Fokotuʻu ha Taumuʻa ki he Faʻahitaʻu Fakamanatú

ʻI he taʻu taki taha, ʻoku fakatuʻotuʻa atu ʻa e Kau Fakamoʻoni ʻa Sihová ke kātoangaʻi fakataha ʻa e Fakamanatú. Lolotonga ʻa e ngaahi uike ki muʻa mo e hili ʻa e Fakamanatú, ʻoku tau ngāueʻaongaʻaki ʻa e ngaahi faingamālie makehe ke ʻoatu ʻa e fakahīkihiki mo e fakamālō kia Sihova ki he meʻaʻofa ʻo e huhuʻí. (ʻEf. 1:3, 7) Ko e fakatātā, ʻoku tau kau kakato ʻi hono fakaafeʻi ʻa e niʻihi kehé ki he Fakamanatú. Ko e niʻihi ʻoku malava ke nau fai ʻa e ngaahi feʻunuʻaki kae malava ke nau tāimuʻa tokoni ʻi he houa ʻe 30 pe 50 lolotonga ʻa e māhina ʻo Maʻasi pe ʻEpelelí. Te ke loto ke fakalahi atu hoʻo kau ʻi he ngāue fakafaifekaú lolotonga ʻa e faʻahitaʻu Fakamanatu ko ení? Ko e hā te ne tokoniʻi koe ke lavameʻá?

ʻOku tau faʻa lavameʻa lahi ange ʻi heʻetau palani tokamuʻá. (Pal. 21:5) ʻI he fakaofi vave mai ʻa e faʻahitaʻu Fakamanatú, ko e taimi eni ke kamata ai ʻa e palaní. Fakakaukau ki he founga te ke saiʻia ke fakalahi atu ai hoʻo ngāue fakafaifekaú lolotonga ʻa e faʻahitaʻu Fakamanatú, pea fakalaulauloto ki he meʻa te ke fai ke aʻusia hoʻo taumuʻá. Kole leva kia Sihova ke ne tāpuakiʻi hoʻo ngaahi feingá.​—1 Sio. 5:14, 15.

ʻE lava ke ke fakakaukau ki ha ngaahi founga ke fakalahi atu ai hoʻo ngāue fakafaifekaú lolotonga ʻa e faʻahitaʻu Fakamanatú?