Tufaki ʻo e Ngaahi Tohi Fakaafe ʻo e Fakamanatú ʻOku Kamata ʻi ʻEpeleli 2
1. Ko fē taimi te tau tufaki ai ʻa e ngaahi tohi fakaafe ʻo e Fakamanatú ʻi he taʻu ní, pea ko e hā ʻa e mahuʻinga ʻo e feingangāue fakataʻu ko ení?
1 Mei ʻEpeleli 2 ki ʻEpeleli 17, te tau tufaki ai ʻa e ngaahi tohi fakaafe ki he kātoanga mahuʻinga taha ʻo e taʻú—ko e Fakamanatu ʻo e pekia ʻa Kalaisí. ʻI he kuohilí, kuo tali ai ʻe he faʻahinga mahuʻingaʻia tokolahi ʻa e feingangāue fakataʻu ko ení. Ko e fakatātaá, ʻi he ʻaho ʻo e Fakamanatú, naʻe tā ai ha fefine ki he ʻōfisi vaʻá ʻo ne pehē: “Naʻá ku toki haʻu ki ʻapi, pea naʻe ʻi ai ha tohi fakaafe ʻi hoku lalo matapaá. ʻOku ou fie ʻalu, ka ʻoku ʻikai ke u fakapapauʻi ʻa e taimí.” Naʻe fakamatalaʻi ʻe he tokouá ʻa e feituʻu ʻe lava ke maʻu ai ʻa e fakamatala ko ení ʻi he tohi fakaafé. Naʻe fakaʻosi ʻe he fefiné ʻene talanoá ʻaki ʻene palōmesi, “Te u ʻalu ki hoʻomou kātoangá ʻapō!”
2. Ko e hā ʻe lava ke tau leaʻaki ʻi he taimi ʻoku tau ʻoatu ai ʻa e tohi fakaafé?
2 Founga ʻo ʻEtau Fai Iá: Koeʻuhi ʻoku tau maʻu ha taimi fakangatangata ke ʻosiki ai ʻa e feituʻu ngāué, ʻoku lelei tahá ke nounou. Te tau pehē nai: “Mālō e lelei. ʻOku mau fie ʻoatu ki ho fāmilí ʻa e tohi fakaafe ko ení ki ha kātoanga fakataʻu mahuʻinga ʻa ia ʻe fai ʻi māmani lahi ʻi he Sāpate, ʻEpeleli 17. [ʻOange ʻa e tohi fakaafé ki he tokotaha-ʻapí.] Ko e ʻaho ko iá ko e ʻaho fakamanatu ʻo e pekia ʻa Sīsuú. ʻE fai ai ha malanga Fakatohitapu taʻetotongi ʻa ia ʻokú fakamatalaʻi ai ʻa e founga ʻe lava ke tau maʻu ʻaonga ai mei he huhuʻi ʻa Kalaisí. Ko e tohi fakaafe ko ení ʻoku fakahaaʻi ai ʻa e tuʻasila mo e taimi ʻoku fai ai ʻa e fakatahá ʻi hotau feituʻú.”
3. ʻE lava fēfē ke tau fakaafeʻi ʻa e kakai tokolahi taha ʻe ala lavá?
3 Kapau ʻoku maʻu ʻe he fakatahaʻangá ha feituʻu-ngāue lahi, ʻe fakahinohino nai ʻe he kau mātuʻá kimoutolu ke tuku ʻa e ngaahi tohi fakaafé ʻi he ngaahi ʻapi-ʻikai-ha-tahá, ʻo kapau ʻe lava ke tuku ia ʻo mātuʻaki puli ke ʻoua naʻa sio noa atu ki ai ha taha. Fakapapauʻi ke fakaafeʻi hoʻo ngaahi toe ʻaʻahí, ngaahi kāingá, ngaahi kaungāngāué, ngaahi kaungāakó, mo e ngaahi maheni kehé. ʻI he kau atu ʻi he tufá ʻi he ngaahi fakaʻosinga ʻo e uiké, tuʻuaki ʻa e ngaahi makasiní ʻi he taimi pē ʻe feʻungamālie aí. ʻE lava ke ke tāimuʻa tokoni lolotonga ʻa ʻEpeleli pea kau lahi ange ʻi he feingangāue fakafiefia ko ení?
4. Ko e hā ʻoku tau loto ai ke maʻu ʻe he kau mahuʻingaʻiá ʻa e Fakamanatú?
4 He fakamoʻoni mālohi ē ʻe maʻu ʻe he kau maʻu fakataha mahuʻingaʻiá! Te nau fanongo ai ki he ʻofa lahi ʻa Sihova ʻi hono tokonaki ʻa e huhuʻí. (Sione 3:16) Te nau ako ai ki he anga ʻo e maʻu ʻaonga ʻa e faʻahinga ʻo e tangatá mei he Puleʻanga ʻo e ʻOtuá. (Ai. 65:21-23) ʻE toe fakaafeʻi foki kinautolu ke nau fakalea ki he kau fakanofonofó ʻo kole ha ako Tohi Tapu ke ako lahi ange. Ko ʻemau lotú ia ke tali ʻe he kau loto-totonu tokolahi ʻa e feingangāue ko ení pea kau mai mo kitautolu ki he Fakamanatú!