Kamata ʻi Maʻasi 17 ʻa e Feingangāue ke Tuʻuaki ʻa e Fakamanatú
1. Ko e hā ʻa e feingangāue ʻe kamata ʻi Maʻasi 17?
1 Ko e kātoanga Fakamanatú ʻi he taʻu taki taha ʻoku fanongonongo ai ʻa e pekia ʻa Sīsuú. (1 Kol. 11:26) Ko ia ai, ʻoku tau loto ke tau ʻi ai fakataha mo e niʻihi kehé ʻo tau fanongo ʻo fekauʻaki mo e meʻaʻofa anga-ʻofa ʻa Sihova ko e huhuʻí. (Sione 3:16) ʻI he taʻú ni ko ʻetau feingangāue ke fakaafeʻi ʻa e kakaí ke nau haʻu ki he Fakamanatú ʻe kamata ia ʻi he ʻaho Tokonaki, Maʻasi 17. ʻOkú ke fakatuʻotuʻa atu ke ke kau kakato ki ai?
2. Ko e hā ʻe lava ke tau leaʻakí ke tuʻuaki atu ʻa e tohi fakaafé?
2 Meʻa ʻe Lava Ke Tau Leaʻakí: ʻOku lelei tahá ke fai ha tuʻuaki nounou. ʻE lava ke tau pehē: “Mālō e lelei. ʻOku mau ʻi heni ke ʻoatu ki ho fāmilí ʻa e tohi fakaafe ko ení ki ha kātoanga fakataʻu mahuʻinga ʻa ia ʻe fakahoko ʻi māmani lahi ʻi ʻEpeleli 5. ʻE fakahoko ai ha malanga Fakatohitapu taʻetotongi ʻa ia ʻe fakamatalaʻi ai ʻa e meʻa kuo fakahoko ʻe he pekia ʻa Sīsuú pea mo e meʻa ʻokú ne lolotonga fai he taimi ní. ʻOku hā ʻi he tohi fakaafe ko ení ʻa e tuʻasilá pea mo e taimi ʻe fai ai ʻa e fakataha ko ení ʻi hotau feituʻú.” ʻI he kau atu ʻi hono tufaki ia ʻi he ngaahi fakaʻosinga uiké, ʻoku totonu ke tau toe tuʻuaki foki mo e ngaahi makasiní ʻi he taimi ʻoku feʻungamālie aí.
3. ʻE lava fēfē nai ke tau fakaafeʻi ʻa e kakai tokolahi taha ʻe ala lavá?
3 Fakaafeʻi ʻa e Tokolahi Taha ʻe Ala Lavá: Ko ʻetau taumuʻá ke fakaafeʻi ʻa e kakai tokolahi taha ʻe ala lavá. Ko ia fakapapauʻi ke fakaafeʻi hoʻo kau ako Tohi Tapú, ngaahi toe ʻaʻahí, kāingá, kaungāngāué, kaungāakó, kaungāʻapí, mo ho ngaahi maheni kehé. Ko e kau mātuʻa fakalotofonuá te nau tokonaki atu ʻa e fakahinohino ki he founga ke ʻosiki ai ʻa hoʻomou vāhenga-ngāué. Ko ʻetau feingangāue fakataʻu ko ia ke fakaafeʻi mai ʻa e kakaí ki he Fakamanatú ʻoku ʻi ai hono ngaahi ola. ʻI he taimi naʻe lue atu ai ha fefine ki he faiʻanga fakatahá ʻi he taʻu kuo ʻosí, naʻe tokoni ange ha tokotaha fakanofonofo ke kumi ʻa e tokotaha malanga naʻá ne fakaafeʻi iá. Kae kehe, naʻe pehē ʻe he fefiné naʻe ʻikai te ne ʻiloʻi ʻe ia ha taha ʻi ai pea naʻá ne maʻu ʻa ʻene tohi fakaafé mei ha taha naʻe ʻalu ange mei he fale ki he fale ʻi he ʻaho pē ko iá.
4. Ko e hā ʻa e ngaahi ʻuhinga ke kau faivelenga ai ʻi he feingangāué?
4 Mahalo pē ko ha taha te ne maʻu ʻa e Fakamanatu ʻokú ke ʻalu ki aí ko ʻene ʻi aí koeʻuhí ko ha tohi fakaafe naʻá ke ʻoange. Tatau ai pē pe ʻoku tali ia ʻe ha taha pe ʻikai, ko hoʻo ngaahi feinga tōtōiví te ne kei ʻoatu pē ʻe ia ha fakamoʻoni. Ko e ngaahi tohi fakaafe ko ia te ke tufakí ʻe fanongonongo ai ko Sīsuú ʻokú ne hoko he taimí ni ko ha Tuʻi mālohi. Ko hoʻo kau faivelenga atu ki aí ʻe fakahāhā ai ki he faʻahinga kotoa ʻoku sio maí—ʻa e faʻahinga ʻi he vāhenga-ngāué, kaungāmalangá, pea mahuʻinga tahá, ʻa Sihova—ʻokú ke houngaʻia loloto ʻi he meʻaʻofa ko e huhuʻí—Kol. 3:15.