Ko e Hā ʻa e Tuʻunga ʻOku ʻi Aí?

Ko ha fehuʻi lelei ia ke ʻeke fekauʻaki mo ha tohi pē ʻoku tau palani ke tuʻuaki. Ko ha tohi pē ʻoku mapelupelu, mole hono lanú, ʻuli, pe mahae ʻe tapua kovi atu ai ʻetau kautahá pea ʻe lava ke toʻo ai e tokanga ʻa e tokotaha-ʻapí mei he pōpoaki fakaʻofoʻofa, fakahaofi-moʻui ʻoku ʻi he ʻū tohí.

ʻE lava fēfē ke tau tauhi ke maau ʻetau ʻū tohí? ʻOku ʻilo ʻe he tokolahi ʻoku tokoni ke fokotuʻutuʻu ʻenau kato malangá koeʻuhi ke tuku fakataha e ngaahi meʻa meimei tataú. Ko e fakatātaá, ʻoku ʻi ai ʻenau faʻoʻanga ki he ngaahi tohí, ko ha taha ki he ngaahi makasiní mo e ngaahi polosiuá, ko e taha ki he ngaahi tulekí, mo e hā fua. ʻI he taimi pē ʻoku nau fakafoki ai ʻenau Tohi Tapú mo ha tohi pē ki heʻenau kato malangá, ʻoku nau faʻo fakalelei ia koeʻuhi ke fakaʻehiʻehi ai mei hano fakatupunga ke ʻi ha tuʻunga kovi ʻa e ʻū tohí. ʻOku tauhi ʻe he kau malanga ʻe niʻihi ʻenau ʻū tohí ʻi he ngaahi faʻoʻanga meʻa pe fanga kiʻi kato milemila. Tatau ai pē pe ko e hā e founga ʻoku tau ngāueʻakí, ʻoku ʻikai ke tau loto ke ʻoange ki ha taha ha ʻuhinga lelei ke fakaangaʻi ai ʻetau ngāue fakafaifekaú ʻi hono ʻoange kiate ia ʻa e ʻū tohi ʻi ha tuʻunga koví.—2 Kol. 6:3.