Puha Fehuʻi

◼ Ko e hā te ne fakapapauʻi pe te tau tuku ha tohi ʻi ha taha?

Ko e moʻoniʻi meʻa muʻomuʻá ko e mahuʻingaʻia ʻa e tokotahá. Kapau ʻokú ne fakahāhā ha mahuʻingaʻia moʻoni, ʻe lava ke tau tuku ai ha makasini ʻe ua, ko ha polosiua, ko ha tohi, pe ko ha tohi kehe ʻa ia ʻoku tau tuʻuakí. ʻOku moʻoni eni neongo kapau ʻoku tau ʻilo ʻoku siʻi pe halaʻatā haʻane paʻanga ke tokoni ki he ngāue ʻi māmani lahí. (Siope 34:19; Fkh. 22:17) ʻI he tafaʻaki ʻe tahá, ʻe ʻikai te tau tuku ʻetau ngaahi tohi mahuʻingá ʻi he faʻahinga ʻoku ʻikai te nau fakahoungaʻi iá.—Māt. 7:6.

ʻE anga-fēfē nai hano fakahāhā ʻe ha tokotaha-ʻapi ʻa e mahuʻingaʻiá? Ko ha loto-lelei ke talanoa mo kitautolu ko ha fakaʻilonga lelei ia. Ko e tokanga lolotonga ʻetau leá, tali ʻa e ngaahi fehuʻí, mo hono fakahaaʻi ha fakakaukaú ʻoku fakahaaʻi ai ʻokú ne kau ʻi he fetalanoaʻakí. Ko e muimui ʻi heʻetau lau ʻa e Tohi Tapú ʻoku fakahuʻunga ai ha fakaʻapaʻapa ki he Folofola ʻa e ʻOtuá. ʻI he taimi lahi, ʻoku lelei ke ʻeke pe te ne saiʻia ke lau ʻa e tohi ʻoku tuʻuakí. ʻOku totonu ke ngāueʻaki ʻe he kau malangá ʻa e fakafuofua leleí ke fakapapauʻi ai ʻa e mahuʻingaʻia ʻa e tokotahá. Ko e fakatātaá, ʻi hono fai ʻo e faifakamoʻoni ʻi he halá, ʻe ʻikai feʻungamālie ke tufa tavale ʻa e ʻū makasiní, ʻū polosiuá, pe ʻū tohí ki he tokotaha kotoa ʻoku fakalaka haké. Kapau ʻoku tau taʻemalava ke fakapapauʻi ha mahuʻingaʻia ʻa ha taha, ʻe lelei ange ke ʻoange ha lauʻipepa-tuʻuaki pe tuleki.

Pehē foki, ko e lahi ʻo e ū tohi ʻoku maʻu ʻe ha tokotaha malanga mei he kānita tohí ʻoku totonu ke makatuʻunga ia ʻi he meʻa ʻoku fiemaʻu ʻe he tokotaha malangá koeʻuhi ke fakahoko ʻene ngāue fakafaifekaú, ʻo ʻikai ʻi heʻene malava ke fai ha tokoní. Ko e ngaahi tokoní ʻoku ʻikai koeʻuhí ke totongi ʻa e ʻū tohí ka ko e poupou ki he ngaahi tafaʻaki kotoa ʻo ʻetau ngāue fakamalanga ʻi māmani lahí. Neongo pe ko e hā ʻetau maʻuʻanga paʻangá, ʻe ueʻi kitautolu ʻe heʻetau houngaʻiá ke foaki loto-fiefoaki mei heʻetau masivá, ʻikai mei heʻetau paʻanga hulú, ke poupouʻi ʻa e ngaahi meʻa ʻo e Puleʻangá. (Mk. 12:41-44; 2 Kol. 9:7) ʻE toe ueʻi foki kitautolu ke ʻave pē ʻa e ʻū tohi ʻoku tau fiemaʻú, ʻo ʻikai maumauʻi ai ʻa e paʻanga tokoni fakateokalatí.

[Fakamatala ʻi he peesi 2]

ʻOku totonu ke ngāueʻaki ʻe he kau malangá ʻa e fakafuofua leleí ke fakapapauʻi ai ʻa e mahuʻingaʻia ʻa e tokotahá