Ngaahi Fehuʻi mei he Kau Lautohí
ʻOku fakapapauʻi mai koā ʻi he Palovepi 22:6 kapau ʻoku akoʻi fakalelei ʻa e fānaú, heʻikai te nau mavahe kinautolu mei he founga ʻa Sihová?
ʻOku pehē ʻe he vēsí ni: “Atu ako ki ha tamasiʻi, ʻo tāu mo hono ʻalunga, talaatu ʻo ka ne ka motuʻa ʻe ʻikai te ne hiki mei ai.” Hangē pē ko hono hanga ʻe hono ofeʻi ko ia ʻo ha kiʻi fuʻu ʻakau ʻo fakafuo ʻene tupu ko ha fuʻu ʻakau lahí, ko e fānau ko ia ʻoku akoʻi fakaleleí ʻoku nau hehema lahi ange ke tauhi kia Sihova ʻi heʻenau tupu haké. Hangē ko ia ʻoku ʻiloʻi ʻe he mātuʻa kotoa pē, ko e akoʻi peheé ʻoku fiemaʻu ki ai ʻa e taimi mo e feinga lahi ʻaupito. Ke ngaohi ʻenau fānaú ko e kau ākonga Kalisitiane, kuo pau ki he ngaahi mātuʻá ke nau fakahinohino, ekinaki, fakalototoʻa pea akonekina fakalelei kinautolu pea pehē foki mo hono fokotuʻu ha faʻifaʻitakiʻanga lelei. Kuo pau ke nau fai tuʻumaʻu mo anga-ʻofa eni ʻi he ngaahi taʻu lahi.
ʻOku ʻuhinga leva eni, kapau ʻoku tafoki ha kiʻi tama mei heʻene tauhi kia Sihová, tā ʻoku tamele ʻa e akoʻi fakaemātuʻá? ʻI he ngaahi tuʻunga ʻe niʻihi, ʻoku pau pē kuo tōnounou ʻa e ngaahi mātuʻá ʻi heʻenau ngaahi feinga ko ia ke ʻohake ʻenau fānaú ʻi he tautea mo e valoki ʻa Sihová. (Efeso 6:4) ʻI he tafaʻaki ʻe tahá, ko e foʻi palōvēpí ʻoku ʻikai ko ha fakapapauʻiʻanga ia ko e akoʻi leleí ʻe fakatupu ai ʻa e fānau ʻoku nau faitōnunga ki he ʻOtuá. Heʻikai lava ke oʻi ʻe he ngaahi mātuʻá ʻenau fānaú ki ha faʻahinga meʻa pē ʻoku nau fakaʻamu ki ai. Ko e fānaú, hangē ko e kakai lalahí, ʻoku nau maʻu ʻa e tauʻatāina ke fili pea kuo pau ke nau fili aofangatuku honau ʻalunga ʻi he moʻuí. (Teutalonome 30:15, 16, 19) Neongo ʻa e ngaahi feinga tōtōivi taha ʻa e ngaahi mātuʻá, ʻoku hoko ʻa e fānau ia ʻe niʻihi ʻo taʻefaitōnunga, hangē ko ia ko Solomoné, ʻa ia naʻá ne tohi ʻa e veesi ʻoku tau lāulea ki aí. Naʻa mo Sihova ne ʻi ai hono ngaahi foha naʻe fakamoʻoniʻi naʻa nau taʻefaitōnunga.
Ko ia ai, ko e konga Tohi Tapu ko ení ʻoku ʻikai ʻuhinga ia ko e tuʻunga kotoa pē ko ha kiʻi tama “ʻe ʻikai te ne hiki mei ai” ka ko e fakalūkufuá ʻe peheni ʻa e olá. Ko ha fakalototoʻa moʻoni eni ki he ngaahi mātuʻá! ʻOku totonu ke loto-toʻa ʻa e ngaahi mātuʻá ʻi heʻenau ʻiloʻi ko ʻenau ngaahi feinga tōtōivi ke akoʻi ʻenau fānaú ʻi he founga ʻa Sihová ʻe maʻu ai ʻa e ngaahi ola lelei. Koeʻuhi ʻoku mahuʻinga ʻa honau ngafá pea lahi ʻenau tākiekiná, ʻoku fakalototoʻaʻi ai ʻa e ngaahi mātuʻá ke nau sio fakamātoato ki honau ngafá.—Teutalonome 6:6, 7.
Naʻa mo e taimi ʻoku tafoki ai ʻa e fānaú mei heʻenau tauhi kia Sihová, ko e ngaahi mātuʻa ko ia kuo nau fakamākukanga ʻi hono akoʻi ʻenau fānaú ʻe lava ke nau maʻu ʻa e ʻamanaki ko ʻenau fānaú ʻe toe foki mai honau ʻatamaí. Ko e moʻoni Fakatohitapú ʻoku mālohi, pea ko e akoʻi fakaemātuʻá ʻoku ʻikai ke ngalo vave ia.—Sāme 19:7.