Kamata ʻi Maʻasi 1 ʻa e Feingangāue ke Tuʻuaki ʻa e Fakamanatú
1. ʻE kamata ʻa fē ʻetau tuʻuaki ʻa e Fakamanatú, pea ko e hā ʻe lōloa ange ai ʻa e feingangāué ʻi he taʻu ní?
1 ʻI he Falaite Maʻasi 1, ʻe kamata ai ʻetau feingangāue fakataʻu ke fakaafeʻi ʻa e niʻihi kehé ke kau fakataha mo kitautolu ki he Fakamanatú. Ko e Fakamanatú ʻe fai ia ʻi Maʻasi 26, ʻa ia ʻoku ʻuhingá ko e feingangāué ʻe kiʻi lōloa ange ia ʻi he ngaahi taʻu kuohilí. ʻE faingamālie ai ki he kakai tokolahi ke maʻu ha tohi fakaafe, tautefito kapau ʻoku nau nofo ʻi ha feituʻu ʻa ia ko e fakatahaʻangá ʻoku fuʻu lahi ʻenau feituʻu ngāué.
2. Ko e hā ʻa e ngaahi fokotuʻutuʻu ke maʻu ʻa e ngaahi tohi fakaafé pea ʻosiki ʻa e feituʻu ngāué?
2 Fokotuʻutuʻu Maau: ʻE ʻomai ʻe he kau mātuʻá ha fakahinohino ki he anga hono ngāueʻi ʻa e feituʻu ngāué, kau ki ai pe ʻe tuku ʻa e ngaahi tohi fakaafé ʻi he ngaahi ʻapi-ʻikai-ha-tahá. Kapau ʻe kei toe ʻa e ngaahi tohi fakaafé ʻi he ʻosi hono ngāueʻi ʻa e ngaahi feituʻu ngāué fale-ki-he-falé, ʻe lava nai ke tufa ia ʻi he faifakamoʻoni ki he kakaí. Ko e ʻovasia ngāué te ne fakapapauʻi ʻoku tuku ʻa e ngaahi tohi fakaafé ʻi he kānita ʻū tohí mo e makasiní ke ʻave mei ai ʻe he kau malangá, ka ko e ngaahi tohi fakaafé ʻe ʻikai ke tuku atu fakaʻangataha pē ia. ʻOku totonu ke tau ʻave pē ʻa e lahi te tau ngāueʻaki ʻi he uike pē ʻe taha.
3. Ko e hā ʻoku totonu ke tau manatuʻi ʻi he taimi ʻoku tau tuʻuaki ai ʻa e tohi fakaafé?
3 Ko e Hā Te Tau Leaʻaki? Ko e lelei tahá ke nounou, ʻe lava ai ke tau aʻu ki he kakai tokolahi taha ʻe malavá. ʻI he peesi 4 ʻoku ʻi ai ʻa e sīpinga tuʻuaki ʻe lava ke tau ngāueʻaki ʻi ho tau feituʻu ngāué. Ko e moʻoni ʻoku ʻikai te tau fiemaʻu ke ʻalu fakavave mei he tokotaha-ʻapí kapau ʻoku anga-fakakaumeʻa pe ʻi ai haʻane fehuʻi. ʻI heʻetau kau ki he feingangāue ʻi he fakaʻosinga ʻo e uiké ʻoku totonu ke tau tuʻuaki ʻa e makasiní ʻi he taimi faingamālié. ʻI Maʻasi 2, te tau fakahangataha ki hono tufa ʻa e ngaahi tohi fakaafé kae ʻikai ko e kamata ʻa e ngaahi ako Tohi Tapú.
4. Ko e hā ʻoku totonu ai ke tau kau faivelenga ʻi he feingangāué?
4 ʻOku tau ʻamanaki ʻe kau mai ʻa e tokolahi mo kitautolu ki he Fakamanatú. Ko e malangá te ne fakamatalaʻi pe ko hai moʻoni ʻa Sīsū. (1Kol. 11:26) ʻE fakamatalaʻi ai ʻa e founga hono tokoniʻi kitautolu ʻe heʻene pekiá. (Loma 6:23) Pea ʻe fakamamafaʻi ai ʻa e ʻuhinga ʻoku mahuʻinga ai ke tau manatuʻi iá. (Sione 17:3) ʻOfa ke tau kau faivelenga ʻi he feingangāué!