TOKONI KI HE FĀMILÍ
Founga Hono Fakahāhā ʻa e ʻOfá
ʻI he faai mai ʻa e taʻú, ko e ngaahi hoa mali ʻe niʻihi ʻoku fakaʻaʻau ke siʻisiʻi ange ʻenau fefakahāhāʻaki ʻa e ʻofá. Kapau ʻoku hoko eni ʻi hoʻo nofo malí, ʻoku totonu ke ke hohaʻa fekauʻaki mo iá?
Meʻa ʻoku totonu ke ke ʻiló
Ko e ʻofá ʻoku mātuʻaki mahuʻinga ia ki ha nofo mali mālohi. Ko hono tokonaki tuʻumaʻu ʻo e meʻakaí mo e vaí ʻoku mātuʻaki mahuʻinga ia ke tauhi ʻa e sinó ke mālohi mo moʻui lelei, ʻi he tuʻunga meimei tatau ko hono fakahāhā maʻu pē ʻa e ʻofá ʻoku tokoni ia ke fakaivimālohiʻi ha nofo mali. Naʻa mo e hili ha ngaahi taʻu ʻo e nofo malí, ko e ngaahi husepānití mo e ngaahi uaifí ʻoku fiemaʻu ke nau fakahaaʻi maʻu pē ki honau hoa malí ʻoku nau fakamahuʻingaʻi mo tokanga kiate kinautolu.
Ko e ʻofa moʻoní ʻoku taʻesiokita. ʻOkú ne kumi ki he fiefia ʻa e tokotaha ʻe tahá. Ko ia ai, ko ha hoa tokanga ʻokú ne fakahāhā ʻa e ʻofá ʻi he taimi ʻoku fiemaʻu aí kae ʻikai ke toki fakahāhā pē ʻa e ʻofá ʻi he taimi ʻokú ne ongoʻi aí.
Ko e anga-mahení, ko e ngaahi uaifí ʻoku nau fiemaʻu lahi ange ʻa hono fakahāhā ʻo e ʻofá ʻi honau ngaahi husepānití. Ko ha husepāniti te ne ʻofa lahi ʻaupito ʻi hono uaifí. Ka ʻo kapau ʻokú ne toki fakahāhā pē ʻa e ʻofa ko iá ʻi he kamataʻanga mo e ngataʻanga ʻo e ʻahó pe ki muʻa ʻi he fehokotaki fakasinó, ʻe ongoʻi veiveiua nai ʻa e uaifí pe ʻoku tokanga moʻoni ange hono husepānití. ʻOku lelei ange ke fakahāhā maʻu pē ʻa e ʻofá ʻi he ʻaho taki taha.
Meʻa ʻe lava ke ke faí
Fakahaaʻi ʻa e ʻofá ʻi he leá. Ko ha kupuʻi lea faingofua hangē ko e, “ʻOku ou ʻofa ʻiate koe” pe “ʻOkú ke mahuʻinga lahi kiate au” ʻe lava ke ne ʻai ho hoá ke ne ongoʻi ʻokú ke koloaʻaki ia.
Tefitoʻi moʻoni Fakatohitapu: “He ʻoku mei he meʻa ʻoku hulu ʻi he lotó ʻa e meʻa ʻoku leaʻaki ʻe he ngutú.”—Mātiu 12:34.
Fokotuʻu: ʻOku ʻikai fiemaʻu ke fakangatangata pē hoʻo fakahāhā ʻa e ʻofá ʻi he leá. Hiki ia—ʻi ha nouti, ʻīmeili, pe pōpoaki he telefoní.
Fakahaaʻi ʻa e ʻofá ʻaki hoʻo tōʻongá. Ko ha fāʻofua, ʻuma, pe piki nima ʻe lava ke ne fakahaaʻi atu ʻoku moʻoni hoʻo lea “ʻOku ou ʻofa ʻiate koe.” ʻE lava ke fakahaaʻi atu ʻokú ke tokanga moʻoni fakafou ʻi hoʻo fakahāhā ʻa e ngaahi tōʻonga anga-ʻofa, pe ʻoange kiate ia ha meʻaʻofa. Pe fai ha ngaahi tokoni ʻaonga ki ho uaifí—hangē ko e toʻo ʻene kató, fakaava ʻa e matapaá kiate ia, fufulu ʻa e peletí, fai ʻa e foó pe feimeʻatokoni? Ki he tokolahi, ko e ngaahi meʻa ko ení ʻoku ʻikai ko ha tokoni ʻaonga pē—ka ko e fakahaaʻi ia ʻa e ʻofá ʻi he ngāué!
Tefitoʻi moʻoni Fakatohitapu: “ʻOku totonu ke tau ʻofa ʻo ʻikai ʻi he lea pē, pe ʻaki ʻa e ʻeleló pē, ka ʻi he ngāue mo e moʻoni.”—1 Sione 3:18.
Fokotuʻu: Fakafeangai ki ho hoá ʻi he founga anga-ʻofa ʻo hangē pē ko e taimi naʻá mo faialea aí.
Vaheʻi ha taimi fakaekimoua pē. Ko hono maʻu ha taimi fakaekimoua pē te ne fakaivimālohiʻi hoʻomo nofo malí pea ʻokú ke fakapapauʻi ai ki ho hoá ʻokú ke fiefia ʻi he feohi mo iá. Ko e moʻoni, ʻe faingataʻa nai ke maʻu ha taimi fakaekimoua pē kapau ʻoku ʻi ai ha fānau pe kapau ʻoku lahi ha ngaahi meʻa fakapisinisi ke lāulea ki ai ʻi he ʻaho taki taha. Mahalo ʻe lava ke ke fai ha kiʻi meʻa faingofua hangē ko e vaheʻi ha taimi ke mo luelue fakataha ai.
Tefitoʻi moʻoni Fakatohitapu: “Fakapapauʻi ʻa e ngaahi meʻa ʻoku mahuʻinga angé.”—Filipai 1:10
Fokotuʻu: Ko e ngaahi hoa mali femoʻuekina ʻe niʻihi ʻoku nau vaheʻi tuʻumaʻu ha taimi fakaekinaua pē ʻi he fakaʻosinga ʻo e uiké pe ko ha taimi kehe ke na ō ai ki ha falekai.
ʻIloʻi ho hoá. Ko e tokotaha taki taha ʻoku kehekehe pē ʻene fiemaʻu ki hono fakahāhā ʻa e ʻofá. Fetalanoaʻaki ki he founga te mo saiʻia ai ke fefakahāhāʻaki ʻa e ʻofá pea kapau te mo saiʻia ke toe fakahāhā lahi ange ia. Fai ho lelei tahá ke fakahaaʻi ʻa e ʻofa ʻoku fiemaʻu ho hoá. Manatuʻi, ko e ʻofá ʻoku mātuʻaki mahuʻinga ia ki ha nofo mali mālohi.
Tefitoʻi moʻoni Fakatohitapu: “Ko e ʻofá . . . ʻoku ʻikai te ne kumi ki heʻene lelei pē ʻaʻana.”—1 Kolinitō 13:4, 5.
Fokotuʻu: ʻI he ʻikai ke kounaʻi ʻa e ʻofá, ʻe lava ke ke ʻeke hifo, ‘Ko e hā ʻe lava ke u fai ke ne ueʻi hoku hoá ke ne ʻofa lahi ange ʻiate au?’