Ngāue Fakapotopotoʻaki ʻa e ʻŪ Tohi Fakatohitapú

Naʻe akoʻi ʻe Sīsū: “Kuo mou maʻu taʻetotongi, foaki taʻetotongi.” (Māt. 10:8) ʻOku tau pīkitai ki he fakahinohino mahino ko iá ʻaki ʻa e ʻikai ke tau ʻeke totongi ki he kakaí ki ha tatau ʻo e Tohi Tapú pe ko ʻetau ʻū tohi Fakatohitapú. (2 Kol. 2:17) Ka neongo ia, ʻoku ʻi he ʻū tohí ni ʻa e ngaahi moʻoni mahuʻinga mei he Folofola ʻa e ʻOtuá. Ko e ngāue lahi mo e fakamole lahi ʻa hono pulusi mo fakaheka ʻa e ʻū tohí ki he ngaahi fakatahaʻanga takatakai ʻi he māmaní. Ko ia ai, ʻoku totonu ke tau ʻave pē ʻa e meʻa ʻoku tau fiemaʻú.

Fakapotopoto ʻi hono ʻave ʻa e ʻū tohí ki he niʻihi kehé, naʻa mo e ʻi he ngaahi feituʻu faifakamoʻoni ki he kakaí. (Māt. 7:6) ʻI he ʻikai ʻoatu pē ʻa e ʻū tohí ki he faʻahinga ʻoku ʻalu haké, feinga ke fetalanoaʻaki mo kinautolu ke fakapapauʻi ʻoku nau mahuʻingaʻia. ʻE lava ke ke tali ʻio ki ha foʻi fehuʻi ʻe taha ʻi he puha hoko haké? Kapau ʻoku ʻikai lava ke ke fakapapauʻi ʻoku mahuʻingaʻia ha taha, ko e lelei tahá ke ʻoange kiate ia ha tuleki. Ko hono moʻoní, kapau ʻokú ne kole ha makasini pe ko ha tohi kehe, ʻoku tau fiefia ke ʻoange ha tatau kiate ia.—Pal. 3:27, 28.