Founga ke Maʻu ʻAonga Ai mei Ho Kulupu Ngāue Fakamalangá
1. Ko e hā ʻa e ngaahi ʻaonga ʻo e fokotuʻutuʻu Ako Tohi ʻa e Fakatahaʻangá ʻoku kei ala maʻu fakafou ʻi heʻetau kulupu ngāue fakamalangá?
1 Ko e hā ʻa e ngaahi tafaʻaki pau ʻo e Ako Tohi ʻa e Fakatahaʻangá ʻokú ke tō mei aí? Ko e ngaahi kulupú naʻe tokosiʻi mo ʻi ha fokotuʻutuʻu faingofua ange. Naʻe ʻai heni ke faingofua hono fakatupulekina ha ngaahi kaungāmeʻa naʻe hoko ko ha matavai ʻo e poupou fakalaumālie. (Pal. 18:24) Ko e ʻovasia ako tohí naʻá ne ʻiloʻi hotau ngaahi tuʻunga makehé pea lava ke tokonaki ha fakalototoʻa fakafoʻituitui. (Pal. 27:23; 1 Pita 5:2, 3) Ko e ngaahi ʻaonga ko ení ʻoku kei ala maʻu ia fakafou ʻi heʻetau kulupu ngāue fakamalangá.
2. ʻE lava fēfē ke tau tamuʻomuʻa ʻi hono fakatupulekina ʻa e ngaahi kaungāmeʻa ʻi heʻetau kulupu ngāue fakamalangá ʻa ia ko ha matavai ʻo e poupou fakalaumālié?
2 Tamuʻomuʻa: Ko e ngaahi kulupu ngāue fakamalangá fakalūkufua ʻoku nau tokolahi tatau pē mo e ngaahi kulupu ako tohí. ʻI he ngāue “uouongataha” ʻi he ngāue fakafaifekaú mo e niʻihi kehé, ʻe lava ke iku atu ai ki ha haʻi vāofi. (Fil. 1:27) Ko e toko fiha ʻi hoʻo kulupú kuó ke ngāue mo iá? ʻE lava ke ke “fano atu” ʻi he tuʻungá ni? (2 Kol. 6:13 fkm. ʻi lalo) Tānaki atu ki aí, mei he taimi ki he taimi ʻe lava nai ke tau fakaafeʻi ha taha mei heʻetau kulupú ke kau mo kitautolu ʻi heʻetau efiafi Lotu Fakafāmilí pe ko ha houa kai. ʻI he ngaahi fakatahaʻanga ʻe niʻihi, ko e ngaahi kulupu ngāue fakamalangá ʻoku nau fetongitongi ʻi hono teuteu ha houa kai maʻá e tokotaha malanga ʻaʻahí. ʻI ho nau uike kuo vaheʻí, ʻoku fakatahataha ʻa e kulupú ki ha houa kai mo ha fefakalototoʻaʻaki tatau ai pē pe ʻe lava ki ai ʻa e tokotaha-malangá.
3. Ko e hā ʻa e ngaahi faingamālie ʻe niʻihi ʻe lava ke maʻu mei he ʻaʻahi fakatauhisipi ʻi heʻetau kulupu ngāue fakamalangá?
3 Neongo ko e fakatahaʻangá he taimí ni ʻoku fakataha fakataha tuʻo ua pē he uike, ʻoku ʻikai ʻuhinga ia ko e kau malangá ʻoku nau maʻu ha tokangaekina siʻisiʻi ange. Ko e ngaahi ʻovasia kulupú kuo fakanofo kinautolu ki he kulupu taki taha ke ʻoatu ha fakalototoʻa fakafoʻituitui fakatāutaha pea akoʻi ki he ngāue fakafaifekaú. Kapau ko hoʻo ʻovasia kulupú kuo teʻeki ai ke ne fai ha fokotuʻutuʻu ke ngāue mo koe ʻi he ngāue fakafaifekaú, ko e hā ʻoku ʻikai ke ke kole ai ke mo ngāué? Tānaki atu ki ai, ko e ʻovasia ngāué ʻoku kau ki he ngāue fakafaifekau mo ha kulupu kehe ʻi he fakaʻosinga uike ʻe taha ʻi he māhina taki taha. ʻI he ngaahi fakatahaʻanga tokosiʻi angé ʻa ia ʻoku ʻi ai ha ngaahi kulupu ngāue fakamalanga siʻisiʻi pē, ʻe lava nai ke ne fokotuʻutuʻu ke ʻaʻahi ki he kulupu taki taha tuʻo ua he taʻu. ʻOkú ke fokotuʻutuʻu hoʻo taimi tēpilé ke ʻalu ʻi he ngāue fakafaifekaú ʻi he taimi ʻokú ne ngāue ai ʻi hoʻo kulupú?
4. (a) ʻOku anga-fēfē hono fokotuʻutuʻu ʻa e ngaahi fakataha ki he ngāué? (e) Ko e hā ʻoku totonu ai ke tau fakakaukau ki hono fakafaingamālieʻi hotau ʻapí ki he ngaahi fakataha ngāue fakamalangá?
4 ʻOku faʻa lelei ki he kulupu taki taha ke nau taki taha fakataha ki heʻenau ngāue fakamalangá ʻi he ngaahi fakaʻosinga ʻo e uiké. Ko hono ʻai ha ngaahi feituʻu kehekehe ke fakataha ki ai ki he ngāue ʻi he meimei taimi tatau ʻe faingofua nai ai ki he kau malangá ke ʻalu ki he fakataha malangá pea mahalo ki he feituʻu ngāué. ʻE lava ke vave ai hono fokotuʻutuʻu ʻo e kau malangá pea kamata ʻalu leva ki he feituʻu ngāué ʻo ʻikai toe tatali. ʻOku toe faingofua ange ki he ʻovasia kulupú ke ne tokangaʻi lelei ʻa e faʻahinga ʻi he kulupú. Kae kehe, ʻe ʻi ai nai ha ngaahi tuʻunga ʻe lelei ange ki ha ongo kulupu ʻe ua pe lahi ange ke ngāue fakataha. Kapau ko e fakatahaʻangá fakakātoa ʻoku nau fakataha fakataha ki he ngāué ʻi he ʻuluaki Tokonaki ʻo e māhiná pe hili ʻa e Ako Taua Leʻo, ʻoku faʻa ʻaonga ki he kulupu taki taha ke nau nofo fakataha pea ke fakamoleki ha miniti siʻi pē ʻe he ʻovasia kulupú ke fokotuʻutuʻu ʻene kulupú ki muʻa he fakataha ki he ngāue fakamalanga ʻoku fakaʻosi ʻaki ha lotu.— Sio ki he puha “ʻE Lava Ke Ke Fakafaingamālieʻi Ho ʻApí?”
5. Neongo kuo ngata ʻa e fokotuʻutuʻu ki he Ako Tohi ʻa e Fakatahaʻangá, ko e hā ʻoku lava ke tau kei falala-pau ki aí?
5 Neongo kuo ngata ʻa e fokotuʻutuʻu ki he Ako Tohi ʻa e Fakatahaʻangá, ʻoku kei hokohoko atu pē ʻa Sihova hono tokonaki mai ʻa e meʻa kotoa ʻoku tau fiemaʻú ke fai hono finangaló. (Hep. 13:20, 21) ʻI he tataki ʻa Sihová, ʻe ʻikai ke tau masiva. (Saame 23:1) ʻOku lahi ʻa e ngaahi tāpuaki ʻoku ala maʻu fakafou ʻi heʻetau kulupu ngāue fakamalangá. Kapau te tau tamuʻomuʻa pea ‘tūtūʻi lahi fau,’ te tau ‘utu lahi fau.’—2 Kol. 9:6.
[Puha ʻi he peesi 8]
ʻE Lava Ke Ke Fakafaingamālieʻi Ho ʻApí?
Ko e ngaahi fakatahaʻanga ʻe niʻihi ʻoku nau fakatahaʻi ʻa e ngaahi kulupu ki he ngāue ʻi he fakaʻosinga ʻo e uiké koeʻuhí ʻoku siʻisiʻi ʻa e ngaahi ʻapi ʻoku faingamālie ke fai ki ai ʻa e fakatahá. Ko e ngaahi fakataha ki he ngāue fakamalangá ko ha fakalahi atu pē ia ʻa e fokotuʻutuʻu ʻa e fakatahaʻangá, ko ia ko hono fai ʻa e ngaahi fakataha ko iá ki hoto ʻapí ko ha monū moʻoni. ʻE lava ke ke fakafaingamālieʻi ho ʻapí? ʻOua ʻe toumoua koeʻuhí ko e tuʻunga ho ʻapí. Ko e kau mātuʻá te nau fakakaukauʻi ʻa e tuʻuʻanga ho ʻapí mo e ngaahi tefitoʻi moʻoni meimei tatau mo ia ʻi hono fakakaukauʻi ʻa e feituʻu naʻe fili ke fai ai ʻa e ako tohí. Kapau ʻokú ke loto ke fakafaingamālieʻi ho ʻapí, ʻai ke ʻiloʻi ʻe hoʻo ʻovasia kulupú.