Feingangāue Tufa Tohi Fakaafe ki he Fakamanatú Kamata ʻi Maʻasi 22

ʻI he taʻú ni ko ʻetau feingangāue ke fakaafeʻi ʻa e niʻihi kehé ke maʻu ʻa e Fakamanatú ʻe kamata ia ʻi he ʻaho Tokonaki 22 ʻo Maʻasí. ʻOku fakalototoʻaʻi kotoa ke tau kau kakato ki ai. ʻI he ngaahi fakaʻosinga ʻo e uiké te tau tuʻuaki foki ʻa e makasini lolotongá kapau ʻe faingamālie. ʻI he ʻuluaki Tokonaki ʻo ʻEpelelí, te tau tokangataha ai ki hono tufa ʻa e ngaahi tohi fakaafé kae ʻikai ko hono kamataʻi ha ngaahi ako Tohi Tapu. Kae kehe, kapau te tau fetaulaki mo ha taha ʻokú ne fakahaaʻi ha mahuʻingaʻia makehe, te tau kei feinga nai ke kamata ha ako Tohi Tapu. ʻE lava ke fakapapauʻi ʻe he ʻovasia ngāué pe ko e tufaki ʻo e ngaahi tohi fakaafé ʻi he founga faifakamoʻoni ʻi he feituʻu kakaí ʻe tokoni ia ki he fakatahaʻangá ke aʻu ki he kakai tokolahi taha ʻi honau feituʻu ngāué. Hiki ha lisi he taimí ni ʻo e kāinga, kaungāngāue, kaungāako, ngaahi toe ʻaʻahí, mo e ngaahi maheni ʻa ia ʻokú ke loto ke ke fakaafeʻí pea ʻoange kiate kinautolu ha tohi fakaafe ʻi he kamata pē ʻa e feingangāué. ʻOku tau ʻamanaki ʻe tokolahi ʻa e faʻahinga ʻe kau fakataha mo kitautolu ʻi hono fakamanatu ʻa e ʻofa lahi taha kuo fakahāhā ʻe Sihova mo Sīsū.—Sione 3:16; 15:13.