Fehuʻi mei he Kau Lautohí
Naʻe ʻafa ʻa e tokotaha-tohi-saame ko Tēvitá ʻi heʻene tohi ʻo pehē te ne fakahīkihikiʻi ʻa e huafa ʻo e ʻOtuá ʻo “taʻengata,” ʻi heʻene hiki ʻa e Saame 61:8?
ʻIkai. Ko e meʻa naʻe tohi ʻe Tēvitá naʻe tonu mo moʻoni.
Fakakaukau ki he meʻa naʻá ne hiki ʻi he veesi ko iá mo e ngaahi potutohi meimei tatau: “Te u toki hiva fakahīkihiki ki ho huafá ʻo taʻengata ʻi heʻeku fakahoko ʻeku ngaahi fuakavá ʻi he ʻaho ki he ʻaho.” “ʻOku ou fakahīkihikiʻi koe, ʻe Sihova ko hoku ʻOtua, ʻaki hoku lotó kotoa, pea te u fakalāngilangiʻi ho huafá ʻo taʻengata.” “Te u fakahīkihikiʻi ho huafá ʻo taʻengata pea taʻengata.”—Saame 61:8; 86:12; 145:1, 2.
Naʻe ʻikai ko ha ʻafa ʻa Tēvita, ʻo fakakaukau heʻikai ʻaupito te ne mate. Naʻá ne ʻiloʻi naʻe ʻosi tuʻutuʻuni ʻa Sihova ko e angahala ʻa e faʻahinga ʻo e tangatá ʻe iku ki he mate, pea naʻe fakahaaʻi tonu ʻe Tēvita ko ha tokotaha angahala ia. (Sēn. 3:3, 17-19; Saame 51:4, 5) Naʻá ne ʻiloʻi naʻa mo e kau tangata naʻe hōifua ki ai ʻa e ʻOtuá, hangē ko ʻĒpalahame, ʻAisake mo Sēkope, naʻa nau mate. Pea naʻe lava ke sio ʻa Tēvita ko ʻene moʻuí tonu ʻe ngata. (Saame 37:25; 39:4) Ka ko ʻene ngaahi lea ʻi he Saame 61:8 naʻe tapua mai ai ʻene holi mo e fakapapau ke fakahīkihikiʻi ʻa e ʻOtuá ʻo taʻengata, ʻa ia, pe ko e hā pē ʻa e fuoloa ʻa e moʻui ʻa Tēvitá.—2 Sām. 7:12.
Ko e niʻihi ʻo e ngaahi tohi ʻa Tēvitá naʻe fekauʻaki mo ʻene moʻuí tonu, hangē ko ia ʻoku tau vakai ki ai ʻi he fakamatala talateu ʻo e Saame 18, 51, mo e 52. ʻI he Saame 23, naʻe fakamatalaʻi ʻe Tēvita ʻa Sihova ko ha tauhi-sipi ʻokú ne tokonaki ʻa e tataki, fakaivifoʻou mo e maluʻi. Naʻe hoko ʻa Tēvita ko ha tauhi-sipi pehē. Pea naʻá ne loto ke tauhi ki he ʻOtuá ‘ʻi he ngaahi ʻaho kotoa ʻo ʻene moʻuí.’—Saame 23:6.
Manatuʻi foki, ko Sihova naʻá ne fakamānavaʻi ʻa Tēvita ke ne hiki-tohí. Ko e meʻa naʻá ne hikí naʻe kau ai ʻa e ngaahi kikite fekauʻaki mo e meʻa ʻe toki hoko ʻamui ange ai. Ko e fakatātaá, ʻi he Saame 110, naʻe tuhu ʻa Tēvita ki ha taimi ʻa ia ko hono ʻEikí te ne ‘nofo hifo ʻi he nima toʻomataʻu ʻo e ʻOtuá’ ʻi hēvani pea maʻu ʻa e mafai lahi. Ke fai ʻa e hā? Ke puleʻi ʻa e ngaahi fili ʻo e ʻOtuá pea “fakahoko ʻa e fakamaau ki he ngaahi puleʻangá” ʻi he māmaní. Ko Tēvitá naʻe tupu mei ai ʻa e Mīsaiá, ʻa e tokotaha te ne pule mei hēvani pea te ne hoko “ko ha taulaʻeiki . . . ʻo taʻengata.” (Saame 110:1-6) Naʻe fakapapauʻi ʻe Sīsū ko e kikite ʻi he Saame 110 naʻe fekauʻaki mo ia tonu pea ʻe ʻi ai hono fakahoko ʻi he kahaʻú.—Māt. 22:41-45.
ʻIo, naʻe fakamānavaʻi ʻa Tēvita ke ne tohi fekauʻaki mo hono taimí pea mo ha taimi ʻi he kahaʻú ʻa ia ʻe fokotuʻu mai ai ia pea lava ke ne fiefia ʻi hono fakahīkihikiʻi ʻa Sihova ʻo taʻengata. ʻOku tokoniʻi heni kitautolu ke tau ʻiloʻi ko e Saame 37:10, 11, 29 ʻe lava ke mahinoʻi ia ko ha fakamatala ʻo e ngaahi tuʻunga naʻe hoko ʻi ʻIsileli ʻo e kuonga muʻá pehē foki ki he ngaahi tuʻunga ʻe hoko ʻi māmani lahi ʻi he kahaʻú ʻi he taimi ʻe fakahoko ai ʻe he ʻOtuá ʻene ngaahi talaʻofá.—Sio ki he palakalafi 8 ʻo e kupu “Te Ke ʻi Palataisi mo Au” ʻi he ʻīsiu ko ení.
ʻI he Saame 61:8 pea mo e ngaahi veesi meimei tatau ʻoku fakahaaʻi ai naʻe loto ʻa Tēvita ke ne fakalāngilangiʻi ʻa Sihova ʻi ʻIsileli ʻo e kuonga muʻá ʻo aʻu ki heʻene mate. Pea ʻoku tapua moʻoni mai ai ʻa e meʻa ʻe malava ke fai ʻe Tēvita ʻi he kahaʻú ʻi he taimi ʻe toe fokotuʻu mai ai ia ʻe Sihova ki he moʻuí.