻi hení ke ʻoatu kiate koe mo ho fāmilí ʻa e tohi fakaafe ko ení ke ke maʻu ia. ʻE toe talitali lelei foki ki ai mo ho kaungāmeʻá. Kātaki ʻo fakatokangaʻi ʻa e taimi mo e feituʻu ʻo e fakamanatu fakalotofonuá.” Fakatatau ki he ngaahi tuʻungá, ʻe lava ke ke fili ke lau ʻa e Luke 22:19 mei he Tohi Tapú ke fakahaaʻi ʻa e fekau Fakatohitapú. Kae kehe, manatuʻi koeʻuhi ʻoku fakangatangata ʻa hotau taimi ke kāpui ai ʻa e feituʻu ngāué, ko e lelei tahá ke ʻai ke nounou.

3. Ko hai nai ʻe lava ke tau fakaafeʻí?

³ Kapau ʻoku lahi ʻa e feituʻu ngāue ʻa hoʻo fakatahaʻangá, ʻe fakahinohino atu nai ʻa e kau mātuʻá ke tuku ʻa e tohi fakaafé ʻi he ngaahi ʻapi ʻoku ʻikai ha tahá ʻi he ʻuluaki taimi ʻo hoʻo ʻaʻahí. ʻI heʻene feʻungamālié, tuʻuaki ʻa e makasiní fakataha mo hono ngāueʻaki ʻa e tohi fakaafé. Fakapapauʻi ke fakaafeʻi ʻa hoʻo ngaahi toe ʻaʻahí, kau ako Tohi Tapú, kaungāngāué, kaungāakó, kāingá, kaungāʻapí mo e ngaahi maheni kehé.

4. Ko e houngaʻia ʻi he ʻofa ʻa Sihova ʻi hono tokonaki mai ʻa e huhuʻí ʻe ueʻi ai kitautolu ke tau fai ʻa e hā?

⁴ Mateuteu ke Kau Kakato: Ko e faʻahitaʻu Fakamanatú ko ha taimi lelei ʻaupito ia ke fakalahi ai ʻetau ngāué. ʻE lava ke ke feʻunuʻaki hoʻo taimi-tēpilé ke tāimuʻa tokoni? ʻOku ʻi ai haʻo fānau pe kau ako Tohi Tapu ʻoku nau fakalakalaka lelei fakalaumālie? Kapau ko ia, fakalea ki he kau mātuʻá ke vakaiʻi pe ʻoku taau ʻa e faʻahinga foʻoú ke nau kau ʻi he feingangāue makehe ko ení ʻi heʻenau hoko ko e kau malanga teʻeki papitaiso. Ko e houngaʻia ʻi he ʻofa ʻa Sihova ʻi hono tokonaki mai ʻa e huhuʻí ʻe ueʻi ai kitautolu ke ʻoua ʻe ngata pē ʻi heʻetau ʻi ai ki he Fakamanatú kae toe fakaafeʻi mai foki ʻa e tokolahi taha ʻe ala lavá ke kau fakataha mo kitautolu.—Sione 3:16.