Ko e Fakamanatu ʻOku Teu ke Fakahokó ʻOkú Ne Fakaʻatā Ai Kitautolu ke Fakahāhā ʻa e Houngaʻia

1. Ko e hā ʻa e faingamālie makehe ʻoku ʻomai ʻe he Fakamanatú?

¹ Ko e Fakamanatu ʻi ʻEpeleli 14 ʻoku ʻomai ai ʻa e faingamālie makehe ke fakatupulekina mo fakahāhā ʻa e houngaʻia ki he ngaahi lelei ʻo Sihová. Ko e fakamatala ʻi he Luke 17:11-18 ʻoku fakaeʻa ai ʻa e anga ʻo e vakai ʻa Sihova mo Sīsū ki he houngaʻiá. Ko e meʻa fakamamahí, ko e toko taha pē mei he toko hongofulu ʻo e kau kilia naʻe fakamaʻá naʻá ne puke ʻa e faingamālie ke fakahāhā ai ʻene fakamāloó. ʻI he kahaʻú, ko e meʻaʻofa ʻo e huhuʻí te ne ʻomai ai ʻa e fakamoʻui kakato ki he kotoa ʻo e ngaahi mahamahakí, ʻo ne ʻai ai ʻa e moʻui taʻengatá ke hoko moʻoni! ʻOku ʻikai ha toe veiveiua, te tau fakamālō kia Sihova ʻi he ʻaho taki taha ki he ngaahi tāpuaki peheé. Ka ʻe lava fēfē ke tau fakahāhā ʻa e houngaʻiá lolotonga ʻa e ngaahi uike ka hoko maí?

2. ʻE anga-fēfē nai haʻatau fakatupulekina ʻa e houngaʻia ki he huhuʻí?

² Fakatupulekina ʻa e Houngaʻia: Ko e ngaahi ongoʻi ʻo e houngaʻiá ʻoku hā ia ʻi he fakakaukaú. Ke tokoniʻi kitautolu ke fakatupulekina ʻetau houngaʻia ki he huhuʻí, ko e taimi-tēpile ki he lau Tohi Tapu makehe ki he Fakamanatú ʻe lava ke maʻu ia ʻi he ngaahi feituʻu lahi, hangē ko e appendix B12 ʻi he revised New World Translation, calendar mo e Ko Hono Vakaiʻi Fakaʻaho ʻa e Tohi Tapú. Ko e hā ʻoku ʻikai lāulea ai ki he fakamatala ko ení ʻi he tuʻunga ko ha fāmili? ʻI heʻetau fai peheé, ʻe fakalahi ange ai ʻetau houngaʻia ki he huhuʻí. ʻE hoko eni ʻo ʻi ai ʻene kaunga lelei ki heʻetau tōʻongá.—2 Kol. 5:14, 15; 1 Sio. 4:11.

3. ʻI he ngaahi founga fē ʻe lava ke tau fakahāhā ai ʻetau houngaʻiá lolotonga ʻa e faʻahitaʻu Fakamanatú?

³ Fakahāhā ʻa e Houngaʻia: Ko e houngaʻiá ʻoku fakamoʻoniʻi ia ʻaki ʻa e ngāue. (Kol. 3:15) Ko e tokotaha kilia houngaʻiá naʻá ne fai ʻa e feinga ke kumi ʻa Sīsū pea fakamālō kiate ia. ʻOku ʻikai ha veiveiua, naʻá ne lea vēkeveke ki he niʻihi kehé fekauʻaki mo hono fakamoʻui fakaemana iá. (Luke 6:45) ʻE ueʻi kitautolu ʻe he houngaʻia ki he huhuʻí ke tau kau faivelenga ʻi he feingangāue ke talaki ʻa e Fakamanatú? Ko e tāimuʻa tokoní pe fakalahi atu ʻetau kau ki he ngāue fakafaifekaú lolotonga ʻa e faʻahitaʻu Fakamanatú ko e toe founga lelei ia ke fakahāhā ai ʻa e fakamālōʻiá. ʻI he efiafi ko ia ʻo e Fakamanatú, ʻe ueʻi kitautolu ʻe he loto houngaʻiá ke talitali lelei ʻa e kau ʻaʻahí mo fakafaingamālieʻi kitautolu ke tali ʻenau ngaahi fehuʻí.

4. ʻE lava fēfē ke ʻoua te tau ongoʻi fakaʻiseʻisa ʻi he Fakamanatu ko ení?

⁴ Ko ʻetau Fakamanatu fakaʻosí pē eni? (1 Kol. 11:26) ʻOku ʻikai ke tau ʻiloʻi. Ka ʻoku tau ʻiloʻi ko e hili hono fakahoko iá, ʻoku mole atu mo e faingamālie mahuʻinga ke fakahāhā ai ʻa e houngaʻiá. Te ke puke ʻa e faingamālie ko iá? ʻOfa ke hoko ʻetau ngaahi lea houngaʻiá mo ʻetau fakalaulaulotó ʻo ʻoatu ai ʻa e fiefia kia Sihova, ʻa e Tokotaha-Foaki ʻo e huhuʻí.—Saame 19:14.