ʻE Vavé Ni ke Hoko ha Tau ʻi Māmani Lahi?—Ko e Hā ʻa e Lau ʻa e Tohi Tapú?

Lolotonga ʻa e taʻu ʻe 30 kuo maliu atú, ko e kakai tokolahi naʻa nau fakakaukau ko e vā fengāueʻaki ʻo e ngaahi puleʻangá ʻoku ʻi ha tuʻunga lelei pea fakalakalaka ange. Kae kehe, ko e vakai ko ení ʻoku kehe ia mei he meʻa ʻoku tau sio ki ai ʻi he ʻaho ní.

“ʻI he kamata ʻa e tau ʻa ʻIsileli mo Hezbollah ʻi he kauʻāfonua ʻo Lepanoní, ʻoku hohaʻa ʻa e kakaí ʻi he fekauʻaki mo e tau ʻi Gaza te ne uesia ʻa e ngaahi fonua kehe ʻi he feituʻu ko iá.”—Reuters, Sanuali 6, 2024.
“Ko e ngaahi kulupu ʻoku puleʻi ʻe ʻIulaní ʻoku nau ʻohofi mei he ngaahi tafaʻaki kehekehe, pea fakafokifā pē kuo nau kamata ngaohi meʻatau fakaniukilia. ʻIkai ngata aí, ko Lūsia mo Siaina ʻoku nau faʻahi mo ʻIulani. Ko e kotoa ʻo e ngaahi meʻá ni ko ha fakamanamana foʻou ia ki he ngaahi fonua ʻi he Uēsité.”—The New York Times, Sanuali 7, 2024.
“ʻOku hokohoko atu hono haveki ʻe Lūsia ʻa ʻIukalainé.”—UN News, Sanuali 11, 2024.
“Ko e tupu fakaʻekonōmika mo mālohi fakakautau ʻa Siainá, ko e fakautuutu ʻa e mamahiʻi fonua ʻa Taiuaní pea mo e vā kovi ʻi he vahaʻa ʻo Beijing mo Uāsingatoní ʻoku fakahaaʻi mai ai ʻoku tau ʻi ha tuʻunga fakatuʻutāmaki.”—The Japan Times, Sanuali 9, 2024.

ʻOku leaʻaki ʻe he Tohi Tapú ha meʻa ʻo fekauʻaki mo e māveuveu fakavahaʻapuleʻanga ʻoku tau sio ai he ʻaho ní? ʻE taki atu eni ki ha tau ʻi he māmaní?

Naʻe tomuʻa tala ʻe he Tohi Tapú ʻa e ngaahi meʻa ʻoku lolotonga hokó

ʻOku ʻikai ke tomuʻa tala fakaikiiki mai ʻe he Tohi Tapú ʻa e tau ko eni ʻoku tau sio ai he ʻaho ní. Kae kehe, ʻokú ne tomuʻa tala ʻe ʻi ai ʻa e tau te ne fakaʻilongaʻi hotau taimí pea ʻokú ne “ʻave ʻa e melinó mei he māmaní.”—Fakahā 6:4.

Naʻe tomuʻa tala ʻe he tohi ʻa Tanielá “ʻi he hoko ʻa e ngataʻangá,” ko e ngaahi puleʻanga hau ʻi māmaní te nau “fetēkeaki,” pe feinga ki he tuʻunga pulé. Ko e fetēkeaki ko iá ʻe kau ki ai ʻa hono fakahāhā ʻa e lahi ʻo e mālohi fakakautau pea fakamoleki mo e “ngaahi koloa” pe paʻanga lahi fakaʻulia.—Taniela 11:40, 42, 43.

Ko ha tau ʻoku teu ke hoko

ʻOku fakahaaʻi ʻe he Tohi Tapú ko e tuʻunga ʻo e māmaní ʻe ʻalu ke toe kovi ange ki muʻa ke toki fakaleleiʻi. Naʻe tomuʻa tala ʻe Sīsū “ʻe hoko ha fuʻu mamahi lahi ʻa ia kuo teʻeki hoko talu mei he kamataʻanga ʻo māmaní.” (Mātiu 24:21) Ko e “fuʻu mamahi lahi” ko iá ʻe taki atu ia ki ha tau ʻa ia ʻoku ui ko ʻĀmaketone ʻa ia ʻoku fakamatalaʻi ko e “tau ʻo e ʻaho lahi ʻo e ʻOtua Māfimafi-Aoniú.”—Fakahā 16:14, 16.

Kae kehe, ʻi ʻĀmaketoné ʻe fakahaofi ai ʻa e faʻahinga ʻo e tangatá kae ʻikai ke fakaʻauha. Fakafou ʻi he tau ko iá, ʻe fakangata ʻe he ʻOtuá ʻa e founga-pule ʻa e tangatá ʻa ia naʻa nau fakatupunga ʻa e ngaahi tau fakatupu maumau lahi. Ke ʻiloʻi ʻa e founga ʻe ʻomai ai ʻe he tau ʻo ʻĀmaketoné ʻa e melino tuʻuloá lau ʻa e ngaahi kupu ko ení:

“Ko e Hā ʻa e Tau ʻo ʻĀmaketoné?”
“Ko ‘Āmaketone ko ha Ongoongo Lelei!”